LONGI DIA 45
Aweyi Tulenda Sadisila Akaka Balemvokela Nkanikinu mia Kristu?
“Dianu vo, nuenda, nuakitula wantu . . . se alongoki, . . . nubalonga balunda o mambu mawonso inukanikini.”—MAT. 28:19, 20.
NKUNGA WA 89 Wá, Tumama, Wasambulwa
MANA TULONGOKAa
1. Landila e sono kia Matai 28:18-20, nkia nkanikinu kavana o Yesu?
VAVA Yesu kafulwa muna mafwa, wamoneka kwa alongoki andi ana balungana kuna Ngalili. Diambu diamfunu kikilu kazola kubazayisa. Nkia diambu? Dina diasonama muna Matai 28:18-20.—Tanga.
2. Nkia yuvu tufimpa mu longi diadi?
2 O nkanikinu wa kitula wantu se alongoki kwa selo yawonso ya Nzambi wavewa. Owau, yambula twafimpa yuvu tatu mu kuma kia salu katuvana o Yesu. Kiantete, vana ntandu a longa nkanikinu mia Nzambi kwa alongoki, adieyi diaka tufwete vanga? Kiazole, aweyi ateleki awonso muna nkutakani balenda sadisila alongoki a Bibila mu nungunuka muna mwanda? Kiatatu, aweyi tulenda sadisila mpangi zeto ana bayoya muna mwanda bavutukila e salu kia kitula wantu se alongoki?
TULONGA ALONGOKI BALEMVOKELA NKANIKINU MIA KRISTU
3. Nkia nkanikinu wasikididi kavana o Yesu?
3 Yesu nkanikinu miatoma kiá kavana. Wavova vo tufwete longa o wantu mambu mawonso katukanikina. Kansi, vena ye diambu diamfunu ke tufwete vilakana ko. Yesu kavova ko vo: ‘Nubalonga mambu mawonso inukanikini.’ Kansi edi kavova vo: Nubalonga “balunda o mambu mawonso inukanikini.” Muna lemvokela o nkanikinu wasikididi kavana o Yesu, divavanga vo twalonga alongoki eto a Bibila dina bafwete vanga yo kubasasila una bafwete dio vangila. (Mav. 8:31) Ekuma tufwete wo vangila?
4. O lunda o nkanikinu, aweyi disongele? Yika e nona.
4 O ‘lunda’ o nkanikinu, disongele vo lemvokela wo. Muna kutusadisa twazaya una tulenda longela o muntu kalunda yovo lemvokela e nkanikinu mia Kristu, yambula twafimpa e nona kilende: Nlongi mosi olonganga alongoki andi una balenda lundila e nsiku mia diatisila e kalu. Entete, o nlongi olonganga alongoki andi e nsiku mia diatisila e kalu muna kalasi. Kansi, muna kubalonga una balenda lemvokela e nsiku miami, diambu diankaka kafwete vanga. Kafwete kota muna kalu ye alongoki andi yo kubafila ekolo bediatisanga e kalu yo sadila mana balongokele muna kalasi. Adieyi tulenda longoka muna nona kiaki?
5. (a) Mun’owu wa sono kia Yoane 14:15 ye 1 Yoane 2:3, nkia diambu tufwete longa o nlongoki eto kavanga? (b) Aweyi olenda sadisila nlongoki aku kasadila mana kelongokanga?
5 Vava tulongokanga e Bibila yo muntu, tukunlonganga mana Nzambi kevavanga kwa yeto. Kansi, vena ye mambu mankaka tufwete vanga. Tufwete longa o nlongoki eto a Bibila kasadilanga mana kelongokanga muna zingu kiandi kia lumbu ke lumbu. (Tanga Yoane 14:15; 1 Yoane 2:3.) Muna mbandu eto, tulenda songa kwa nlongoki eto una kalenda sadila e nkanikinu mia Bibila kuna sikola, kuna salu ye ekolo kesakananga. Tulenda kunzayisa diambu dimosi diatubwila muna zingu kieto muna kunsadisa kazaya una o lemvokela e nkanikinu mia Bibila diatutanina muna vonza yovo una diatusadisila mu baka e nzengo zambote. Ekolo tuna kumosi yo nlongoki, tulenda samba kimana o mwand’avelela a Yave wamfila.—Yoa. 16:13.
6. Adieyi diaka divavuanga muna longa o nlongoki eto kalunda e nkanikinu mia Yesu?
6 Adieyi diaka divavuanga muna longa o nlongoki eto kalunda e nkanikinu mia Yesu? Divavanga vo twasadisa o nlongoki eto kayima e tima dia samuna e nsangu zambote. Kadi alongoki ankaka wonga bemonanga muna samuna e nsangu zambote. Muna kuma kiaki, tufwete songanga luzindalalu yo sadisa o nlongoki katoma bakula e ludi kia Bibila kimana kiakumika o lukwikilu lwandi. Vava e ludi kisimba o ntim’andi, ediadi dikumfila mu yantika o samuna e nsangu zambote. Ozevo, adieyi tulenda vanga muna sadisa o nlongoki kakala ye tima dia samuna e nsangu zambote?
7. Aweyi tulenda sadisila o nlongoki kayima e tima dia samuna e nsangu zambote?
7 Tulenda yuvula o nlongoki a Bibila e yuvu nze eyi: “Aweyi e zingu kiaku kisobele tuka wayantikidi sadila mana olongokanga muna Bibila? Adieyi obenze, nga e nsangu zazi mfunu mpe zina kwa wantu ankaka? Adieyi olenda vanga muna kubasadisa?” (Nga. 3:27; Mat. 9:37, 38) I bosi, songa kwa nlongoki e yinkanda-nkanda ina muna Salanganu yeto Yalongela yo yambula vo kasola ina ilenda tunta e sungididi kia yitu yandi, akundi yovo akwandi a salu. Umvana yinkanda-nkanda yayingi muna yawonso kesola. Nuvanga e nsongesela muna kunlonga una kalenda kayila e yinkanda-nkanda kwa akaka. Kieleka, vava nlongoki aku kekituka se nteleki alembi vubwa, ofwete sala yandi kumosi muna salu kia umbangi muna kunsadisa.—Kim. 4:9, 10; Luka 6:40.
AWEYI E NKUTAKANI ILENDA SADISILA ALONGOKI A BIBILA BANUNGUNUKA?
8. Ekuma dinina diamfunu vo nlongoki eto kawokesa o zola kwandi muna Nzambi ye muna wantu? (Tala mpe e babu “Mana Olenda Vanga Muna Sadisa Nlongoki Katoma Zola Nzambi.”)
8 Sungamena dio vo Yesu watukanikina vo twalonga akaka “balunda o mambu mawonso” kakanikina. Muna vanga wo divavanga vo twalemvokela e nkanikinu miole misundidi, i sia vo, zola Nzambi yo zola wantu. (Mat. 22:37-39) Avo tusadisi o nlongoki a Bibila kalemvokela e nkanikinu miami, tukunsadisa mpe mu samuna e nsangu zambote. Mu nkia mpila? O zola muna Nzambi ye muna wantu, kukunsadisa mu sunda o wonga wa samuna e nsangu zambote. Dialudi vo e ngindu za samuna e nsangu zambote zilenda mwesa nlongoki o wonga. Kansi, tulenda kunkasakesa vo muna lusadisu lwa Yave malembe-malembe osunda o wonga wau. (Nku. 18:1-3; Nga. 29:25) E babu kina muna lukaya lwa yá, kiyikanga o mambu tulenda vanga muna sadisa nlongoki kawokesa o zola kwandi muna Nzambi. Vana ntandu, adieyi ampangi muna nkutakani balenda vanga muna sadisa nlongoki mu wokesa o zola kwandi muna Yave ye muna wantu?
9. Mu nkia mpila o nlongoki kelongokela mambu mamfunu ekolo kediatisanga e kalu kumosi yo nlongi andi?
9 Yindula diaka e nona kia nlongoki olongokanga diatisa e kalu. Ekolo kediatisanga e kalu kumosi yo nlongi andi vana ndambu, mu nkia mpila o nlongoki kelongokela? Muna winikinanga o nlongi andi ye muna toma tala adiatisi akaka a makalu. Muna bonga e nona, o nlongi olenda kunsonga o nati a kalu mosi wa nkwa ngemba ona osisanga e nzila kwa nkwandi kimana kavioka. Yovo o nlongi olenda mpe songa kwa nlongoki o nati a kalu wankaka ona okulwidi e minda mia kalu diandi kimana kalembi kakidila e mbweno ya anati a makalu bekwizanga ku sambu diankaka. E nona yayi ina se mbandu ambote kwa nlongoki ekolo kediatisanga e kalu.
10. Adieyi dilenda sadisa o nlongoki a Bibila kanungunuka muna mwanda?
10 Diau dimosi mpe, o nlongoki a Bibila ona oyantikidi sadila Yave, ke longoka kaka ko muna mbandu ambote a nlongi andi, kansi mpe muna mbandu ambote ya mpangi zankaka muna nkutakani. Ozevo, nkia diambu kikilu disadisa o nlongoki a Bibila kanungunuka muna mwanda? I kwendanga muna tukutakanu. Ekuma? Kadi e malongi ma Bibila tulongwanga muna tukutakanu mewokesa o zayi wandi, kumika o lukwikilu lwandi yo kunsadisa mu wokesa o zola kwandi muna Nzambi. (Mav. 15:30-32) Kuna diak’e sambu, muna tukutakanu o nlongi olenda sunzula o nlongoki andi kwa ampangi muna nkutakani ana benuananga ye mambu nze yandi. O nlongoki okala ye lau dia mona e mbandu ambote ya mpangi ana besonganga o zola muna nkutakani.
11. Adieyi kalenda mona o nlongoki muna nkutakani? E nona yayi, adieyi ilenda vanga muna zingu kiandi?
11 Yindula e nona ilende. E nona kiantete kia nlongoki a Bibila una vo ngudi osansanga o wana yandi mosi. Muna nkutakani, omwene mpangi ankento onuananga ye diambu diau dimosi. E diambu disimbidi o ntim’a nlongoki, i mona e ngolo kevanganga o mpangi ankento ndioyo muna kwenda mu tukutakanu kumosi ye wan’andi akete. E nona kiazole kia nlongoki onuananga ye fu kia nua fomo. Muna nkutakani, omwene mpangi mosi ona wanuananga ye fu kiau kimosi, kansi walenda sunda e fu kiaki. O mpangi ndioyo ozayisi kwa nlongoki una o zola kwandi muna Yave kwansadisila mu lemvokela e nkanikinu mia Nzambi. (2 Kor. 7:1; Fili. 4:13) Vava o mpangi kazayisi kwa nlongoki una kayambulwila nua e fomo, umvovese vo: “Ongeye mpe olenda kwaku yambula nua e fomo.” I bosi, o nlongoki okasakeso yo kwikila vo olenda wo vanga. E nona kiatatu kia nlongoki a Bibila una vo dumbelele. Muna nkutakani, omwene dumbelele ona otoma yangalelanga e zingu kiandi wau vo Mbangi a Yave kena. Vava o nlongoki kamwene e kiese kia dumbelele kiaki, obakidi e nzengo za vava zaya e kuma kekadilanga mu kiese.
12. Ekuma tulenda vovela vo konso muntu muna nkutakani olenda vanga diambu muna sadisa o nlongoki a Bibila?
12 Vava nlongoki a Bibila kezaya mpangi zayingi zisonganga e kwikizi, o nlongoki olongoka una kalenda lemvokela o nkanikinu a Kristu wa zola Nzambi ye wantu. (Yoa. 13:35; 1 Tim. 4:12) Nze una tumwene kala, o nlongoki a Bibila olenda longoka diambu muna mbandu ya ampangi ana benuananga ye mambu nze mana o nlongoki kenuananga mau. Muna mbandu au, o nlongoki a Bibila olongoka vo olenda kwandi vanga e nsobani muna kituka se nlandi a Kristu. (Nsi. 30:11) Konso mpangi muna nkutakani olenda vanga mayingi muna sadisa o nlongoki a Bibila kanungunuka muna mwanda. (Mat. 5:16) Muna kuma kiaki, ukiyuvula: ‘Nkia diambu ivanganga muna kasakesa alongoki ana bekwizanga mu tukutakanu?’
TUSADISA AWANA BAYOYA BAVUTUKILA SAMUNA E NSANGU ZAMBOTE
13-14. Aweyi Yesu kasadisila alongoki andi muna kolo kina bakala bayoya?
13 Tuzolele sadisa e mpangi zeto ana bayoya muna mwanda mu vutukila e salu kia samuna e nsangu zambote yo kitula o wantu se alongoki. E mpila ina Yesu kasadisila e ntumwa zandi ana bayoya, ilenda mpe kutusonga una tulenda sadisila awana bayoya muna mwanda.
14 Vitila Yesu kavondwa, e ntumwa zandi ‘zawonso bansisa yo tina kwau.’ (Maku 14:50; Yoa. 16:32) Aweyi Yesu kasadisila alongoki andi muna kolo kina bakala bayoya? Ke vavioka kolo ko vava Yesu kafuluka, wavovesa akaka muna alandi andi vo: “Ke numoni wonga ko! Nuenda zayisa mpangi zame [vo mfulukidi].” (Mat. 28:10a) Kieleka, Yesu kabembola ntumwa zandi ko. Kana una vo oyau bambembola, kansi wakwamanana kubayikila vo “mpangi zame.” Nze Yave, Yesu wabasonga mpe e nkenda yo kubaloloka.—2 Nti. 13:23.
15. Aweyi omonanga mu kuma kia awana bayambula samuna e nsangu zambote?
15 Oyeto mpe tufwete tokanenanga kikilu e wete dia awana bayambula samuna e nsangu zambote. Oyau bakinu mpangi zeto. Zola tutoma kubazolanga. Twakinu sungamena mawonso bavanga muna salu kia Yave. Akaka muna yau mu mvu miayingi basadila Yave vitila bayoya muna mwanda. (Ayib. 6:10) Viangi kikilu tukubamwenanga. (Luka 15:4-7) Nze Yesu, aweyi tulenda songela vo tutokanenanga e wete diau?
16. Aweyi tulenda songela vo tutokanenanga e wete dia mpangi zeto ana bayoya muna mwanda?
16 Kuna ngemba zawonso, ubabokela beza mu tukutakanu. Imosi muna mpila Yesu kakasakesela e ntumwa zandi ana bayoya i kubabokelesa mu lukutakanu. (Mat. 28:10b; 1 Kor. 15:6) Diau dimosi mpe o unu, tulenda kasakesa e mpangi zeto ana bayoya muna mwanda bendanga mu tukutakanu avo ke bekwendanga diaka ko. Tuzeye wo vo nanga divava vo twababokelesa nkumbu miayingi vitila batambulwila. Yesu kakala ye lukatikisu ko vo alongoki andi betambulwila e mboka andi.—Tezanesa ye Matai 28:16 ye Luka 15:6.
17. Adieyi tuvanga avo tumwene mpangi ona wayoya muna mwanda wizidi mu lukutakanu?
17 Toma kubatambulanga muna tukutakanu. Yesu watoma tambula alongoki andi vava kawanana yau. Wavit’o ntu muna mokena yau. (Mat. 28:18) Adieyi tuvanga avo tumwene mpangi ona wayoya muna mwanda wizidi mu lukutakanu? Tufwete vitang’o ntu muna kumvana e ngiz’ambote. Nanga kuna lubantiku tulenda tokana wau vo ke tuzeye dina tuvova ko. Kansi, muna lembi kumfusulwisa e nsoni, tulenda kunzayisa vo: “Ngiangalele muna kumona.”
18. Aweyi tulenda kasakesela ampangi ana bayoya muna mwanda?
18 Ubakasakesa. Nanga alongoki a Yesu bayimwena vo ke belenda samuna e nsangu zambote ko mu nza yawonso. Kansi, Yesu wakasakesa alandi andi vava kavova vo: “Ngina yeno e lumbu yawonso.” (Mat. 28:20) Nga e mvovo miami miasadisa alongoki? Ingeta. Ke vavioka kolo ko, alongoki bakivana emvimba muna salu kia ‘longa yo samuna e nsangu zambote.’ (Mav. 5:42) Ampangi ana bayoya muna mwanda lukasakeso mpe bevuanga o mfunu. Nanga wonga bemonanga muna vutukila e salu kia samuna e nsangu zambote. Tulenda kubakasakesa muna kubazayisa vo ke besala e salu kiaki yau mosi ko. Avo bakubamene, tulenda vaika yau kumosi muna salu kia samuna e nsangu zambote. Ke lukatikisu ko vo beyangalela o lusadisu tukubavana muna vutukila diaka e salu kia samuna e nsangu zambote. Avo tubabadikidi vo mpangi zeto, tumona e nluta ditwasa kwa yau ye kwa nkutakani.
TUZOLELE FOKOLA E SALU KINA YESU KATUVANA
19. Nkia kani tuna diau? Ekuma?
19 Yamu nkia kolo tukwamanana samuna e nsangu zambote yo kitula wantu se alongoki? Yakuna mbaninu a tandu kiaki. (Mat. 28:20) Nga se twalenda samuna e nsangu zambote yo kitula wantu se alongoki yakuna mbaninu a tandu kiaki? Ingeta, kadi ediadi i kani dieto. Ye kiese kiawonso tusadilanga e ntangwa, ngolo ye nzimbu zeto muna solola awana bena “kikilu ye luzolo lwa vua moyo a mvu ya mvu.” (Mav. 13:48) Vava tuvanganga wo, mbandu a Yesu tulandanga. Wavova vo: “O madia mame i vanga luzolo lwa ndiona wantuma, yamanisa mpe salu kiandi.” (Yoa. 4:34; 17:4) Oyeto mpe kani diau dimosi tuna diau. Tuzolele fokola e salu kina Yesu katuvana. (Yoa. 20:21) Kieleka, tuzolele mpe vo akaka kumosi ye awana bayoya muna mwanda, bazizidila muna salu kiaki kumosi yo yeto.—Mat. 24:13.
20. Mun’owu wa Filipi 4:13, aweyi tulenda lungisila e salu kina Yesu katukanikina vo twasala?
20 Kieleka, ke diasazu ko muna lemvokela e nkanikinu katuvana Yesu. Kansi, ke tuna yeto mosi ko muna salu kiaki. Yesu wasia nsilu vo okala yeto. Vava tukitulanga o wantu se alongoki, tusalanga “kumosi yo Nzambi” ye “kumosi yo Kristu.” Muna kuma kiaki, Yave yo Yesu bekutusadisanga mu sala e salu kiaki. (1 Kor. 3:9; 2 Kor. 2:17) Ozevo, tulenda fokola e salu kiaki. Ekwe lau ye kiese tuna kiau muna kiyekwa kiaki yo sadisa akaka muna sala e salu kiaki!—Tanga Filipi 4:13.
NKUNGA WA 79 Ubalonga Basikila Muna Ludi
a Yesu wakanikina alandi vo bakitula wantu se alongoki yo kubalonga balunda o mambu mawonso kabakanikina. Mu longi diadi, tuvovela una tulenda lemvokela e nkanikinu mia Yesu.
b FOTO: Mpangi ankento ofilanga e longi dia Bibila, osasilanga kwa nlongoki andi mana kafwete vanga muna wokesa o zola kwandi muna Nzambi. I bosi, o nlongoki a Bibila mu sadila kena mambu tatu kasasilu kwa nlongi andi.