Malongi Mevananga e Vuvu
O Nzambi wasia nsilu vo ke kolo ko nsobani zampwena kevanga. Osukisa e mpasi yo tomesa e zingu kia kanda dia wantu ova nza. (Nkunga 37:11) Ekuma tufwete kwikidila mu nsilu wau? E kuma kadi “o Nzambi kena nga muntu ko kavuna.” (Ntalu 23:19) Tala maka mambu mambote kesinga vanga o Mvangi eto.
Nzambi Ofwasa Wantu Ambi
“Avo yimpumbulu imenene nze titi, ye mimpanga mambi awonso basakumukini, i befwasilwa yakwele mvu.”—NKUNGA 92:7.
Nze una tulongokele muna longi divitidi, e mambu mambi mu wokela kaka mena. Ediadi ke difwete kutusivikisa ko. Vana ntandu, diateka sakulwa muna 2 Timoteo 3:1-5 vo muna “lumbu yambaninu” o wantu besakisa ovanga mambu mambi. Lumbu yambaninu, mbaninu ya nki? Mbaninu a nza yayi, i sia vo, mbaninu a wantu ana ke belemvokelanga Nzambi ko. Ke kolo ko, Nzambi ofwasa awana ke bazolele yambula mavangu mau mambi ko. I bosi, wantu ambote kaka, i sia vo, awana belemvokelanga Nzambi, yau bezingila ova nza. “Ansongi bevua nza, bezingila vo yakwele mvu.”—Nkunga 37:29.
Nzambi Ofwasa Satana
“Nzambi ona ovananga luvuvamu okosomona Satana.”—ROMA 16:20.
Vava wantu awonso ambi befwaswa, kumosi yo Satana ye nkuya, o luvuvamu lukala ova nza yakwele mvu. Mvangi eto osianga nsilu vo: ‘Ke vekala muntu ko okumwesa wonga.’—Mika 4:4.
Nzambi Ofokola Mayela yo Lufwa
“E saba kia Nzambi kina yo wantu, . . . Okunguna mansanga mawonso muna meso mau, o lufwa ke lukala diaka ko, ngatu kala diaka dilu, yovo kazu ngatu mpasi.”—LUSENGOMONO 21:3, 4.
E mpasi yo mayela mefokoka, kadi Nzambi osukisa mfwilu miawonso miatwasa Satana, Adami, Eva ye usumuki weto. Muna kuma kiaki, “o lufwa ke lukala diaka ko.” O wantu ana bezolanga yo lemvokela Mvangi bezinga yakwele mvu. Kansi, akweyi bezingila?
Mvangi eto Okitula Ntoto se Paradiso
“O makanga ye nsi ayuma iyangalala, o nzanza umona e kiese yo mena e mvuma nze safoni.”—YESAYA 35:1.
Vava Nzambi kefwasa wantu ambi, o ntoto ukituka se paradiso. Mu kala ye nzanza ye mpatu zambote-mbote ye ulolo wa madia. (Nkunga 72:16) E mbu, mayanga ye nkoko miavelela mikala ye mizala ye mbizi za maza. O mvovo “safula e kalu kia wantu” ke tuwá wo diaka ko. O wantu betunga e nzo zau yo zingila mo. Ke mukala diaka muntu ko wakondwa e nzo, fwa nzala ngatu sukama.—Yesaya 65:21, 22.
Nzambi Ofutumuna Mafwa
“Vekala yo lufuluku.”—MAVANGU 24:15.
Nga ozolele monana diaka ye yitu ye akundi aku ana bafwa? O Nzambi a Mpungu-ngolo okubafutumuna muna Paradiso ova ntoto. Ongeye okubazayidila, oyau mpe bekuzayidila. Yindula e kiese nukala kiau! Ekuma tulenda kadila ye ziku vo o nsilu wau lungana ulungana? Kadi e Bibila kivovelanga wantu ana bavutuka zinga, ambuta ye aleke ye bavutuka zinga ye yitu yau. Vana ntandu, o Yesu nkumbu miayingi va ntadisi a wantu ayingi kafutumunuina mafwa.—Luka 8:49-56; Yoane 11:11-14, 38-44.