O longoka e Bibila nluta ditwasanga, kansi dilenda kala mpe diampasi. Ezak’e ntangwa olenda kukiyuvula kana vo olenda kwamanana longoka e Bibila. Ekuma dinina o mfunu mu kwamanana longoka? Nkia mambu malenda kusadisa mu kwamanana longoka kana nkutu muna ntangw’a mpasi?

1. O longoka e Bibila, ekuma dinina o mfunu?

“Diambu dia Nzambi diamoyo ye nkuma.” (Ayibere 4:12) O longoka e Bibila mfunu dina kadi dikusadisa mu bakula e ngindu za Nzambi ye una kemonanga mu kuma kiaku. Dikusadisa mpe mu vua zayi, ngangu zakieleka ye vuvu. Vana ntandu, dikusadisa mu kala nkundi a Yave. Avo olongokele Bibila, olenda kala ye zingu kiakiese.

2. Ekuma tufwete badikilanga e ludi kia Bibila vo kiamfunu?

E ludi kia Bibila kina nze lusalu lwantalu. Ekiaki i kuma Bibila kikutuvoveselanga vo ‘twasumba e ludi, ke tuteki kio ko.’ (Ngana 23:23) Vava tubadikilanga e ludi kia Bibila vo kiamfunu, tuvanganga e ngolo mu kwamanana longoka, kana nkutu vava tuwanananga ye mambu mampasi.—Tanga Ngana 2:4, 5.

3. Aweyi Yave kalenda kusadisila mu kwamanana longoka?

O Yave wa Mvangi wa Mpungu-ngolo ye Nkundi aku, ozolele kusadisa kimana wanzaya. Olenda kuvana “luzolo yo nkuma wa sala.” (Tanga Filipi 2:13.) Ezak’e ntangwa, avo kuna ye luzolo ko lwa longoka yovo sadila mana olongokanga, Yave olenda kusadisa. Avo nkuma ovuidi o mfunu mu sunda e nkakalakani yovo lubangamu, olenda wo kuvana. Ntangwa zawonso, lombanga lusadisu kwa Yave muna sambu kimana wakwamanana longoka e Bibila.—1 Tesalonika 5:17.

ZAYA DIAKA MANKAKA

4. Sianga e longi diaku dia Bibila va fulu kiantete

Ezak’e ntangwa, tukalanga ye salu yayingi ye ke tukalanga ye ntangwa yafwana ko mu longoka e Bibila. Nkia diambu dilenda kutusadisa? Tanga Filipi 1:10, i bosi, vana e mvutu za yuvu eyi:

• Nkia mambu obadikilanga vo “masundidi o mfunu” muna zingu kiaku?

• Adieyi olenda vanga mu songa vo longoka e Bibila mfunu kikilu dina kwa ngeye?

1. Avo osidi e senge muna katini, i bosi, osidi matadi, e matadi ke mefwana mo ko

2. Avo otudidi ntete matadi, okala ye fulu kiafwana mu tula e senge. Diau dimosi mpe, avo osidi “mambu masundidi o mfunu” va fulu kiantete muna zingu kiaku, olenda mo lungisa ye okala ye ntangwa yavanga mambu mankaka

O longoka e Bibila dilungisanga e nsatu zeto za zaya Nzambi yo kunsambila. Tanga Matai 5:3, i bosi, vana e mvutu za kiuvu eki:

• Nkia nluta obaka avo osidi e longi diaku dia Bibila va fulu kiantete?

5. Zindalala kana nkutu muna lubangamu

VIDEO: Luzindalalu Lwandi Lwatwasa Nluta (5:22)

• Nze una omwene muna video, aweyi akundi a Francesco ye yitu yandi bamona vava kabavovesa mana kalongokanga?

• O luzindalalu lwandi nkia nluta lwatwasa?

Tanga 2 Timoteo 2:24, 25, i bosi, vana e mvutu za yuvu eyi:

• Aweyi e yitu yaku ye akundi aku bemonanga mu kuma kia mambu olongokanga?

• Mun’owu wa sono kiaki, adieyi ofwete vanga avo muntu kayangalele ko wau vo Bibila olongokanga? Ekuma?

6. Bunda e vuvu muna lusadisu lwa Yave

VIDEO: Yave Okutusadisanga mu Vanga Nsobani Muna Zingu (3:56)

• Nze una omwene muna video, nkia nsobani mpangi Jim kavanga muna yangidika Yave?

• Nkia diambu disivikisi muna mbandu andi?

Tanga Ayibere 11:6, i bosi, vana e mvutu za yuvu eyi:

• Adieyi Yave kevanga muna wete dia awana “bekumvavanga ye ziku kiawonso,” i sia vo, awana bevanganga ngolo za kunzaya yo kunyangidika?

• Landila e sono kiaki, nga Yave oyangalelanga e ngolo ovanganga muna longoka e Bibila? Ekuma?

MAMBU MASINA MA LONGI DIADI

Kanele vo diampasi, o longoka e Bibila dilenda kusadisa mu kala ye zingu kiakiese yakwele mvu. Kwamanana bunda vuvu kwa Yave, yandi okusambula.

Nkia Mambu Olongokele?

• Ekuma e ludi kia Bibila kinina mfunu kwa ngeye?

• Aweyi olenda zayila “mambu masundidi o mfunu”?

• Ekuma ofwete lombela lusadisu kwa Yave muna kwamanana longoka e Bibila?

TALA MPE OMA MALENDE

Badika ndekwa ziyá zisadisanga wantu ayingi mu toma sadila e ntangwa.

“Como Aproveitar Bem seu Tempo” (Sikama! dia Fevelelo 2014)

Tala una Yave kasadisila nkento mosi una vo yakala diandi kabakulanga ko e ngolo kavanganga muna yangidika Nzambi.

Yave Okutuvananga Nkuma Muna Zizidila Konso Mpasi (5:05)

Tala una yakala dimosi kabakila nluta muna luzindalalu lwa nkento andi.

Yafimpulula mu Zaya e Ludi (6:30)

Ezak’e ntangwa, Mbangi za Yave bevuninuanga mambu vo makanda bevambulanga. Nga ediadi dialudi?

“Nga Mbangi za Yave Makanda Bevambulanga Yovo Ngwizani Besiamisanga?” (Longi dina muna jw.org)

Yeto awonso tuwanananga ye mambu mevavanga vo twabakila mo nzengo. E nzengo tubaka zilenda kututwasila e mfwilu yovo nluta. Zilenda mpe fwasa yovo kumika e kikundi kieto yo Yave. Vekala ye ntangwa divava vo twabaka e nzengo za sola kuna tuzingila, una tulenda vuila e nzimbu muna lungisa e nsatu zeto, kana vo sompa tusompa yovo ve. Avo tubakidi nzengo zambote, tukala ye zingu kiakiese yo yangidika Yave.

1. Aweyi olenda sadila e Bibila mu baka nzengo zambote?

Vitila wabaka e nzengo, lomba lusadisu lwa Yave muna sambu yo vava zaya dina Bibila kivovanga mu kuma kia diambu ozolele bakila nzengo. (Tanga Ngana 2:3-6.) Ezak’e ntangwa, Yave ovananga nsiku miakiá. Ozevo, olemvokela nsiku miami i nzengo zambote olenda baka.

Kansi, adieyi tuvova avo muna Bibila ke muna nsiku ko watoma kiá uvovanga dina ofwete vanga? Zaya wo vo, Yave okwamanana kufila “muna nzila ina ofwete diatila.” (Yesaya 48:17) Mu nkia mpila? Muna lusadisu lwa nkanikinu miandi miasonama muna Bibila. E nkanikinu mia Bibila i ludi kia sina kisonganga ngindu za Nzambi ye una kemonanga. Nkumbu miayingi, avo tutangidi lusansu lumosi muna Bibila, tubakula una Yave kemonanga. Avo tubakwidi una Yave kemonanga, tuzaya e nzengo tulenda baka muna kunyangidika.

2. Nkia mambu ofwete teka yindula vitila wabaka nzengo?

Bibila kivovanga vo: ‘O nlungaladi otoma kebanga konso lutambi.’ (Ngana 14:15) Ediadi disongele vo vitila wabaka e nzengo, ofwete vaula e ntangwa mu toma yindula. Diambote wakiyuvula: ‘Nkia nkanikinu wa Bibila ndenda sadila mu diambu diadi? Avo mbakidi nzengo zazi, e ngindu zame zikala zavuvama? Nga e nzengo zazi mfwilu yovo nluta zitwasa kwa akaka?’ E kiuvu kisundidi o mfunu i kiaki: ‘Nga e nzengo nzolele baka ziyangidika Yave?’—Nsiku 32:29.

Yave una yo nswa wa kutuzayisa edi diambote ye edi diambi. Avo tutomene zaya e nsiku ye nkanikinu miandi yo tatidila mio, tulonga e ntona zeto. E ntona zikutusadisa mu zaya swaswanesa edi diambote ye edi diambi. (Roma 2:14, 15) Avo tutomene longa e ntona zeto, dikutusadisa mu baka nzengo zambote.

ZAYA DIAKA MANKAKA

3. Yambula Bibila kiafila

VIDEO: Yambula vo e Nkanikinu mia Bibila Miafilanga Zingu Kiaku (5:54)

• Nki i nswa wakuyisolela?

• Ekuma Yave katuvanina nswa wakuyisolela?

• Yave nki katuvana kilenda kutusadisa mu baka nzengo zambote?

Muna zaya nona kimosi kia nkanikinu a Bibila, tanga Efeso 5:15, 16. I bosi, yika una olenda toma ‘sadila e ntangw’aku’ muna . . .

• tanganga e Bibila lumbu yawonso.

• kituka yakala, nkento, se, ngudi yovo mwan’ambote.

• kalanga muna tukutakanu.

4. Longa ntona zaku kimana zasadisa mu baka nzengo zambote

VIDEO: “Kalanga ye Ntona Zambote” (5:13)

• Nze una omwene muna video, nkia mambu o mpangi ankento kavanga mu longa e ntona zandi yo baka nzengo zayangidika Yave?

Ekuma ke tufwete lombela kwa akaka ko batubakila e nzengo? Tanga Ayibere 5:14, i bosi, vana e mvutu za yuvu eyi:

• O lomba kwa akaka batubakila e nzengo dilenda kala diambote, kansi nkia diambu konso muntu mu yeto kafwete zaya?

• Nki kilenda kusadisa mu longa ntona zaku yo baka nzengo zambote?

5. Zitisanga ntona za akaka

Wau vo yeto awonso twaswaswana, e nzengo mpe tubakanga zaswaswana. Ozevo, aweyi tulenda songela vo tuzitisanga ntona za wantu ankaka? Yambula twabadika mambu mole malende:

Diambu dia 1: Mpangi mosi ankento ozolanga kuyikusa e bote, osobele e nkutakani. Muna nkutakani yoyo mpangi zamakento betanga sakuba vava bemonanga akento bayikusidi e bote.

Tanga Roma 15:1 ye 1 Korinto 10:23, 24, i bosi, vana e mvutu za yuvu eyi:

• Landila e sono yayi, nkia nzengo mpangi a nkento ndioyo kafwete baka? Adieyi ovanga avo una yo muntu omwene vo e diambu ongeye ovangidi diambi mun’owu wa ntona zandi?

Diambu dia 2: Mpangi mosi ozeye wo vo Bibila ke kisimanga nua malavu mankolwa ko mu tezo, kansi obakidi nzengo zalembi nua. Obokelo kuna nkinzi yo mona vo mpangi zankaka mu nua bena malavu mankolwa.

Tanga Kimpovi 7:16 ye Roma 14:1, 10, i bosi, vana e mvutu za yuvu eyi:

• Landila e sono yayi, nkia nzengo mpangi a ayakala ndioyo kafwete baka? Adieyi ovanga avo omwene muntu ovanganga diambu dina kuvanganga ko mu kuma kia ntona zaku?

Adieyi ofwete vanga muna baka nzengo zambote?

1. Samba kwa Yave kimana kasadisa mu zaya dina ofwete vanga.—Yakobo 1:5.

2. Vavulula muna Bibila ye muna nkanda mieto mu zaya nkanikinu ofwete sadila. Olenda mpe mokena ye mpangi zazikuka.

3. Yindula una ukala e ntona zaku ye ntona z’akaka mu kuma kia nzengo zina ozolele baka.

MAMBU MASINA MA LONGI DIADI

Muna baka nzengo zambote, tufwete zaya ngindu za Yave mu kuma kia diambu tuzolele bakila e nzengo ye dina zilenda vanga kwa akaka.

Nkia Mambu Olongokele?

• Aweyi olenda bakila nzengo ziyangidika Yave?

• Aweyi olenda longela ntona zaku?

• Aweyi olenda songela vo ozitisanga ntona za wantu ankaka?

TALA MPE OMA MALENDE

Aweyi olenda bakila nzengo zisiamisa kikundi kiaku yo Nzambi?

“Bak’e Nzengo Ziyangidika Nzambi” (Eyingidilu dia 15 dia Abidi, 2011)

Tala mpila zankaka Yave kekutuvaninanga luludiku.

Yave Ofilanga Nkangu Andi (9:50)

Tala dina diasadisa muntu mosi mu baka nzengo zampasi.

Osadila Yave Nluta Kaka Ditwasanga (5:46)

Adieyi ofwete vanga avo muna Bibila ke muna nsiku watoma kiá ko muna diambu ozolele bakila e nzengo?

“Precisa Sempre Duma Ordem Bíblica?” (Eyingidilu dia 1 dia Desemba, 2003)