Wanzole wa Ntinu
25 Muna mvu wa vua wa luyalu lwa Sedekiya, muna ngonde ya kumi, muna lumbu kia kumi kia ngonde, o Nebukandesa wa Ntinu+ a Babele wizidi nuanisa Yerusaleme+ yo makesa mandi mawonso. Osikidisi e ndo yo tunga e yaka muna nzunguluk’andi yawonso,+ 2 bazungidi e mbanza yamuna mvu una wa 11 wa luyalu lwa Sedekiya wa Ntinu. 3 E lumbu kina kia vua kia ngonde ya nyá, o mvengele wasaka+ muna mbanza, ke mwakala madia ko mu dikila o nkangu a nsi.+ 4 Baziudi e vundu muna yaka kia mbanza.+ Makesa mawonso batinini muna fuku vana vitu dina vana kati kwa yaka yau yole ina lukufi ye mpatu a ntinu, ekolo Akaladi bazunganga e mbanza; o ntinu wendele muna nzil’a Araba.+ 5 Kansi, makesa ma Akaladi balakamene o ntinu, bambakidi muna makanga ma Yeriko, makesa mandi mawonso mamwangane. 6 I bosi, bakangidi o ntinu,+ banete kwa ntinu a Babele kuna Rebela, banzengele tumbu. 7 Bavondele wan’a Sedekiya vana meso mandi; Nebukandesa ovondele meso ma Sedekiya, unkangidi muna tuvambu twa nsongo yo kunata kuna Babele.+
8 Muna ngonde ina yatanu, muna lumbu kia nsambwadi kia ngonde, i sia vo, muna mvu wa 19 wa luyalu lwa Nebukandesa wa Ntinu a Babele, Nebuzadani+ wa mfumu a ayingidi, wa selo kia ntinu a Babele wizidi muna Yerusaleme.+ 9 Oyokele nzo a Yave,+ nzo a* ntinu+ ye nzo zawonso muna Yerusaleme;+ oyokele mpe nzo za akwa tunda awonso.+ 10 Makesa mawonso ma Akaladi mana makala yo mfumu ayingidi, babangwidi e yaka yazunga Yerusaleme.+ 11 Nebuzadani wa mfumu ayingidi, onete muna kinkole o nkangu una wasiswa muna mbanza, ye awana bayitambika kwa ntinu a Babele ye nsadisw’a nkangu.+ 12 Kansi, o mfumu ayingidi osisidi nkangu wankaka muna nsi ana bakala vo asukami kikilu kimana basalanga muna mpatu za vinyu se asadi a salu yangolo.+ 13 Akaladi bakosomwene malunzi ma nsongo+ ma nzo a Yave, ye makalu+ ye Kalunga+ kwa nsongo kwakala muna nzo a Yave, banete nsongo kuna Babele.+ 14 Banete mpe e yinzu ya katulwila ntoto ampolo, pawu, zengelwa ya nsing’a mwinda, mbungwa ye lekwa yawonso ya nsongo yasadilwanga muna salu kia tempelo. 15 O mfumu ayingidi obongele natinua ya tiya ye pidi ya wolo walembi sangwa lekwa+ ye palata.+ 16 Vo i malunzi mau mole ye Kalunga ye makalu mana kavanga Solomo mu kuma kia nzo a Yave, ke dialendakana ko mu teza e zitu dia nsongo wakala muna lekwa yayi yawonso.+ 17 O lá wa konso lunzi, yinkoso 18,*+ konso lunzi diakala ye ntu ansongo. O ntu wakala ye yinkoso tatu muna lá, e makonde ye nganata* zawonso zazingwa muna ntu zansongo.+ E lunzi dianzole ye makonde mandi mpe mafwanana.
18 O mfumu a ayingidi obongele mpe Seraya+ wa mbut’anganga yo Sefaniya+ wa nganga anzole ye ayingidi atatu a mielo.+ 19 Obongele mbanda-mbanda ona wakala se mfumu a makesa muna mbanza ye aludiki tanu a ntinu ana bawanuka muna mbanza yo nsoneki a mfumu a makesa ona wasonekanga o nkangu a nsi muna salu kia kisoladi ye 60 ma mpasi wantu ana bakala muna mbanza. 20 Nebuzadani+ wa mfumu ayingidi ubabakidi, ubanete kwa ntinu a Babele kuna Rebela.+ 21 O ntinu a Babele ubawende yo kubavondela kuna Rebela kuna nsi a Kamati.+ I ngialula bayalwidi e Yuda muna nsi andi.+
22 Nebukandesa wa Ntinu a Babele otumbikidi Ngedaleya+ wa mwan’a Akikami+ wa mwan’a Safani+ se nkengi a nkangu una kasisidi muna Yuda.+ 23 E mfumu zawonso za makesa vava bawidi vo ntinu a Babele otumbikidi Ngedaleya e kinkengi, bezidi kwa Ngedaleya kuna Misepa. Ezazi i nkumbu zau: Yisemaele wa mwan’a Netaneya, Yokanane wa mwan’a Kareka, Seraya wa mwan’a Tankumete wa musi Netofa yo Yazaneya wa mwan’a Anemaka, bezidi yo wantu bakala yau.+ 24 Ngedaleya ubadididi e ndofi yo wantu ana bakala yau, oku vo: “Ke numoni wonga ko wa kituka ntaudi za Akaladi. Nukala kaka mu nsi, nusadila o ntinu a Babele, e zingu kieno kiambote kikala.”+
25 Muna ngonde ya nsambwadi, Yisemaele+ wa mwan’a Netaneya wa mwan’a Elisama muna luvila lwa kintinu, wele kumosi yo wantu kumi, bawende Ngedaleya, ofwidi; bavondele mpe Ayuda ye Akaladi ana bakala yandi kuna Misepa.+ 26 I bosi, o nkangu awonso, aleke ye ambuta, mfumu za makesa, batelamene, bele kuna Engipito,+ kadi bamwene wonga wa Akaladi.+
27 Muna mvu una wa 37 wa kinkole kia Yoyakine wa Ntinu+ a Yuda, muna ngonde ya 12, muna lumbu kia 27 kia ngonde, muna mvu una Evile-merodake kayantika yala se ntinu muna Babele, ovevuele Yoyakine wa ntinu a Yuda muna pelezo.+ 28 Umvovesele kuna ngemba yo tundidika e kunda kiandi kia kimfumu lutila kunda ya atinu ankaka ana bakala yandi muna Babele. 29 Muna kuma kiaki, Yoyakine okatwidi mvuatu miandi mia pelezo, odididi vana meza ma ntinu e lumbu yawonso ya zingu kiandi. 30 Watambulanga e kunku kia madia ntangwa zawonso kuna kwa ntinu, e lumbu yawonso ya zingu kiandi.