Akete Beyala, Ndonga Bebak’e Nluta
TUKA muna lumbu y’antumwa, Nzambi osolanga fibuka fia Akristu akwikizi, yo kubakitula se wan’andi. E zingu kiau kisobanga mvimba. Muna Nkand’a Nzambi e nsobani yayi iyikilwanga vo wutuluka. Ekani dia wutuluka i kubika fibuka fia selo ya Nzambi bevwila Kintinu kun’ezulu. (2 Timoteo 2:12) Muna kituka se atinu, befulwanga muna lufwa yo vwila moyo kun’ezulu. (Roma 6:3-5) Tuka kun’ezulu, ‘beyala e nza’ kumosi yo Kristu.—Lusengomono 5:10; 11:15.
Kansi, Nkand’a Nzambi usonganga vo, vena mpe y’akaka bevwa luvuluzu lwakwele mvu. Nkand’a Nzambi (tuka muna Sono ya Kiyibere ye muna Sono ya Kingerekia), usonganga vo Nzambi una y’ekani dia vuluza buka yole ya wantu. Akete bekwenda kun’ezulu, ndong’ayingi bevwila moyo ova ntoto. Kasikil’owu, tala edi kasoneka Yoane wa ntumwa kw’akw’andi akwikidi ana bawutuluka. Wavova muna kuma kia Yesu vo: “Andioyu i lembeka muna masumu meto [buka kiakete]; kansi ke mu meto kaka ko, ye ma nza yawonso mpe [ndong’ayingi].”—1 Yoane 2:2.
Diau adimosi, Paulu wa ntumwa wasoneka vo: “E mpunguvuvu a nsema [ndong’ayingi] ivingila lusengomoko lua wan’a Nzambi [buka kiakete].” (Roma 8:19-21) Aweyi tulenda bakulwila e mvovo mia Yoane ye Paulu wa ntumwa? Mu mpila eyi: Awana bewutulukanga bevwila Kintinu kun’ezulu. Mu nkia kuma? Mu twasa nsambu zakwele mvu kwa ndong’ayingi yizingila ova nza, muna luyalu lwa Nzambi. Muna kuma kiaki, Yesu walonga alongoki andi basambanga vo: “E kintinu kiaku kiza. O luzolo luaku luavangam’ova nza nze koko’zulu.”—Matai 6:10.
E Sono ya Kiyibere isonganga mpe vo buka yole ya wantu bevuluzwa. Kasikil’owu, tala edi kavova Yave kwa Abarayama wa nkulu a Yesu: “Muna mbongo aku [buka kiakete] i musambwilwa zula yawonso [ndong’ayingi] ya nza.” (Etuku 22:18) Elo, e zula yawonso isambwilwa muna “mbongo” ya Abarayama.
Nani i “mbongo” yoyo? Yesu Kristu y’awana bewutulukanga se wan’a Nzambi. Paulu wa ntumwa wavova vo: “Ovo nwa Kristu, ozevo nu mbongo a Abarayama.” (Ngalatia 3:16, 29) Nkia nsambu bevwa wantu a zula yawonso muna “mbongo” yayi? Betondwa kwa Nzambi yo vwa moyo a mvu ya mvu muna paradiso ova ntoto. Davidi wa ntozi a nkunga wavova vo: “Asongi bevwa nza, besikila vo yakwele mvu.”—Nkunga 37:29; Yesaya 45:18; Lusengomono 21:1-5.
Kieleka, akete kaka bevwila Kintinu kun’ezulu, kansi e nsambu ye nluta mia luyalu lwalu lw’ezulu, i sia vo, moyo a mvu ya mvu ova ntoto, uvewa kwa ndong’ayingi. Ngeye ye esi nzo aku yambula nwakala vana vena awana bevwa nsambu zakwele mvu zitwasa Kintinu kia Nzambi.
[Foto ina muna lukaya lwa 12]
Ndong’ayingi bevwa e nsambu za moyo a mvu ya mvu ova ntoto. Nga okala yau kumosi?