1-2. Adieyi mbasi kavovese kwa akento ana bele kuna ziami kia Yesu? Adieyi yandi kibeni Yesu kabakanikini?

YINDULA vo mu mene-mene kia 16 kia ngonde a Nisani ya mvu wa 33 wa T.K. twina. Akaka muna akento bevuminanga Nzambi, bakendalele yo kwenda kuna ziami. Se lumbu yole iviokele kala tuka o Mfumu Yesu Kristu kazikwa. Ekolo bekwendanga kuna ziami ye kani dia kusa lekwa yansunga ye mazi mansunga muna vimbu dia Yesu, basivikidi kikilu wau bamwene vo e ziami kiaziuka kina. O mbasi ovovese akento vo Yesu ofulukidi, okudikidi vo: “Vita kekunuvita kuna Ngalili. Kuna nukumwena.”—Mat. 28:1-7; Luka 23:56; 24:10.

⁴ Yesu wazola vo alandi andi awonso basamuna e nsangu zambote. Ke kwa ntumwa 11 za kwikizi kaka ko kavana e nkanikinu wau. Aweyi tuzayidi wo? Vava Yesu kavana nkanikinu wa kitula wantu se alongoki, nga antumwa kaka bakala vana mongo wowo kuna Ngalili? Sungamena vo mbasi wavovesa akento vo: “Kuna [Ngalili] nukumwena.” Muna kuma kiaki, akento awaya akwa kwikizi bakala mpe muna lukutakanu lwalu. Kansi ke yau kaka ko bakala mo. Paulu wa ntumwa wavova vo Yesu “wamoneka kw’ampangi vioka 500 mu nkumbu mosi.” (1 Kor. 15:6) Akweyi balunganena?