Ekuma Alongoki A Yesu Belembi Fionkonwenanga?

Vava Yesu kakembelele Nduta ya mvu wa 30 wa tandu kieto, ke vaviokele kolo kiayingi ko, Yoane wa Mvubi osilu mu pelezo. Yoane ozolele vo alongoki andi bakituka alongoki a Yesu, kansi ke yau awonso ko bavangidi wo muna ngonde zilende tuka Yoane kasilwa mu pelezo.

Ekolo Nduta ya mvu wa 31 ifenamene, akaka muna alongoki a Yoane bezidi kwa Yesu, banyuvuidi vo: “Ekuma oyeto ye Afarisi tufionkonwenanga, kansi alongoki aku ke befionkonwenanga ko?” (Matai 9:14) Kuna kwa Afarisi o fionkonona i fu kia nsambil’au. Kuna kwa landa, Yesu wata kingana kia Mfarisi wakisana muna sambu vo yandi nkwa unsongi, wasamba vo: “E Nzambi, itondele, kadi kina nze wantu awaya ko, . . . Muna lumingu, lumbu yole ifionkononanga.” (Luka 18:11, 12) Nanga alongoki a Yoane fu kia fionkonona bekalanga kiau yovo bevanganga wo mu kuma kia Yoane una mu pelezo. Nanga bazolele zaya mpe e kuma alongoki a Yesu balembi kubayikamena mu fionkonona mu kuma kia Yoane una mu pelezo.

Yesu ubasadidi e nona kimosi muna kubavana e mvutu. Ovovele vo: “Akundi a toko diansompi ke bena ye kuma kia kendalala ko ekolo bena kumosi yo toko diansompi, nga ke wau ko e? Kansi, vekala ye lumbu yina e toko diansompi kekatulwa vana bena, i bosi befionkonona.”—Matai 9:15.

Yandi kibeni Yoane wayikila Yesu vo toko diansompi. (Yoane 3:28, 29) Muna kuma kiaki, ekolo Yesu kena yau, alongoki andi ke bena yo mfunu wa fionkonona ko. Vava Yesu kefwa, alongoki andi bekendalala, ke bekala ye nsatu a dia ko. Ediadi disoba vava Yesu kefuluka! Alongoki andi ke bekala diaka yo mfunu wa fionkonona ko.

I bosi, Yesu otele yingana yole, oku vo: “Ke vena muntu ko olondanga e tenda kia nlele ampa muna mvuatu wankulu, kadi o nlele ampa unana mvuatu yo sakisa e vundu. Wantu ke besianga vinyu ampa mu madila mankulu ma nkand’a bulu ko, kadi madila malenda buka, e vinyu itiamuka, e madila mpe mefwasuka. Kansi, wantu besianga vinyu ampa mu madila mampa.” (Matai 9:16, 17) Adieyi kazola vova o Yesu?

Yesu ozolele sadisa alongoki a Yoane wa Mvubi babakula vo, ke bafwete vingila ko vo alongoki andi balanda mavangu mankulu ma Kiyuda, nze fu kia fionkonona. Yesu kezidi yikanesa ko ngatu singika e nsambila yankulu kimana yasadilwa diaka mu kolo kiandá. Yesu kekasakesanga wantu ko bakwamanana landa e nsambila ya Kiyuda ye kinkulu kiau. Ke vavanga sadila tenda kiampa ko mu londa mvuatu ankulu ngatu sia vinyu ampa mu madila mankulu ma nkand’a bulu.