Bibila i Nsangu za Nzambi Kuna kwa Yeto

Yave watuvana lukau lwamfunu, i sia vo, Bibila. O lukau lwalu luna ye nkanda 66 miakete. Kansi, nanga olenda kukiyuvula: ‘Akweyi Bibila kiatuka? Nani wasonekesa? Muna baka e mvutu za yuvu yayi, yambula twavovela una Bibila kialwakila kwa yeto.

1. Avo wantu basoneka Bibila, ekuma tuvovelanga vo kwa Nzambi kiatuka?

Tezo kia wantu 40 basoneka e Bibila, mu kolo kia mvu 1.600, tuka muna mvu wa 1513 V.T.K. yamuna mvu wa 98 T.K. Asoneki awaya salu yaswaswana basalanga, akaka muna yau bakala avungudi a mameme, abaki a mbizi za maza ye atinu. Kanele vo i wau, Bibila ngwizani kina. Ekuma? Kadi Bibila i Diambu dia Nzambi. (Tanga 1 Tesalonika 2:13.) Asoneki ke basoneka ngindu za yau kibeni ko, kansi, “bavova mana matuka kwa Nzambi wauna bafidilwa kwa mwand’avelela.”a (2 Petelo 1:21) Nzambi wasadila mwand’andi avelela mu vumunuina yovo fila asoneki awaya mu soneka ngindu zandi.—2 Timoteo 3:16.

2. Nani olenda vua nluta mia nsangu zina muna Bibila?

E “zula yawonso, makanda, ndinga ye nkangu,” balenda vua nluta mia nsangu zambote zina muna Bibila. (Tanga Lusengomono 14:6.) Nzambi wavanga mawonso kimana e Bibila kia sekolwa mu ndinga zayingi lutila nkanda miankaka muna lusansu lwa wantu. Muna mpila yayi, wantu awonso balenda tanga Diambu dia Nzambi, kiakala nkia fulu bezingilanga yovo nkia ndinga bevovanga.

3. Adieyi Yave kavanga mu tanina e Bibila?

Kuna lubantiku Bibila kiasonekenua muna lekwa ke itoma zingilanga ko, nze nkanda mia bulu ye mabu. Kansi, awana batoma zolanga e Bibila babandula yo bandulula kio muna moko. Akwa nkuma mpe bavava fukisa e Bibila, kansi akaka basia nkutu mioyo miau mu vonza muna tanina kio. Muna mpila yayi, Yave kayambula ko vo konso lekwa yovo muntu kakakidila e nsangu zandi zalembi lwaka kwa yeto. E kiaki i ziku kisonganga vo: “Diambu dia Nzambi eto dizinga yakwele mvu.”—Yesaya 40:8.

ZAYA DIAKA MANKAKA

4. Bibila kisunzulanga ona Wasonekesa kio

Tala e VIDEO. I bosi, tanga 2 Timoteo 3:16 yo vana e mvutu za yuvu ilende.

VIDEO: Nani i Nsonekesi a Nkand’a Nzambi?—Findambu Kaka (2:48)

• Avo wantu basoneka Bibila, ekuma kiyikilwanga vo Diambu dia Nzambi?

• Nga okwikidi wo vo Nzambi wafwana zayisa e ngindu zandi kwa wantu ana basoneka e Bibila?

5. E mbeni ke balenda fukisa Bibila ko

VIDEO: Batoma Zolanga O Nkand’a Nzambi—Findambu Kaka (William Tyndale) (6:17)

• Ozaya vo mayingi mavangwa muna tanina e Bibila, nga difididi mu kala ye luzolo lwa tanga kio? Ekuma?

Tanga Nkunga 119:97, i bosi, vana e mvutu za kiuvu eki:

• Adieyi diafila wantu ayingi mu sia e mioyo miau mu vonza muna sekola yo kayanesa e Bibila?

6. Bibila kiakubikwa mu kuma kia wantu awonso

Bibila i nkanda usundidi o sekolwa yo kayaneswa muna lusansu lwa wantu. Tanga Mavangu 10:34, 35, i bosi, vana e mvutu za yuvu eyi:

• Ekuma Nzambi kazolele vo e Diambu diandi diasekolwa yo kayaneswa?

• Nkia diambu diyangidikidi mu kuma kia Bibila?

MAMBU MASINA MA LONGI DIADI

Bibila i Diambu dia Nzambi ye wavanga mawonso kimana kialwaka kwa wantu awonso.

Nkia Mambu Olongokele?

• Vava tuvovanga vo Nzambi wavumunuina wantu basoneka e Bibila, aweyi disongele?

• Nkia diambu dikusivikisanga muna mpila e Bibila kiataninua, sekolwelwa yo kayaneswa?

• Aweyi omonanga wau ozeye wo vo Nzambi ovanganga mawonso mu mokena yaku?

TALA MPE OMA MALENDE

Tanga lusansu lwa Bibila, tuka muna sono yankulu yamuna nsekola za unu.

“Como a Bíblia Chegou até Nós” (Sikama!, Novemba 2007)

Zaya una e Bibila kiavukila muna vonza tatu.

“Nkand’a Nzambi Ke Wafukiswa Ko” (Eyingidilu No. 4 2016)

Tala una wantu basila mioyo miau mu vonza muna sekola e Bibila.

Batoma Zolanga o Nkand’a Nzambi (14:26)

E Bibila kiabandulwa yo sekolwa nkumbu miayingi. Aweyi olenda kadila ye ziku vo e nsangu zina mo ke zasobwa ko?

“Nga Mambu Mankaka Muna Bibila Masobwa?” (Longi dina muna jw.org)