NKANIKINU WANKULU UTWASANGA NLUTA O UNU
Ke Nutelamwa Moyo Ko
NKANIKINU WA NKAND’A NZAMBI: ‘Nuyambula tokana kwayingi mu kuma kia mioyo mieno.’—Matai 6:25.
Adieyi usongele? Yesu wayika e mvovo miami muna Longi diandi vana Mongo. Disionario dimosi divovanga vo o mvovo wa Kingerekia wasekolwa vo ‘ntelamwa moyo,’ uyikanga “ntokani za wantu mu kuma kia usukami, nzala ye mpasi zankaka za zingu.” Nkumbu miayingi wantu betelamwanga o moyo mu kuma kia lumbu kia mbazi. Ke diambi kwandi ko mu tokana mu kuma kia ina tuvuidi o mfunu ye wete dia awana tuzolanga. (Filipi 2:20) Kansi vava Yesu kavova vo ‘ke nutelamwa moyo ko,’ alongoki andi kalukisanga kimana bavenga e fu kia tokananga kwayingi mu kuma kia mbazi kadi ediadi diadi katula kiese kiau.—Matai 6:31, 34.
Nga wamfunu o unu? Diambote twalemvokelanga luludiku lwa Yesu. Ekuma? E nkanda mia akwa ngangu mivovanga vo avo muntu otokananga kwayingi, dilenda kuntwasila yimbevo nze “mputa za vumu, yimbevo ya ntima ye mfwima yovo nswengenia.”
Yesu wayika e kuma tufwete vengela o ntelamwa moyo: Ke dina mfunu ko. Yesu wayuvula: “Nani vovo nwina muna tokana kwayingi olenda kudikila kana nkutu miniti mosi muna zingu kiandi?” (Matai 6:27) O tokana kwayingi ke dikutusadisa ko mu zinga kwayingi ngatu tomesa e zingu kieto. Vana ntandu, nkumbu miayingi mana tumwenanga wonga ke mau ko mevangamanga. Nkwa ngangu mosi wavova vo: “Ke dina mfunu ko mu tokana kwayingi mu kuma kia mana mebwa. Kadi oma ma mbazi katulendi mo zaya ko ngatu singika mo.”
Aweyi tulenda vengela o ntelamwa moyo? Entete, bunda e vuvu kwa Nzambi. Avo Nzambi odikilanga nuni yo vuika e mvuma, nga kalendi lungisa nsatu zeto ko wau tusianga e nsambil’andi va fulu kiantete muna zingu? (Matai 6:25, 26, 28-30) Diazole, yindula kaka oma ma unu. Yesu wavova vo: “Ke nutokani ko mu kuma kia mbazi, kadi e mbazi kikala ye ntokani zandi.” Nga ke dialudi ko vo “konso lumbu kina ye ntokani zandi?”—Matai 6:34.
Avo tulemvokele e longi dia Yesu, dikutusadisa mu venga e mpasi. Vana ntandu, dikutusadisa mu kala yo luvuvamu luna Nkand’a Nzambi uyikanga vo “luvuvamu lwa Nzambi.”—Filipi 4:6, 7.