Yoane Wa Mvubi Okubikidi E Nzila

Tezo kia mvu 17 miviokele kala tuka Yesu kayuvulwila alongi muna tempelo vava kakala ye mvu 12. E yayi i nsungi a masanza ma mvu wa 29 wa tandu kieto. Ndonga yimokenenanga oma ma Yoane wa yitu kia Yesu, ona olonganga muna zunga yawonso kuna Weste ya Nkoko a Yodani.

Wantu basivikidi e mpw’a Yoane ye mpil’andi ya vovela. Ovuete mvuatu mia mika mia samo, ye mpond’a nkand’a bulu muna luketo. Madia mandi makonko yo wiki. Nkia nsangu kesamunanga? “Nuviluk’o ntima, kadi e Kintinu kia zulu kifinamene.”—Matai 3:2.

E nsangu za Yoane zitomene yangidika o wantu bezidi kunwa. Ndonga babakwidi vo bafwete viluk’e ntima, i sia vo bafwete soba e kadilu yau yo yambula mavangu mau mambi. Awana bezidi kwa yandi batukidi muna “Yerusaleme ye Yuda yawonso ye zunga kiawonso kia Yodani.” (Matai 3:5) Ndonga mun’awana bezidi kwa Yoane bavilukidi e ntima. Ubavubidi, disongele vo, ubadimwini muna Yodani. Ekuma?

E mvub’a Yoane i sinsu kia luviluku lwa ntima kw’awana babakwidi vo kangu dia Nsiku a Nzambi bakulwidi. (Mavangu 19:4) Kansi, ke awonso ko bafwan’o vubwa. Wau vo mfumu za mabundu, Afarisi ye Asaduki bezidi kwa yandi, o Yoane ubayikidi vo “wan’a mpidi.” Ubavovese vo: “Nusonga mavangu ma luviluku lwa ntima. Ke nuvovi muna ntima mieno ko vo, ‘Tuna yo Abarayama wa se dieto.’ Kadi inuvovese wo vo, Nzambi wafwana vaikisila Abarayama o wana muna matadi mama. Soka disilu kala vana sina dia nti. Ozevo, konso nti ulembi yima bundu yambote, keswa ukeswa yo tubwa vana tiya.”—Matai 3:7-10.

Wau vo ndonga itomene yangalela Yoane, e nsangu kesamunanga za nkuma yo vuba wantu ayingi, anganga ye Anelevi batuminu kimana banyuvula: “Ongeye u nani?”

Yoane ovutwidi vo: “Ke mono ko i Kristu.”

Banyuvuidi vo: “Ozevo, ngeye u Eliya e?”

Ovutwidi vo: “Ke mono ko.”

Banyuvuidi diaka vo: “Ngeye u Ngunz’e?” I sia vo, ngunz’a nene ona Mose kayika vo osinga kwiza?—Nsiku 18:15, 18.

Yoane ovutwidi vo: “Ve!”

Bakwamanene kunyuvula: “Ongeye u nani? Utuzayisa kimana twavana e mvutu kw’awana batutumini. Adieyi ovovele mu kuma kia ngeye kibeni?” Yoane ubavovese vo: “Omono i nding’a muntu obokanga muna makanga, oku vo, ‘Nusingika nzila za Yave,’ wauna kavova Yesaya wa ngunza.”—Yoane 1:19-23.

Banyuvuidi vo, “Ozevo, ekuma ovubilanga, avo ke ngeye ko i Kristu yovo Eliya, ngatu Ngunza?” Ubavutwidi ye sikididi kiawonso vo: “Omono muna maza ivubilanga. Vovo nwina vatelamene ona nulembele zaya, ndiona okwiz’a ndandila.”—Yoane 1:25-27.

Kieleka, Yoane ozeye wo vo nzila kekubikanga wau kesadisanga wantu batambula Masia wasilwa o nsilu, ona okituka se Ntinu. Yoane ovovele mu kuma kia Masia vo: “Ndiona okwiz’andandi unsundidi o nkuma, kilendi nkutu vula nsampatu zandi ko.” (Matai 3:11) Yoane ovovele diaka vo: “Ndiona okwiz’andandinge, umvitidi oku ntwala, kadi wateka zinga.”—Yoane 1:15.

E nsangu za Yoane vo: “Nuviluk’o ntima, kadi e Kintinu kia zulu kifinamene,” zamfunu kikilu. (Matai 3:2) I kimbangi kisonganga kw’awonso vo e salu kia Yesu Kristu wa Ntinu ona Yave ketuma, se kiyantika.