Maku
1 I lubantiku lwa nsangu zambote za Yesu Kristu, wa Mwan’a Nzambi: 2 Wauna wasonama muna Yesaya wa ngunza vo: “(Ntwikidi ntumw’ame ku ntwal’aku,* ona okubika e nzil’aku.) 3 Nding’a muntu obokanga muna makanga, oku vo: ‘Nukubika nzil’a Yave! Nusingika nzila zandi.’” 4 Yoane wa Mvubi okedi muna makanga, wele alonginge luvubu luna vo i sinsu kia luviluku lwa ntima muna luloloko lwa masumu. 5 E zunga yawonso ya Yuda y’esi Yerusaleme awonso bezidi kwa yandi, bafungwini masumu mau, ubavubidi* muna Nkoko a Yodani. 6 Yoane wavuatanga mvuatu a mika mia samo* ye mpond’a nkand’a bulu muna luketo lwandi, madia mandi, makonko yo wiki. 7 Olongele vo: “Muntu unsundidi o nkuma okwiz’andandi, omono kiafwana nkutu yinzama ko, yakutulula e nsinga mia nsampatu zandi. 8 Omono inuvubidi muna maza, kansi oyandi okunuvubila muna mwand’avelela.”
9 Muna lumbu yayina, Yesu otukidi kuna Nazarete a Ngalili, Yoane umvubidi muna Yodani. 10 Una katombokele muna maza, vana vau omwene e zulu diziukidi, o mwanda unkulumukini nze yembe. 11 E ndinga itukidi kuna zulu, oku vo: “Ongeye u Mwan’ame anzolwa, ngeye iyangalelanga.”
12 Vana vau o mwand’avelela umfididi muna makanga. 13 Okedi lumbu 40 muna makanga, otontelo kwa Satana. Okedi vana vena bulu ya futa, kansi e mbasi zinsadisi.
14 Vava Yoane kasiwa muna pelezo, Yesu wele samuna e nsangu zambote za Nzambi kuna Ngalili, 15 oku vo: “E ntangwa yasikidiswa ifwene, e Kintinu kia Nzambi kifinamene. Nuviluk’o ntima yo kwikila muna nsangu zambote.”
16 Una kekangalanga vana mbel’a Mbu a Ngalili, omwene Simone yo Andere wa nleke andi, betubanga makonde muna mbu, kadi abaki a mbizi za maza. 17 Yesu ubavovese vo: “Nwiz’andandi, ikunukitula se abaki a wantu.” 18 Vana vau basisidi makonde mau, banlende. 19 Vava kakangele fitini, omwene Yakobo wa mwan’a Zebedayo yo Yoane wa nleke andi, belondanga makonde mau muna nzaza, 20 vana vau ubabokele. Basisidi Zebedayo wa se diau muna nzaza ye asadi, banlende. 21 Bele muna Kafanau.
Vava e lumbu kia Vundu kiayantika, wele muna sambilu, oyantikidi longa. 22 Basivikidi kikilu e mpil’andi ya longela, kadi wabalonganga nze nkwa wisa,* ke nze asoneki* au ko. 23 Muna sambilu mukedi mpe muntu wakala ye mwanda usafu, okazidi: 24 “Nkia diambu tuna diau yo ngeye, e Yesu wa nkwa Nazarete? Nga wizidi kutufwasa e? Ntomene kuzaya, u Mveledi a Nzambi!” 25 Kansi, Yesu otumbidi wo, oku vo: “Butama! vaika muna yandi.” 26 Mwanda usafu unzakamese, okazidi muna nding’angolo, uvaikidi muna yandi. 27 Awonso basivikidi kikilu, bayuvuzianini oku vo: “Nkia diambu diadi? Longi diampa! Muna wisa kavovesele e mianda miansafu, minlemvokele.” 28 Vana vau e nsangu zandi zimwanganene muna mavata mawonso ma Ngalili.
29 Una bavaikidi muna sambilu, bele yo Yakobo yo Yoane kuna nzo a Simone yo Andere. 30 O kô* wa Simone olele, ngianduka kena yau, vana vau bansamunwini wo. 31 Wele vana kena, unsimbidi muna koko, umvumbwidi. E ngianduka imene, oyantikidi kubasadila.
32 Kuna masika, vava ntangwa yadimuka, wantu bantwasidi e mbevo zawonso ye awana bakala ye nkuya; 33 e vata diawonso dilungalakene vana mwelo. 34 Owukidi ayingi bakala ye yimbevo ya mpila mu mpila, ovaikisi e nkuya miayingi, kansi kayambula ko vo e nkuya miavova, kadi bazaya wo vo yandi i Kristu.
35 Muna mene-mene, una kuma kwakinu e tombe, osikamene, ovaikidi, wele muna makanga, oyantikidi samba. 36 I bosi, Simone ye awana bakedi yandi bele kumvava, 37 una bansolwele, bamvovese vo: “Awonso ngeye bevavanga.” 38 Ubavovese vo: “Twenda kweto muna fulu yankaka, muna mavata mafinamene, yalongela mpe mwamuna, kadi ekiaki i kuma yayizila.” 39 Wele alonginge muna masambilu mau muna Ngalili yawonso, yo vaikisa e nkuya.
40 Nkwa wazi wizidi mpe kwa yandi, umfukamene yo kundodokela, oku vo: “Avo ozolele wo, umpelelesa.” 41 Wau kamwen’e nkenda, olambwidi koko kwandi, unsimbidi, umvovese vo: “Nzolele wo! Velela kwaku.” 42 Vana vau o wazi unkatukidi, ovelele. 43 I bosi, otomene kunkanikina, unsindikidi, 44 umvovese vo: “Kuvovi diambu kwa muntu ko, kansi wenda kuyisonga kwa nganga, watambika lukau lwa mpelela aku, luna Mose kakanikina muna umbangi kwa yau.” 45 Kansi, una kavaikidi, oyantikidi dio samuna yo mwang’e nsangu, o Yesu kakala diaka y’owu kakotela muna vata ko vana meso ma wantu, okedi kaka kuna mbazi e vata, muna makanga. Kansi o wantu batukanga mwawonso bezidi kwa yandi.