E Nsambu za Yave Zikutuvwamisanga
1 Ntangwa zayingi e zingu kia kiese kitezelwanga muna nzimbu kebakanga o muntu. Muna kuma kiaki, ndonga ya wantu bebanzanga vo amvwama i bavwidi e kiese kiayingi ye zingu kiambote. Kansi kadi, ana bebanzanga vo e nzimbu zilenda sumba e kiese vuna bekuyivunanga. (Kim. 5:12) E kiese kia “awana bazolele o vwama” muna nitu ke kizinganga ko. (1 Tim. 6:9) Kansi tu, asadi a Yave bavwidi e kiese kiayingi yau i nkangu usundidi e kimvwama ova nza. (Nga. 10:22; Lus. 2:9) Mu nkia mpila?
2 E Sinsu kia Kimvwama Kieto: Tuvwidi e kimvwama kia lungalala kwa mwanda yo umbakuzi wa Nkand’a Nzambi una vo i Diambu diandi. Muna nkubik’andi ova ntoto o Yave okutulonganga oma ma yandi ye ma Mwan’andi, muna wete dieto diakwele mvu. O umbakuzi wakieleka ukutufwanisanga twafinama Yave yo kala ye ngwizani ambote yo yandi. (Yak. 4:8) Ozaya edi diambote y’edi diambi yo landanga e nsiku mia Nzambi dikututaninanga muna yaka yimbevo ya vonza. Tuna ye vuvu vo o Yave olunga-lunga e nsatu zeto, ediadi kiese yo luvuvamu lwa Nzambi dikutuvananga.—Mat. 6:33.
3 Tuna yo luvuvamu ye ngwizani y’ampangi zeto a mwanda wau vo tuyimanga e mbongo a mwand’a Nzambi. Twayikana muna kangwa kiasikila kiazola, katubembolwanga kuntu ko kwa Nzambi ngatu kwa mpangi zeto vava vebwanga sumbula.—Ngal. 6:10.
4 E zingu kieto kina yo mfunu. Tuvwidi elau diampwena dia lungananga muna salu kia samuna e nsangu zambote mu nz’amvimba. Kiese kiayingi tumonanga vava tusadisanga akaka bakala ye ngwizani ambote yo Nzambi yo sala kumosi yo yeto muna nsambila yavelela. O lusalu lweto lwantalu lwa umbangi Yave luzitisanga yo kutuyangidika muna velelesanga e nkumbu andi. Ka tudimbulanga e vuvu ko kadi tuzeye dio vo mawonso tusilang’e vuvu mesinga vangama kuna sentu.
5 Tusonga Luyangalalu Lweto: Tufwete tondanga kieleka e nsambu za Yave ezi zikutukitulanga se amvwama ova ntoto. (Nga. 22:4) Muna vavang’e ntangwa e lumbu yawonso ya badika e nsambu tuna zau dikutufila mu tonda Yave mu kuma kia nzol’andi amvevo yo kwamanana o sambila kaka yandi.