LONGI DIA 14
Aweyi Nsambil’eto Ilenda Yangidikila Nzambi?
Nze una twalongokele muna longi diviokele, ke mabundu mawonso ko meyangidikanga Nzambi. Kansi, tulenda sambila Mvangi eto muna mpila ina keyangalelanga. Nkia “nsambila” Nzambi keyangalelanga? (Yakobo 1:27) Yambula twazaya dina Bibila kilonganga.
1. Aweyi tulenda zayila e nsambila Nzambi keyangalelanga?
E Bibila kilenda kutusadisa mu zaya e nsambila Nzambi keyangalelanga. Yesu wavovesa Nzambi vo: “E diambu diaku i ludi.” (Yoane 17:17) Mabundu mankaka mebembolanga e ludi kina muna Diambu diavumunuinua kwa Nzambi, i sia vo, Bibila. Mabundu mama mevingisanga malongi ma wantu ye fu ya kisi nsi vana fulu kia malongi ma Bibila. Kansi, Yave ke yangalelanga awana ‘bebembolanga nkanikinu miandi’ ko. (Tanga Maku 7:9.) Ozevo, avo tulemvokele malongi ma Bibila tumwesa ntim’a Yave e kiese.
2. Aweyi tufwete sambidilanga Yave?
Wau vo Yave i Mvangi eto, yandi kaka tufwete sambila. (Lusengomono 4:11) Ediadi disongele vo tufwete kunzola yo sambila kaka yandi lembi sadila teke yovo fwaniswa.—Tanga Yesaya 42:8.
E nsambil’eto, ifwete kala ‘yavauka ye yatondakana’ kwa Yave. (Roma 12:1) Ediadi disongele vo tufwete lemvokelanga nsiku miandi. Muna bonga e nona, awana bezolanga Yave, belemvokelanga nsiku miandi muna diambu ditadidi longo. Bevenganga fu yambi nze nua mfomo, sadila droga yovo nua malavu mayingi mankolwa.a
3. Ekuma tufwete sambidilanga Yave kumosi ye akweto Akristu?
Olungana kumosi ye akaka konso lumingu, dikutuvananga e lau dia ‘kembelela Yave . . . muna nkutakani.’ (Nkunga 111:1, 2) Imosi muna mpila tuvangilanga wo i yimbidila Nzambi e nkunga. (Tanga Nkunga 104:33.) Yave okutulombanga vo twendanga muna tukutakanu kadi okutuzolanga. Ozeye wo vo tukutakanu tukutusadisa mu kala ye lau dia vua moyo a mvu a mvu. Muna tukutakanu, tukasakeswanga, oyeto mpe tukasakesanga akaka.
ZAYA DIAKA MANKAKA
Zaya e kuma Yave ke yangalelanga nsambil’a teke ko. Zaya mpe mpila zankaka tulenda kembelela Nzambi.
4. Ke tufwete sadilanga teke ko muna sambila Nzambi
Aweyi tuzayidi wo vo Nzambi ke zolanga ko vo twasadila e teke muna kunsambila? Tala e VIDEO, i bosi, vana e mvutu za kiuvu kilende.
Adieyi diavangama vava ankaka muna nkangu a Nzambi kuna nz’ankulu basadila e teke muna kunsambila?
Wantu ankaka besadilanga teke muna nsambil’au mu vava finama Nzambi. Nga ediadi dilenda fila Nzambi mu kutuvambuka? Tanga Luvaiku 20:4-6 ye Nkunga 106:35, 36, i bosi, vana mvutu za yuvu eyi:
Nkia lekwa yovo teke omonanga ina wantu besadilanga muna nsambil’au?
Aweyi Yave kemonanga vava wantu besadilanga teke muna nsambila?
Aweyi omwenanga fu kia sadila e teke?
5. Osambila kaka Yave dikutuvevolanga muna malongi maluvunu
Osambila Yave muna mpila ikunyangidikanga dilenda kutuvevola muna malongi maluvunu. Mu nkia mpila? Tala e VIDEO.
Tanga Nkunga 91:14, i bosi, vana e mvutu za kiuvu eki:
Nkia nsilu Yave kekutusilanga avo tunsongele zola yo sambila kaka yandi?
6. Sambila Nzambi muna tukutakanu
Tukembelelanga Yave yo kasakesa mpangi zeto vava tuyimbilanga yo vana e mvutu muna tukutakanu. Tanga Nkunga 22:22, i bosi, vana e mvutu za yuvu eyi:
Nga oyangalelanga wá e mvutu za mpangi zeto muna tukutakanu?
Nga ozolele kubama kimana wavana e mvutu muna tukutakanu?
7. Yave oyangalalanga vava tuzayisanga mana tulongokanga kwa akaka
Vena ye mpila zayingi tulenda zayisila e ludi kia Bibila kwa akaka. Tanga Nkunga 9:1 ye 34:1, i bosi, vana e mvutu za kiuvu eki:
Nkia mambu olongokele muna Bibila mana ozolele zayisa kwa muntu ankaka?
AVO MUNTU UVOVESE VO: “Wau vo tu asumuki, ke tulendi yangidika Nzambi ko.”
Nkia mvutu okumvana?
MAMBU MASINA MA LONGI DIADI
Tuyangidikanga Mvangi eto vava tusambilanga kaka yandi, kunkembelela muna tukutakanu yo zayisa mana tulongokanga kwa akaka.
Nkia Mambu Olongokele?
Aweyi tulenda zayila e nsambila iyangidikanga Nzambi?
Ekuma tufwete sambidila kaka Yave?
Ekuma tufwete sambidila Nzambi kumosi ye awana bazolele kunyangidika?
TALA MPE OMA MALENDE
Muna lusansu “Kisambilanga Diaka Teke Ko,” zaya una nkento mosi kayambulwila sambila e teke.
“Nkand’a Nzambi Zingu kia Wantu Usobanga” (Eyingidilu dia Okutoba-Desemba, 2011)
Zaya dina dilenda kusadisa mu vana e mvutu muna tukutakanu.
“Sanisina Yave Muna Nkutakani” (Eyingidilu dia Yanuali, 2019)
Tala una toko dimosi kavuila e nluta muna tukutakanu kanele vo ke diakala diasazu ko mu kwenda muna tukutakanu.
Wantu ayingi bekwikilanga vo kuluzu i sinsu kia Kikristu, nga tufwete sadilanga kuluzu muna nsambil’eto?
“Ekuma Mbangi za Yave ke besadilanga Kuluzu ko Muna Sambila Nzambi?” (Longi dina muna jw.org)
a Tuvovela fu yayi muna malongi melanda.