Malongi ma Yesu Adieyi Mevanganga kwa Ngeye?

MUNA mana tuwidi mun’elongi diviokele, nga ke dia ludi ko vo malongi ma Yesu mazayakene mu nza yawonso? E kiuvu kiamfunu kafwete kiyuvula konso muntu i kiaki: “Malongi ma Yesu adieyi mevanganga kwa mono?”

Malongi ma Yesu meyikanga mambu ma mpila zawonso za zingu. Malongi mama malenda kusadisa muna zingu kiaku. Yambula twabadika mana kalonga o Yesu mu kuma kia zaya mambu mafwete siwa va fulu kiantete, vanga e kikundi yo Nzambi, kala ye ngwizani ambote y’akaka, singika e mambu yo venga mavangu ma umpumbulu.

Zaya Mana Mafwete Siwa va Fulu Kiantete

O unu mambu mayingi ova nza mefwasanga e ntangwa ye ngolo zeto. Nkumbu miayingi e mambu ma mwanda mevilakanwanga. Yindula dina diabwa kw’e toko dimosi una ye kimbuta kia mvu 20, nkumbu andi Jerry. Kanele vo wayangalelanga mambu ma mwanda ye fu yambote kalongwa, Jerry wavova vo: “Kikalanga ye ntangwa ya kuyivana mu mambu ma mwanda ko. Lumbu sambanu isalanga konso lumingu. Kia lumingu kaka ivundanga. Vava imanisanga e salu kina mfwete sala, mabibi mayingi ikalanga mau.” Ediadi avo dikubwilanga, malongi ma Yesu vana Mongo malenda kusadisa.

O Yesu wavova kwa nkangu wakutakana muna wá malongi mandi vo: “Ke nutelamenw’e ntima muna diambu dia moyo eno ko, kana nki nudia, kana nki nunua; ngatu muna to yeno, kana nki nuvwata. Ng’o moyo, ke usundidi o dia ko, ye to mpe o mvwatu e? Nutadila nuni z’ezulu, ke zikuna ko, ovo sâla, ngatu sia muna malundilu; o S’eno kun’ezulu odikilanga zo. Anki, se ke nubasundidi beni o mfunu ko e? . . . Dianu vo, ke nutelamw’e mioyo ko, nwavova vo, nki tudia? ovo, nki tunua? ovo, nkia mpwata tuvwata? Kadi e lekwa yiyi itombwanga kwa zula; o S’eno wina kun’ezulu, ozeye wo vo lekwa yayi yawonsono nuvwidi yo o mfunu. Kansi nutombel’ekulu e kintinu kiandi, ye ndungidi andi: ozevo e lekwa yayi yawonso ikunukudikilwa.” (Matai 6:​25-​33) Adieyi tulongokele mu mvovo miami?

O Yesu kavova ko vo twalembi lunga-lunganga e nsatu zeto za nitu ye za esi nzo zeto. Kadi o Nkand’a Nzambi uvovanga vo: “Ovo vena y’on’olembi yundul’akw’andi, musungul’awana bena muna nzo andi, ovakwidi o lukwikilu o nkalu, oviokele mundembi-kwikil’o bi.” (1 Timoteo 5:⁠8) Kansi, o Yesu wasia nsilu vo avo tusidi mambu ma mwanda va fulu kiantete, o Nzambi olungisa e nsatu zeto zakaka. E diambu tulongokele i diadi: Tuzayanga mana tufwete sia va fulu kiantete. O landa elongi diadi dikututwasila kiese. Muna Nkand’a Nzambi tutanganga vo: “Akwa nsambu asukami muna mwanda: kadi kiau e kintinu ki’ezulu.” ​—⁠Matai 5:⁠3.

Vanga Kikundi yo Nzambi

Asukami muna mwanda bafwete zayanga o mfunu wa vanga e kikundi yo Nzambi. Aweyi tuvangilanga kikundi yo muntu? Nga ke tuvavanga teka toma zaya muntu ndiona ko? Tufwete baka e ntangwa mu longoka e fu yandi, ngindu, ngangu, mana kezolanga ye mana ke zolanga ko. Diau adimosi mpe tufwete vanga muna kala ye kikundi yo Nzambi. Zayi wa ludi uvwilu o mfunu. Vava o Yesu kasamba kwa Nzambi mu kuma kia alongoki andi, wavova vo: “I wau wuwu o moyo a mvu ya mvu, bazaya ngeye vo i Nzambi aludi, yo Yesu Kristu mpe ona watuma.” (Yoane 17:⁠3) Elo, muna vanga kikundi yo Nzambi tufwete kunzaya. E nto a zayi wau i Nkand’a Nzambi. (2 Timoteo 3:​16) Tufwete vaulanga e ntangwa ya longoka o Nkand’a Nzambi.

Kansi, diambu diakaka mpe divavwanga, ke zayi kaka ko. Muna sambu kiakina, Yesu wavova diaka vo: “E diambu diaku balundidi dio.” (Yoane 17:⁠6) Ke tufwete kala kaka yo zayi ko, kansi tufwete zingilanga mpe ngwizani yo zayi wau. Ediadi diamfunu kikilu muna kituka se nkundi a Nzambi. Nga tulenda kala nkundi a muntu kele vo tuvanganga mana ke zolanga ko? E ngindu ye nkanikinu mia Nzambi mifwete filanga e zingu kieto kiawonso. Yambula twabadika nkanikinu miole mia Nzambi milenda kutusadisa mu kala ye ngwizani yo wantu akaka.

Kala ye Ngwizani Ambote y’Akaka

Lumbu kimosi, Yesu wa tá kingana muna longa diambu diamfunu disadisanga mu kala ye ngwizani ambote y’akaka. Wayika mfumu mosi wazola o ta mbalu ye ntaudi zandi. O mosi muna antaudi mfuka ayingi kakala yau ina kalenda futa ko. O mfumu ovovele vo katekwa kumosi yo nkento yo wana. O ntaudi wafukama yo dodokela vo: “E mfumu, unkulwil’o moyo, ikufuta yawonso.” O mfumu wamfwil’e nkenda yo kunyambulwila e mfuka. Kansi e ntaudi ndioyo wavaika yo kwenda kwa ntaudi ankw’andi wandia e mfuk’akete yo kumfutisa yo. Kana una vo o nkw’andi wandodokela, o ntaudi ndioyo wansia muna pelezo yavana kefuta e mfuka. Vava o mfumu kawá wo, wafunga kikilu makasi. Wanyuvula vo: “Ng’ongeye mpe ke nkend’ofwete fwa ntaudi yankw’aku ko, waun’omono ifwididi nkend’e?” O mfumu wasia e ntaudi ambi ndiona muna pelezo yavana kefuta e mfuka yawonso. Muna vana elongi dia kingana kiaki, Yesu wavova vo: “Wauna mpe o S’ame una kun’ezulu kevanga kwa yeno, ovo nulembi yambulwila konso muntu yo mpangi andi, ye nsi a ntima mieno.”​—⁠Matai 18:​23-35.

Wau vo tu wantu alembi lunga, masumu mayingi tuna mau. Ke tulenda futa e mfuka tuna yau kwa Nzambi ko, muna kuma kia mbi yawonso tukumvanganga. Yeto awonso luloloko lwandi tuvavanga. Yave wa Nzambi okala ye nzaki za loloka masumu meto mawonso, avo yeto mpe tulolokele e mbi bekutuvanganga ampangi zeto. Elongi diadi diamfunu kikilu kwa yeto! Yesu walonga alongoki andi basambanga vo: “Utuyambulwila mfuka zeto, e ngyambwila tuyambulwidi ana tuvwidi mfuka.” ​—⁠Matai 6:⁠12.

Zaya Etuku dia Diambu

Yesu watoma bakulanga e mambu ma wantu. Wasingikanga etuku dia mambu muna malongi kavananga. Badika nona yole yilende.

Yesu wavova vo: “Nwawidi wo wavovwa kuna kw’akulu vo, ke nuvondi ko; konso on’ovonda, onete mfundu: Kansi omono inusamunwini vo, konso on’omwene mbunzi andi makasi, onete mfundu.” (Matai 5:​21, 22) O vava, Yesu wasonga vo etuku dia diambu difilanga muntu muna vonda ke nsoki kaka ko, kansi i ngindu zambi zikalanga muna ntim’a mvondi. Avo wantu bavengele e fu kia land’e kunda yovo kia funga makasi, mavangu ma nsoki mefokoka. Kele vo malongi mama masadilwanga, menga mayingi ke madi bunguka ko.

Tala e mpila o Yesu kasongela etuku diakaka dia diambu ditwasanga mpasi zayingi kwa wantu. Wavovesa o nkangu vo: “Nwawidi wo wavovwa vo, ke nute zumba ko: kansi omono inusamunwini vo, konso on’otungununa nkento, kanlengokelw’o moyo, zumba kia nsi a ntima katele yandi. E disu diaku dialunene ovo dikuteses’esakuba, dunguna dio, waveta dio.” (Matai 5:​27-​29) Yesu walonga vo e diambu ke dina kaka muna zumba ko, kansi mu makani ma zumba. Avo muntu kazolele sunda makani mama mambi ko yo “dunguna mo” muna ntima, olenda sundwa kwa vangu dia zumba.

“Vutula Nsosolo Vana Fulu Kiandi”

Muna fuku una o Yesu kayekolwa yo kangwa, nlongoki andi mosi wabonga nsosolo mu kuntanina. Yesu wamvovesa vo: “Vutula nsosolo vana fulu kiandi: kadi awonso bebonga nsosolo, muna nsosolo befwila.” (Matai 26:​52) Muna mene walanda, Yesu wavovesa Pontio Pilatu vo: “E kintinu kiame ke kia nza yayi ko: e kintinu kiame, kala vo kia nza yayi, o makesa mame nga nwana madi nwana, kiayekolwa kwa Ayuda: kansi owau, e kintinu kiame ke kia kwaku ko.” (Yoane 18:​36) Nga elongi diadi dia uzowa?

Akristu a tandu kiantete aweyi babadikilanga elongi dia Yesu dia lembi nwana? O nkanda A Atitude dos Primeiros Cristãos para com a Guerra (Una Akristu a tandu kiantete babadikilanga e vita) uvovanga vo: Wau kina vo malongi ma Yesu ke matondanga konso vangu dia umpumbulu ko dilenda mwesa akaka e mpasi, ke matondanga mpe nwana vita ko. . . . Akristu a tandu kiantete balemvokela mana kavova o Yesu yo bakula vo bafwete kala alembami yo venga umpumbulu. Bazaya wo vo e nsambil’au ifwete kala ya luvuvamu; bamenganga o nwana e vita yo bungula menga.” Ekwe nswaswani yadi kala ova nza kele vo awonso bekuyibadikilanga vo Akristu balanda malongi mama!

Malongi ma Yesu Malenda Kusadisa

Malongi ma Yesu mana tubadikidi mambote kikilu, ke mabala ko ye ma nkuma. O wantu balenda baka nluta muna zaya yo sadila malongi mama.a

Ambangi za Yave muna zunga kiaku bekala ye kiese kia kusadisa mu zaya mpila olenda bakila nluta mu malongi mamfunu ma Yesu. Tuwondelele wamokena yau yovo kubasonekena, sadila e nzila ina muna lukaya lwa 2 lwa finkanda-nkanda fiafi.

[Mvovo Vana Yand’a lukaya]

[Foto ina muna lukaya lwa 5]

“O S’eno kun’ezulu odikilanga zo”

[Foto ina muna lukaya lwa 7]

Malongi ma Yesu malenda kusadisa muna zingu kiaku