Mokena oma ma Nkand’a Nzambi nga Wantu Awonso Ambote ku Zulu Bekwenda?

MBANGI ZA YAVE beyangalelanga mokena oma ma Nkand’a Nzambi ye mfinangani zau. Nga vena ye diambu muna Nkand’a Nzambi dina kutoma bakulanga ko? Nga ozolele zaya mana Mbangi za Yave bekwikilanga? Avo i wau, kukadi ye lukatikisu ko mu yuvula mambu mama vava omonana ye Mbangi za Yave. Bekala ye kiese kia mokena yaku e mambu mama.

Tala e mpila moko kina Mbangi za Yave balenda mokena ye mfinangani zau. Yindula vo Mbangi a Yave nkumbu andi Makiese, wele kuna nzo a Luvwalu.

Awana Bekwenda Kun’ezulu, Nkia Salu Bekwenda Sala?

Makiese: Aweyi oyindulanga vava omonanga mambu mambi mebwanga mu nza yayi! Nga soba mesoba yovo mbi wokela kaka iwokela?

Luvwalu: Kuna kwa mono, mambu soba mesoba. Ngina ye vuvu kia kwenda kun’ezulu muna kala kumosi yo Mfumu.

Makiese: E vuvu kiaki, kiambote kikilu. Nkumbu miayingi Nkand’a Nzambi usasilanga oma m’ezulu y’elau dia kwenda ko. Nga wakiyuvula kala, o wantu awaya nkia salu bekwenda sala kun’ezulu?

Luvwalu: Tukala yo Nzambi yo kunkembelela yakwele mvu.

Makiese: E ngindu zazi zambote kwandi. Diakiese mu zaya vo Nkand’a Nzambi, ke uyikanga kaka ko e nsambu bevwa awana bekwenda kun’ezulu kansi uyikanga mpe e salu besala.

Luvwalu: Nkia salu besala?

Makiese: E salu kiaki kiyikwanga muna Lusengomono 5:10. Muna sono kiaki tutanganga vo: “[Yesu] wabakitula se kintinu ye nganga kuna kwa Nzambi eto; beyal’ova nza.” Nga obakwidi e salu besala awana bekwenda kun’ezulu?

Luvwalu: E sono kiaki kisongele vo, oyau beyala s’atinu ova nza.

Makiese: E diambu diadi diambote kikilu.

Aki Nani Beyalwa?

Makiese: Avo awana bekwenda kun’ezulu beyala s’atinu, nga kukwikidi ko vo vafwete kala wantu ana beyalwa? Nga kintinu kilenda yala kondwa wantu bafwete yalwa?

Luvwalu: Ve.

Makiese: Ozevo, e kiuvu kifwete vangwa i kiaki: Aki nani beyalwa?

Luvwalu: Oyau nanga beyala o wantu ova ntoto ana ke bafwidi ko ngatu kwenda kun’ezulu.

Makiese: Kieleka, e mvovo miaku nga miambote kele vo wantu awonso ambote benda kun’ezulu. Nga vena ye wantu akaka ambote ana ke bekwenda kun’ezulu ko?

Luvwalu: Kizeye wo ko vo vena ye Akristu bekwikilanga e diambu diadi.

Makiese: Mvangidi kiuvu kiaki mu kuma kia dina diasonama muna Nkunga 37:29. Nga olenda tanga sono kiaki?

Luvwalu: Ingeta. Kivovele vo: “Asongi bevwa nza, besikila vo yakwele mvu.”

Makiese: Ntondele. Ng’omwene kuna bezingila wantu ayingi ambote?

Luvwalu: E sono kiaki kisongele vo, wantu awaya va ntoto bezingila.

Makiese: I wau kikilu, kansi ke bezingila va ntoto mu kolo kiandwelo ko. Kadi e sono kiaki kivovanga vo: “Besikila vo yakwele mvu.”

Luvwalu: Ediadi nanga disongele vo vekala kaka yo wantu ambote ova ntoto. Vava tufwa yo kwenda kun’ezulu, tuvingwa kwa wantu akaka ambote ana bewutuka ova ntoto.

Makiese: Nanga ndonga besasilanga e sono kiaki mu mpila yayi. Kansi, e sono kiaki kina ye nsasa yakaka. Kisonganga vo wantu ambote bezinga yakwele mvu ova ntoto.

Luvwalu: Kibakwidi ko dina ovovele.

Ntoto Ukituka se Paradiso

Makiese: Tala dina divovanga e sono kiakaka kia Nkand’a Nzambi e mpila ukadila e zingu ova ntoto. Yambula twatanga Lusengomono 21:4. E sono kiaki kivovanga mu kuma kia wantu bezinga muna tangwa yayina ova ntoto vo: ‘[Nzambi] okunguna mansanga mawonso muna meso mau; o lufwa, ke lukala diaka ko; musungula kala diaka dilu, yovo kazu, ngatu mpasi: oma mantete maviokele.’ O nsilu wau nga ke walukasakeso ko?

Luvwalu: Walukasakeso kikilu. Kansi, muna ngindu zame, e sono kiaki una kikadila zingu kun’ezulu kisonganga.

Makiese: Dialudi, awana mpe bekwenda kun’ezulu, nsambu zazi bevwa. Kansi, tala diaka e sono kiaki. Adieyi dibwila lufwa?

Luvwalu: E sono kiaki kisongele vo “lufwa ke lukala diaka ko.”

Makiese: I wau kikilu. Wau vo o lufwa ke lukala diaka ko, ediadi disonganga vo o lufwa luna.

Luvwalu: Dialudi.

Makiese: Kansi, kun’ezulu ke kuna lufwa ko. Wantu va ntoto kaka befwilanga.

Luvwalu: Kinga! Mfwete fimpa e diambu diadi.

Makiese: Luvwalu, o Nkand’a Nzambi ulonganga vo wantu ambote bekwenda kun’ezulu, kansi akaka bezingila ova ntoto yakwele mvu. Ngina ye ziku vo wawá kala e mvovo miami: “Akwa nsambu alembami: kadi bevwila nza.”​—Matai 5:5.

Luvwalu: Ingeta, nkumbu miayingi yawá mio kala muna nzo a nzambi.

Makiese: Wau vo alembami bevwa nza, ediadi disonganga vo o wantu bezinga ova ntoto, bevwa e nsambu ziyikwanga muna sono kia Lusengomono. Oyau bemona vava Nzambi kefokola o lufwa ye mbi yawonso ova nza.

Luvwalu: Mbakwidi dina ozolele vova, kansi kikwikidi ko vo sono kimosi kaka yovo yole ya Nkand’a Nzambi ilenda songa ziku kia diambu ovovele.

Makiese: Olungidi kwaku. Kansi, ke sono kimosi kaka ko, vena ye sono yayingi yisasilanga una ukala e zingu ova ntoto. Avo ozolele, ndenda kusonga e sono yakaka ya Nkand’a Nzambi.

Luvwalu: Ka diambu ko.

‘E Kimpumbulu ke Kala Diaka Ko’

Makiese: Tutangidingi kala e sono kia Nkunga 37:29. Owau, yambula twatanga diaka e tini kia 10 ye 11. Olenda kwaku tanga e sono kiaki.

Luvwalu: Ke diambu ko. “Finkolo-kolo kaka, e kimpumbulu, ladi: kan’otomene tala fulu kiandi, nkatu kwandi. Alembami bevwa nza; beyangalela muna mawete mayingi.”

Makiese: Ntondele. Landila e tini kia 11, “alembami” akweyi bezingila?

Luvwalu: Tini kia kiaki kiyikidi vo “bevwa nza.” Mbakwikidi vo e sono kiaki mu lungana kina mu lumbu yeto, kadi o unu vena ye wantu ambote ova nza.

Makiese: Dialudi. Kansi, e sono kiaki kiyikanga mpe vo wantu ambote “beyangalela muna mawete mayingi.” Nga i diau tumonanga o unu?

Luvwalu: Ve kikilu.

Makiese: O nsilu wau aweyi ulunganena? Badika e nona kiaki: Yindula vo ngeye u mfumu a nzo mosi yandá. Akaka mun’awana befutilanga mo, wantu ambote, betoma yo lunga-lunganga yo songa e ngemba kwa mfinangani zau. Oyangalelanga vo wantu awaya bafutilanga e nzo aku. Kansi, akaka afutidi ambi, beyivisanga e nzo aku ye ke bezolanga mfinangani zau ko. Adieyi ovanga avo wantu awaya befutilanga mu nzo aku ke bazolele soba ko?

Luvwalu: Mfwete kubavaikisa.

Makiese: I diau mpe kevanga Nzambi kwa wantu ambi o unu. Tala diaka tini kia 10, kiyikidi vo: ‘E kimpumbulu ke kala diaka ko.’ Ediadi disongele vo, Nzambi “ofwasa” ana bevanganga e mbi kw’akaka. Vo i wantu ambote bezingila mu luvuvamu ova ntoto. Mbwene vo elongi diadi diyikanga vo wantu ambote bezingila ova ntoto yakwele mvu diaswaswana ye dina wateka longoka.

Luvwalu: Elo, kiasidi wá nkutu diambu diadi ko muna dibundu diame.

Makiese: Nze una otekele vova, ka tufwete fimpa kaka sono kimosi ko yovo yole. Muna zaya mana kevovanga Nkand’a Nzambi mu kuma kia nsambu bevwa wantu ambote, tufwete fimpa mawonso mena mo. Mun’owu wa sono tutekele tanga, nga kukwikidi ko vo vena ye buka kia wantu bekwenda kun’ezulu ye akaka bezingila ova ntoto yakwele mvu?

Luvwalu: Kizeye ko. Kansi, mbwene vo e sono otangidi yisongele ziku kia diambu diadi. Mfwete yo toma fimpa.

Makiese: Nanga olenda kala ye yuvu yakaka. Kasikil’owu, adieyi tulenda vova mu kuma kia wantu bateka zinga vitila tandu kieto? Nga yau awonso bayenda kun’ezulu? Avo ve, akweyi bena?

Luvwalu: E yuvu yayi yambote kikilu.

Makiese: Tuvang’owu. Ikusisila eyaka sono ivovelanga diambu diadi.a Sala yo tanga yo fimpulula, i bosi tumokena vava mvutuka. Aweyi obenze?

Luvwalu: Ka diambu ko. Olenda kwaku vutuka.

[Mvovo Vana Yand’a lukaya]