Kanele Vo Ovanganga Masivi, Esi Nazarete Bambembwele

O unu Yesu salu kiayingi kasadidi. Vava katukidi muna zunga kia Dekapole, owukidi nkento wavaikanga menga, yo futumuna mwan’a Yairo. Kansi o kuma ke kwafwidi ko. Yesu vava kakatukidi kuna nzo a Yairo, mpofo zole zamakala zinlende, zakazidi, oku vo: “E Mwan’a Davidi, utufwil’e nkenda.”—Matai 9:27.

Wau ziyikidi Yesu vo “Mwan’a Davidi,” e mpofo zazi zisongele vo zikwikilanga vo Yesu i Masia ye yandi ovinga vana kunda kia Davidi. Yesu kasidi sungididi muna kazu kiau ko, nanga ovangidi wo mu zaya kana vo bezindalala lomba dina bazolele. O Yesu vava kakotele muna nzo, e mpofo zau zole zinlende. Ubayuvuidi vo: “Nga nukwikidi wo vo ndenda wo vanga e?” Bamvutwidi ye ziku kiawonso vo: “Ingeta, e Mfumu.” I bosi, Yesu osimbidi e meso mau yo vova vo: “Yambula diavangama mun’owu wa lukwikilu lweno.”—Matai 9:28, 29.

Vana vau e mpofo zimwene! Wauna katekele kanikina ankaka balembi mwanga e nsangu, Yesu ubakanikini mpe vo balembi mwanga e nsangu za dina kabavangidi. Kansi, wau vo bazele ye kiese, bayantikidi dio zayisa kw’awonso.

Ekolo e mpofo zau zole zivaikanga muna nzo, o nkagu batwese muntu wakituka se baba mu kuma kia nkuya kena wau. Yesu vava kavaikisi e nkuya ukedi muna yandi, vana vau oyantikidi o vova. E ndonga wau bamwene diambu diadi, basivikidi kikilu yo vova vo: “Ke musidi moneka diambu dia mpila yayi ko omo Isaele.” Afarisi mpe bena vana. Wau vo ke balendi fidisa masivi mama mpaka ko, bavutukidi vova luvunu mu kuma kia tuku dia masivi ma Yesu, oku vo: “Muna wisa kia mfumu a nkuya kevaikisilang’e nkuya.”—Matai 9:33, 34.

I bosi, Yesu ovutukidi kwandi kuna Nazarete, kadi i vata diandi. Owau, una kumosi ye alongoki andi. Mvu amvimba uviokele kala tuka Yesu kalongela muna sambilu dia Nazarete. Kuna lubantiku o nkangu wasivika mu mana kalonga, kansi kuna kwalanda e longi diandi diabakendeleka yo vava kumvonda. Owau Yesu ozolele sadisa diaka esi vata diandi.

Muna lumbu kia Vundu, Yesu wele longa diaka muna sambilu. E ndonga isividi, iyuvuidi vo: “Ondioyu akweyi kutukanga e ngangu zandi ye mavangu mama mankuma?” Bavovele vo: “Ke yandi ko i mwan’a mvadi a nti e? O ngudi andi, e nkumbu andi ke Maria ko e? Aleke andi ke Yakobo, Yosefe, Simone yo Yuda ko e? E nsanga zandi, yau awonso ke bena yeto ko e? Ozevo, ondioyu akweyi kebakilanga mawonso mama?”—Matai 13:54-56.

O nkangu ubenze vo Yesu mpasi muntu kwandi, kaswaswanene yau ko. Bavovele vo, ‘nsansuk’andi tuzeye yo, aweyi kalenda kadila Masia?’ Kana una vo bamwene ziku yayi yawonso, kumosi ye ngangu zandi za kondwa tezo yo mavangu mandi ma nkuma, babembwele Yesu. Wau vo batomene zaya Yesu ye yitu yandi, batele sakuba mu kuma kiandi. Kiaki i kuma Yesu kavovele vo: “O ngunza ke zitiswanga ko muna zunga kiandi ye muna nzo andi.”—Matai 13:57.

Kieleka, Yesu osivikidi o kondwa kwau kwa lukwikilu. Muna kuma kiaki, kasidi mo vangila mavangu ma nkuma ko, ‘mbevo zakete kaka katensekele moko yo kubawuka.’—Maku 6:5, 6.