Wanzole wa Ntinu

14 Muna mvu wanzole wa Yoase+ wa mwan’a Yoakazi wa ntinu a Isaele, Amaziya wa mwan’a Yoase wa Ntinu a Yuda oyantikidi yala. 2 Mvu 25 kakala miau vava kayantika yala, mvu 29 kayala muna Yerusaleme. E nkumbu a ngudi andi Yoadini wa musi Yerusaleme.+ 3 Wavanga mambu mambote vana meso ma Yave, kansi ke mpila mosi ko yo se diandi Davidi.+ Ovangidi mawonso mana kavanga Yoase wa se diandi.+ 4 Kansi, mabata ke makatulwa ko,+ o nkangu wakelanga kaka yimenga yo yoka ndumbu muna mabata.+ 5 E kintinu kiandi vava kiasikila, ovondele selo yandi ana bavonda se diandi wa ntinu.+ 6 Kansi, kavondele wan’au ko, kadi walemvokela nkanikinu a Yave wasonama muna nkand’a Nsiku a Mose: “Mase ke bafwete fwila mu kuma kia wan’au ko, o wana ke bafwete fwila mu kuma kia mase mau ko; kansi, konso muntu ofwila muna sumu diandi.”+ 7 Ovondele 10.000 ma Anedome+ vana Ndimb’a Mungwa,+ obakidi Sele muna vita,+ ovene dio nkumbu vo, Yoketele, yamu unu kiaki.

8 Amaziya otumini anati a nsangu kwa Yoase wa mwan’a Yoakazi wa mwan’a Yeu wa ntinu a Isaele, oku vo: “Wiza twanuana.”*+ 9 Yoase wa ntinu a Isaele otumini e nsangu zazi kwa Amaziya wa Ntinu a Yuda, oku vo: “E nkek’a mfinda muna Lebanone ivovese nti a nsedele muna Lebanone vo: ‘Vana mwan’aku ankento kwa mwan’ame ayakala kakala se nkaz’andi.’ Kansi, vaviokele bulu kia mfuta kia Lebanone kidiatakese e nkek’a mfinda. 10 Kieleka, ongeye owende Edome,+ o ntim’aku utundalele. Yangalela nkembo aku, kansi kala kaka muna nzo aku.* Ekuma ozolele twasila mpasi yo bwa kumosi ye Yuda e?” 11 Kansi Amaziya kawidi ko.+

Muna kuma kiaki, Yoase wa Ntinu a Isaele otombokele, oyandi yo Amaziya wa Ntinu a Yuda banuene kuna Bete-semese+ dia Yuda.+ 12 Yuda otufakeso kwa Isaele, konso muntu otinini kuna nzo andi.* 13 Yoase wa Ntinu a Isaele, obakidi Amaziya wa Ntinu a Yuda, wa mwan’a Yoase kuna Bete-semese. Balweke kuna Yerusaleme, Amaziya obangwidi yaka kia Yerusaleme tuka kuna Vitu dia Eferaime+ yakuna Vitu dia Konko,+ 400 za yinkoso.* 14 Obongele wolo wawonso, palata ye salanganu yawonso yakala muna nzo a Yave yo lusalu lwa nzo a* ntinu ye abakami. I bosi, ovutukidi kuna Samaria.

15 Vo i mambu mankaka ma lusansu lwa Yoase, mana kavanga, nkum’andi ye vita kanuana yo Amaziya wa Ntinu a Yuda, nga ke masonama ko muna nkand’a lusansu lwa ntinu mia Isaele? 16 Yoase olele yo mase mandi, ozikilu muna Samaria+ ye ntinu mia Isaele; Yerobame*+ wa mwan’andi oyantikidi yala vana fulu kiandi.

17 Amaziya+ wa mwan’a Yoase wa ntinu a Yuda, mvu 15 kazinga kuna nim’a lufwa lwa Yoase+ wa mwan’a Yoakazi wa ntinu a Isaele.+ 18 Vo i mambu mankaka ma lusansu lwa Amaziya, nga ke masonama ko muna nkand’a lusansu lwa ntinu mia Yuda? 19 Bamvuandila e mfulu+ muna Yerusaleme, watinina kuna Lakisi, batwika wantu banlanda kuna Lakisi yo kumvondela kûna. 20 Batwese vimbu diandi muna mvalu, ozikilu muna Yerusaleme vana vaziama mase mandi muna Mbanz’a Davidi.+ 21 O nkangu wawonso wa Yuda babongele Azareya*+ wakala ye mvu 16,+ bankitwidi se ntinu vana fulu kia Amaziya wa se diandi.+ 22 O ntinu* vava kalele yo mase mandi, Azareya otungulwidi Elate,+ ovutwidi yo kwa Yuda.+

23 Muna mvu wa 15 wa luyalu lwa Amaziya wa mwan’a Yoase wa ntinu a Yuda, o Yerobame+ wa mwan’a Yoase wa Ntinu a Isaele, oyantikidi yala muna Samaria, mvu 41 kayala. 24 Wavanganga mambu mambi vana meso ma Yave. Kasidi yambula masumu mawonso ko ma Yerobame wa mwan’a Nebate mana kasumukisina Isaele.+ 25 Wavutulwisa mwingilu a Isaele tuka kuna Lebo-kamati*+ yakuna Mbu a Araba,*+ muna diambu dia Yave wa Nzambi dina kavova muna selo kiandi Yona+ wa ngunza wa mwan’a Amitai, wa musi Ngati-kefe.+ 26 Kadi Yave omwene vo lubangamu lwa Isaele lwampasi.+ Ke vasala muntu ko wasadisa Isaele, kana nkutu munkondwa nsadisi yovo ntovoki. 27 O Yave wasia nsilu vo ke vunzuna nkumbu a Isaele kuna nsi e zulu ko.+ Dianu vo ubavulwizi vana koko kwa Yerobame wa mwan’a Yoase.+

28 Vo i mambu mankaka ma lusansu lwa Yerobame ye mawonso kavanga, nkum’andi, vita kanuana, ye una kavutulwila Damaseke+ yo Kamati+ kwa Yuda ye Isaele, nga ke masonama ko muna nkand’a lusansu lwa ntinu mia Isaele? 29 Yerobame olele yo mase mandi ye ntinu mia Isaele; Zakariya+ wa mwan’andi oyantikidi yala vana fulu kiandi.