Finama Nzambi
Fiauzi kwa Awana Babudik’e Ntima
‘YAVE kalendi kunzola ko.’ U kavova nkento mosi wa Nkristu onwananga yo lukendalalu muna zingu kiandi. Wayindulanga vo Yave wamvavuka. Nga o Yave wavavuka kikilu selo yandi ana bemonanga lukendalalu? E mvutu za lufiaulwisu zina muna mvovo miavumunwinwa mia Davidi wa ntozi a nkunga, miasonama muna Nkunga 34:18.
Davidi wazaya una e mpasi zilenda kendelekela selo kia kwikizi kia Yave. Vava kakala nleke, Davidi wazinga nze muntayila vita, wabangikwanga kwa Saulu, ntinu a kimpala wavavanga kumvonda. Davidi wavava etininu vana fulu kina kayindulanga vo i fulu kiansuka kina Saulu ke kumvavila, mbanz’a Ngati kuna zunga kia Felesetia. Kansi, vava nkangu muna mbanza yayina bansungamena, Davidi wayivunina kilau kimana katina. Davidi wavutula matondo kwa Nzambi wau kamvuluza, ye wayika e diambu diadi vava kasoneka Nkunga 34
Nga Davidi wakwikilanga vo Nzambi wavavuka awana bemonanga e mpasi? Davidi wasoneka vo: “O Yave ofinamene awana babudik’e ntima, ovuluzang’awana bakendalala.” (Tini kia 18) Yambula twazaya una e mvovo miami milenda kutufiaulwisa yo kutuvana e vuvu.
Disionario imosi ivovanga vo e mvovo ‘Yave utufinamene,’ ulenda songa vo “Mfumu una wunikina ye una yingila, wakubama mu sadisa yo vuluza nkangu andi.” Dia lufiaulwisu mu zaya vo Yave oyingilanga nkangu andi. Ozeye e mpasi bemonanga mu lumbu yayi “yambaninu,” ye ozeye mpe dina beyindulanga muna ntima miau.—2 Timoteo 3:1; Mavangu 17:27.
“Awana babudik’e ntima.” Muna fulu yakaka, e mvovo budikw’e ntima usadilwanga mu yika wantu ke besonganga zola ko. Kansi, nkwa ngangu mosi wavova vo, e mvovo mia ntozi a nkunga “ntantu ye nkenda” miyikanga. Elo, kana nkutu selo yakwikizi ya Nzambi balenda mona e mpasi zilenda kubamwesa ntantu mu ntima.
“Awana bakendalala.” Awana bekendalalanga balenda yoya yo dimbula e vuvu kiau kiawonso. Asekodi a Nkand’a Nzambi bavova vo e mvovo wau ulenda sekolwa vo “awana ke bena ye má ko balenda bunda vuvu.”
Yave aweyi kebadikilanga awana ‘babudik’we ntima’ yo ‘kendalala’? Nga okubavavukanga yo kubabadikila vo ke bafwete zolwa ko? Ve kikilu! Nze una ese dianzodi kesimbilanga yo fiaulwisa mwan’andi wakendalala, Yave ofinamanga asambidi andi ana bekazanga kwa yandi mu vava lusadisu lwandi. Una ye luzolo lwa kubafiaulwisa yo lembeka e ntima miau miabudika ye kubavevola muna nkenda. Olenda kubavana e ngangu ye nkuma bavwidi o mfunu mu zizidila konso mpasi balenda wanana zau.—2 Korinto 4:7; Yakobo 1:5.
Ekuma olembi vavila e mpila yafinamena Yave? O Nzambi ndioyo wa nkenda wasia nsilu vo: “Nkalanga muna fulu kiazanguka kiavauka, yo nkwa mwand’akosomoka, anlembami, yavutula mwand’a nlembami, yavutula ntima mi’awana bakosomoka.”—Yesaya 57:15.