Wanzole wa Ntinu
22 Yosiya+ mvu nana kakala miau vava kayantika yala, mvu 31 kayala muna Yerusaleme.+ E nkumbu a ngudi andi Yedida wa mwan’ankento a Adaya wa musi Bosekati.+ 2 Wavanga mambu mambote vana meso ma Yave, wakangalela muna nzila zawonso za Davidi wa nkulu andi,+ kasidi vengomoka kulunene ko ngatu kulumonso.
3 Muna mvu wa 18 wa luyalu lwandi, Yosiya wa Ntinu otumini nsoneki Safani wa mwan’a Azaleya wa mwan’a Mesulame kuna nzo a Yave,+ oku vo: 4 “Tomboka kwa Kilekiya+ wa ngang’ambuta, kabonga nzimbu zawonso zitwaswanga muna nzo a Yave+ zina alangididi a mielo batambwidi kwa nkangu.+ 5 Kavana zo kwa akengi a salu kia nzo a Yave, oyau bevana zo kwa asadi a nzo a Yave ana bevangululanga e* nzo,+ 6 i sia vo, akwa umbangu, atungi ye awudi a matadi; basumba mabaya ye matadi mavalwa mu vangulula e nzo.+ 7 Kansi, ka bafwete teseswa mbalu ko muna nzimbu betambula, kadi vuvu bebundwanga.”+
8 I bosi, Kilekiya wa ngang’ambuta ovovese Safani wa nsoneki vo:+ “Nsolwele nkand’a Nsiku+ muna nzo a Yave.” Kilekiya ovene wo kwa Safani, oyantikidi wo tanga.+ 9 I bosi, Safani wa nsoneki wele kwa ntinu, umvovese vo: “E ntaudi zaku bakutikidi nzimbu zakedi muna nzo, bavene zo kwa akengi a salu kia nzo a Yave.”+ 10 Safani wa nsoneki ovovele mpe kwa ntinu vo: “Tala nkanda+ kampene Kilekiya wa nganga.” I bosi, Safani oyantikidi wo tanga vana ntadisi a ntinu.
11 O ntinu vava kawidi mvovo mia nkand’a Nsiku, otiazwini mvuatu miandi.+ 12 I bosi, o ntinu okanikini Kilekiya wa nganga, Akikami+ wa mwan’a Safani, Akebo wa mwan’a Mikaya, Safani wa nsoneki yo Asaya wa selo kia ntinu, oku vo: 13 “Nuenda yuvula Yave mu kuma kiame, mu kuma kia nkangu ye mu kuma kia Yuda yawonso mu diambu dia mvovo mia nkanda wau usolwelo, kadi makasi ma Yave mafusukidi muna yeto mengi,+ kadi mase meto ke balemvokela mvovo mia nkanda wau ko ngatu vanga mawonso masonama mo mu kuma kieto.”
14 Muna kuma kiaki, Kilekiya wa nganga, Akikami, Akebo, Safani yo Asaya, bele kwa Kuleda wa ngunz’a nkento.+ Kuleda i nkaz’a Salumi wa mwan’a Tikeva wa mwan’a Karase, wa nlundi a mvuatu. Kuleda muna Yerusaleme kazingilanga, kuna Belo Kiazole; bele mokena yandi kûna.+ 15 Ubavovese vo: “I wau wuwu kavovele o Yave wa Nzambi a Isaele, ‘Nuvovesa ndiona unutumini kwa mono vo: 16 “I wau wuwu kavovele o Yave: ‘Mpasi itwasa va fulu kiaki ye muna nkangu andi, e mvovo miawonso miasonama muna nkanda una ntinu a Yuda katangidi.+ 17 Wau vo bangiambwidi, bayokele e ndumbu kwa nzambi zankaka+ kimana bankendeleka muna salu yawonso ya moko mau,+ makasi mame mefusukila va fulu kiaki ke memana ko.’”+ 18 Kansi nuvovesa ntinu a Yuda ona unutumini nuayuvula Yave, “I wau wuwu kavovele o Yave wa Nzambi a Isaele: ‘Muna kuma kia mambu mana owidi, 19 wau vo ntim’aku ulemvokele,* uyisakidikidi vana ndose a Yave+ vava owidi mana yavova mu kuma kia fulu kiaki ye nkangu andi—bekituka se lekwa kia kenonokena* ye sibu—otiazwini mvuatu miaku+ yo dila ova ngina, omono mpe iwidi, u kavovele o Yave. 20 Muna kuma kiaki, ikuvundisa vamosi yo mase* maku, ovunda kuna luvuvamu muna ziami kiaku, meso maku ke memona mpasi zawonso itwasa va fulu kiaki ko.’”’” I bosi, banete mvutu kwa ntinu.