LONGI DIA 20
Aweyi Yave Kesadilanga Yesu mu Twadisa e Nkutakani?
Yave ke Nzambi a mvuanga ko. (1 Korinto 14:33) Muna kuma kiaki, ovavanga vo nkangu andi mpe walembi kala wamvuanga. Aweyi e nkutakani a Yave isadilanga? Aweyi tulenda yo yikamena kimana yasalanga mu mpila yambote?
1. Nani i ntu a nkutakani?
‘Kristu i ntu a nkutakani.’ (Efeso 5:23) Tuka kuna zulu, Kristu odiatisanga e salu kia nkangu a Yave mu nza yawonso. Wasola “ntaudi akwikizi yo lulungalalu,” i sia vo, buka kiakete kia akuluntu azikuka, beyikilwanga mpe vo Buka kia Selo Yambuta. (Tanga Matai 24:45-47.) Nze una bavanganga antumwa ye akuluntu kuna Yerusaleme muna tandu kiantete, o unu e Buka kia Selo Yambuta bevananga tuludiku kwa nkutakani zawonso. (Mavangu 15:2) Kansi, ke yau ko i mfumu za Mbangi za Yave. Belongokanga e Bibila mu zaya dina Yave kazolele vo bavanga. Belandanga mpe luludiku lwa Yesu.
2. Aki nani i akuluntu ye nkia salu besalanga?
Akuluntu i Akristu azikuka ana besadilanga Bibila mu longa nkangu a Yave, kubasadisa yo kubakasakesa. Ke befutwanga nzimbu ko muna salu kiau. Kansi, besalanga “kuna mvevo vana ndose a Nzambi; ke mu vava nluta mu mpila yambi ko, kansi ye nsi a ntima wawonso.” (1 Petelo 5:1, 2) E selo ya salu i ampangi ana besadisanga akuluntu muna nkutakani. Kuna kulanda, selo ya salu balenda kuyifwanisa yo tumbikwa se akuluntu avo balungisi mana mevavuanga.
Buka kia Selo Yambuta besolanga akuluntu ankaka kimana basala se akengi a zunga. E mpangi zazi bekingulanga nkutakani zayingi mu vana tuludiku kwa ampangi yo kubakasakesa. Akengi a zunga besadilanga mana mena muna Bibila mu tumbika ampangi se akuluntu ye selo ya salu.—1 Timoteo 3:1-10, 12; Tito 1:5-9.
3. Nkia mambu konso Mbangi a Yave kafwete vanga?
Yeto awonso muna nkutakani tufwete ‘kembelelanga e nkumbu a Yave’ muna vananga e mvutu muna tukutakanu yo vaikanga muna salu kia umbangi mun’owu wa ngolo zeto.—Tanga Nkunga 148:12, 13.
ZAYA DIAKA MANKAKA
Zaya kana nkia mpila mfidi Yesu kena, zaya mpe una akuluntu betangininanga mbandu andi ye una tulenda lemvokela Yesu ye akuluntu.
4. Yesu mfidi ambote
Yesu okutulombanga kuna ngemba zawonso twantambulwila se mfidi eto. Tanga Matai 11:28-30, i bosi, vana e mvutu za yuvu eyi:
Yesu nkia mpila mfidi kena? Aweyi omonanga mu kala yo mfidi a mpila yayi?
Aweyi akuluntu betangininanga mbandu a Yesu? Tala e VIDEO.
Bibila kitoma longanga una akuluntu bafwete sadilanga e salu kiau.
Tanga Yesaya 32:2 ye 1 Petelo 5:1-3, i bosi, vana e mvutu za yuvu eyi:
Aweyi omonanga mu zaya vo akuluntu betangininanga Yesu muna kasakesa akaka?
Mu nkia mambu mankaka akuluntu betangininanga Yesu?
5. Akuluntu bekutulongelanga muna mbandu au
Aweyi Yesu kazolele vo akuluntu babadikilanga e salu kiau? Tala e VIDEO.
Yesu wavana tuludiku tuna ampangi bevitanga o ntu muna nkutakani bafwete landa. Tanga Matai 23:8-12, i bosi, vana e mvutu za yuvu eyi:
Nkia nkanikinu mia Bibila akuluntu bafwete lemvokelanga? Adieyi obenze, nga afidi a mabundu belemvokelanga nkanikinu miami?
Akuluntu besiamisanga kikundi kiau yo Yave yo sadisa esi nzo zau mu vanga diau dimosi
Akuluntu belunga-lunganga awonso muna nkutakani
Akuluntu bekuyivananga muna salu kia umbangi
Akuluntu belonganga Diambu dia Nzambi, kansi besalanga mpe salu yankaka nze salu kia luveleleso
6. Tufwete yikamanga akuluntu
Bibila kikutusonganga kuma kiasikila tufwete yikamenanga akuluntu. Tanga Ayibere 13:17, i bosi, vana e mvutu za kiuvu eki:
Ekuma Bibila kivovelanga vo twalemvokelanga awana bevitanga o ntu muna nkutakani?
Tanga Luka 16:10, i bosi, vana e mvutu za kiuvu eki:
Ekuma tufwete yikamenanga akuluntu kana nkutu muna mambu makete?
AVO MUNTU UVOVESE VO: “Ke dina kwandi mfunu ko mu sambila Nzambi entwadi ye akaka muna nkutakani a Yave. Tulenda sambila Nzambi muna mpila ina tuzolele.”
Nkia nluta obaka avo osambidi Yave muna nkutakani andi?
MAMBU MASINA MA LONGI DIADI
Yesu i mfidi a nkutakani. Tuna ye kiese kia yikama akuluntu ana befilwanga kwa Yesu, kadi bekutukasakesanga yo kutulongela muna mbandu au.
Nkia Mambu Olongokele?
Nani i ntu a nkutakani?
Aweyi akuluntu besadisilanga e nkutakani?
Nkia mambu konso Mbangi a Yave kafwete vanga?
TALA MPE OMA MALENDE
Tala e ziku kisonganga vo e Buka kia Selo Yambuta ye akuluntu ankaka betokanenanga e wete dia Akristu o unu.
Kasakesa Ampangi Muna Zunga ina vo e Salu Kieto Kiasimwa (4:22)
Tala e salu besalanga akengi a zunga.
Tanga Eyingidilu diadi mu zaya e fulu kiamfunu akento bena kiau muna nkutakani.
Zaya e ngolo akuluntu bevanganga mu kasakesa mpangi zau.
“Akuluntu Akristu ‘Asadisi Muna Kiese Kieto’” (Eyingidilu dia 15 dia Yanuali, 2013)