Tanginina On’olutidi Kitula Wantu S’alongoki

“Nutoma tala ngwa nuwa.”​—⁠LUKA 8:⁠18.

1, 2. Ekuma ofwete sila sungididi muna mpila ina Yesu kakadila yo wantu muna lumbu ya uselo wandi?

YESU KRISTU salu kia Longa yo Kitula Wantu S’alongoki kasalanga vava kavovesa alongoki andi vo: “Nutoma tala ngwa nuwa.” (Luka 8:​16-​18) I wau mpe ofwete vanga muna salu kiaku nze Nkristu. Kele vo osidi e sungididi muna longi dia mwanda, olenda dio sadila yo kituka nteleki ambote a Kintinu. Kana una vo kulendi wá nding’a Yesu ko unu, olenda tanga muna Nkand’a Nzambi mana kavova yo vanga. O Nkand’a Nzambi adieyi uyikanga mu mpila in’o Yesu kakadila yo wantu muna lumbu ya uselo wandi?

² Yesu nteleki ye nlongi ambote a Nkand’a Nzambi kakala. (Luka 8:1; Yoane 8:​28) Muna kitula wantu s’alongoki, divavanga vo twasamun’e nsangu zambote yo longa wantu. Kansi Akristu akaka, kana una vo ateleki ambote, o longa wantu diampasi bemwenanga dio. O teleka yovo sila umbangi, i zayisa nsangu zambote kwa wantu, kansi muna kubalonga mu kuma kia Yave ye makani mandi, divavanga vo wavanga yau kikundi. (Matai 28:​19, 20) Ediadi dilenda vangama muna tangininanga Yesu Kristu wa Nlongi Anene ye Nkitudi a Wantu S’alongoki.​—⁠Yoane 13:⁠13.

3. Tanginina Yesu aweyi dilenda kusadisila muna salu kia kitula wantu s’alongoki?

³ Kele vo otanginini mpila ina kalongelanga o Yesu, disonga vo olende elongi diavova Paulu wa ntumwa vo: “Nukangadila kuna ngangu kuna kw’awana bena kuna mbazi, nwiyikûdilang’e ntangwa. E mpov’eno yangemb’e lumbu yawonso, yasiw’o mungwa, nwazay’e mputula nufwete vutula konso muntu.” (Kolosai 4:​5, 6) Ngolo divavanga mu tanginina Yesu muna salu kia kitula wantu s’alongoki, kansi dilenda tomesa mpil’aku ya longa, e kuma kadi dilenda kusadisa mu “vutula konso muntu” mun’owu wa nsatu zandi.

Yesu Wavanang’e Ntangwa kw’Akaka Bavova

4. Ekuma dilenda vovelwa vo Yesu nwé ambote kakala?

⁴ Tuka kileke kiandi, Yesu wakala ye fu kia wunikina wantu yo yambula vo basonga e ngindu zau. Kasikil’owu, vava kakala ye kimbuta kia mvu 12, mase mandi manwana muna tempelo vana ven’alongi, ‘wabawanga, yo yuvula ngyuvu.’ (Luka 2:​46) Yesu kayenda mu tempelo mu veza alongi ko mu kuma kia zayi wandi. Wá kayenda wá, kanele vo wabayuvula e yuvu. E fu kiandi kia toma wá kiansadisa mu vw’edienga dia Nzambi ye dia wantu.​—⁠Luka 2:⁠52.

5, 6. Aweyi tuzayidi vo Yesu wawunikinanga awana kalonganga?

⁵ Vava kavubwa yo kuswa nze Masia, Yesu wazindalala songa e fu kiandi kia wunikina wantu. Kasianga kaka sungididi mu malongi mandi ko yo veza awana banwanga. Nkumbu miayingi, vava kavovanga, wavundanga yo yuvula dina bayindulanga yo wunikina e mvutu zau. (Matai 16:​13-​15) Muna bong’e nona, vava Lazaro wa mpangi a Mareta kafwa, Yesu wamvovesa vo: “Konso ona mpe win’o moyo, okwikilang’omu mono, kefwa nkutu ko yakwele mvu.” I bosi wanyuvula vo: “Ng’okwikila wo e?” Yesu wawunikina e mvutu za Mareta: “Ingeta, e Mfumu; nkwikidi wo vo nge i Kristu, wa Mwan’a Nzambi.” (Yoane 11:​26, 27) Yesu wayangalala kikilu o wá e mvovo mia Mareta miasonga lukwikilu lwandi.

⁶ Vava akaka mun’alongoki bayambula kunlanda, Yesu wazola wá e ngindu za ntumwa zandi. Wabayuvula vo: “Oyeno mpe nuzolele katuk’e?” Simone Petelo umvutwidi vo: “E Mfumu, kwa nani tukwenda? o mambu ma moyo a mvu ya mvu, nge una mau. Oyeto tuvwidi kwikila, tuzeye mpe vo ngeye i Mveledi a Nzambi.” (Yoane 6:​66-​69) Ekwe kiese miatwasa kwa Yesu e mvovo miami! Diau adimosi mpe, e mvovo mia nlongoki a Nkand’a Nzambi misonganga lukwikilu lwandi, milenda kuyangidika.

Yesu Wawunikinanga Kuna Luzitu

7. Ekuma Asamaria bakwikidila muna Yesu?

⁷ E kuma kiakaka kiatoma sadisa Yesu mu kitula wantu s’alongoki, i kubavwa o mfunu yo kubawunikina kuna luzitu. Kasikil’owu, lumbu kimosi, Yesu wasila umbangi kwa nkento a Nsamaria vana sima kia Yakobo, kuna Sika. Vava bamokenanga, Yesu kavovanga kaka ko, kansi wawunikinanga mpe o nkento. Ekolo kanwunikinanga, Yesu wamona vo nkento ndioyo mambu ma mwanda kasianga etima, wamvovesa vo Nzambi ovavanga awana bekunsambila muna mwanda ye ludi. Yesu wazitisa nkento ndioyo yo tokanena ewete diandi. I bosi, o nkento wazayisa kw’akaka mu kuma kia Yesu ye “Asamaria engi mun’evata diadina, bakwikila muna yandi muna diambu dia nkento.”​—⁠Yoane 4:​5-29, 39-42.

8. E fu kia wantu kia songa ngindu zau aweyi kilenda kusadisila mu yantika e moko muna salu kia umbangi?

⁸ Nkumbu miayingi, wantu beyangalelanga songa ngindu zau. Kasikil’owu, esi Atenai ya nz’ankulu bazolanga songa e ngindu zau yo wá nsangu zampa. Ediadi, diafila Paulu wa ntumwa mu vov’elongi diamfunu vana Arèopàgo, muna mbanza yayina. (Mavangu 17:​18-​34) Vava oyantikanga mokena yo muntu muna salu kia umbangi, olenda vova vo: “Ngizidi kukingula kadi nzolele zaya e ngindu zaku mu kuma kia [yika konso diambu].” Wunikina e ngindu zandi yo kunsonga ngindu zaku yovo yuvula kiuvu mu kuma kia diambu diodio. I bosi, kuna ngemba zawonso, songa dina kevovanga Nkand’a Nzambi mu kuma kia diambu diadi.

Yesu Wazayanga Dina Kevova

9. O Yesu adieyi kavanga una ‘katendwele ko e sono’ kwa Keleopa yo nkwandi?

⁹ Yesu kakondwanga edi dia vova ko. Vana fulu kia kala kaka nwé ambote, nkumbu miayingi wavavanga zaya dina bayindulanga o wantu yo zaya dina kevova. (Matai 9:4; 12:​22-30; Luka 9:​46, 47) Muna bong’e nona: Ke kolo ko vava Yesu kafuluka, alongoki andi wole batuka kuna Yerusaleme yakuna Emau. E Nsangu Zambote zivovanga vo, “bamokenanga yo yuvuziana, o Yesu yandi kibeni ofinamene, wele yau. Kansi meso mau mavilakeswa, ke bakuntonena. Ubavovese vo, nkia mambu mama numokenena wau nukwenda? Badingalele, bayindalele. Omosi, nkumbu andi Keleopa, umvutwidi vo, nga ngeye kaka wananga kuna Yerusaleme, walembi zay’oma mabwidi yau lumbu yayi e? Ubavovese vo, ameyi?” O Nlongi Anene wawunikina ekolo bavovanga vo Yesu wa mwisi Nazarete walonganga wantu, vanga masivi yo vondwa. Owau, akaka bevovanga vo wafulwa muna mafwa. Yesu wayambula vo Keleopa y’akwandi bavova mana bayindulanga. I bosi wabazayisa dina bafwete zaya ye ‘kubatendwel’e sono.’​—⁠Luka 24:​13-27, 32.

10. Aweyi olenda zayila dina kekwikilanga o muntu omokene yandi muna salu kia umbangi?

¹⁰ Dilenda kala vo, o muntu omokene yandi kuzeye dina kekwikilanga ko. Muna dio zaya, olenda vova vo, ozolanga wá e ngindu za wantu mu kuma kia sambu. I bosi, unyuvula: “Ng’obenze vo vena yo muntu owanga e sambu?” E mvutu zandi zisonga dina keyindulanga ye dina kekwikilanga. Kele vo munkwikizi, olenda zaya mayingi mu mana keyindulanga muna kunyuvula vo: “Ng’obenze vo Nzambi owanga sambu yawonso, ovo vena ye sambu ke yikunyangidikanga ko?” E yuvu ya mpila yayi yilenda twasa moko kiambote. Avo dilendakana mu tanga e sono kia Nkand’a Nzambi, olenda wo vanga kuna ndekwa zawonso, lembi veza lukwikilu lwandi. Kele vo uwidi, okala ye kiese kia kutambula diaka. Kansi, yindula vo uyuvwidi kiuvu kina kuzayidi mvutu ko? Olenda fimpa e kiuvu yo vutuka wakubama mu kunsonga ‘e kuma kia vuvu kiaku kuna lembama yo vumi.’​—⁠1 Petelo 3:⁠15.

Yesu Walonganga Akwa Luzolo Lwambote

11. Adieyi dilenda kusadisa mu solola awana bazolele kituka s’alongoki?

¹¹ Yesu wa muntu alunga, wakala yo umbakuzi wansadisanga mu zaya ana bakala y’etima dia longwa. Diampasi dikalanga mu solola awana ‘basilw’o moyo a mvu ya mvu etima.’ (Mavangu 13:​48) Yesu wavovesa mpe ntumwa zandi vo: “Kons’ovata ovo mpata-vata nukota, nuvava mo ndion’ofwene.” (Matai 10:​11) Nze una wavanga ntumwa za Yesu, tufwete vava awana bazolele wá yo longoka e ludi kia Nkand’a Nzambi. Olenda solola akwa luzolo lwambote muna toma sianga e sungididi muna dina kevovanga o muntu yo sungamena e fu ya konso muntu.

12. Aweyi olenda toma sadisila muntu osongele luzolo lwambote?

¹² Vava omokene yo muntu osongele luzolo lwambote muna nsangu za Kintinu, diambote wayindulang’e nsatu zandi za mwanda. Avo sonekene dina nulongokele yo muntu mu kuma kia nsangu zambote, dilenda kusadisa mu lenda lungisa nsatu zandi za mwanda. Vava ovutuka kunkingula ofwete toma kunwunikina, avo zolele zaya mayingi mu kuma kia dina kekwikilanga ye fu ye mambu makaka.

13. Nki kilenda kusadisa mu bakula dina keyindulanga muntu mu kuma kia Nkand’a Nzambi?

¹³ Aweyi olenda fidila muntu kavova dina keyindulanga mu kuma kia Diambu dia Nzambi? Muna zunga yakaka, ke diambi ko dia yuvula muntu vo: “Nga diampasi dikalanga kwa ngeye mu bakula Nkand’a Nzambi?” E mvutu zandi zisonga una kebadikilanga mambu ma mwanda. E mpila yakaka, i tanga e sono yo yuvula vo, “nga diyangidikidi?” Nze Yesu, olenda sadisa wantu ayingi muna salu kia umbangi muna sadilanga yuvu yambote. Kansi, vena ye fu ofwete venga.

Yesu Wasadilanga Yuvu mu Mpila Yambote

14. Aweyi olenda zitisila ngindu za wantu lembi kubayuvula mambu mayingi?

¹⁴ Zitisanga ngindu z’akaka lembi kubatokanesa. Tanginina e mpila kalongelanga o Yesu. Wakalanga ye ndekwa za sadila yuvu yafilanga wantu mu badika. Yesu wakala mpe nwé ambote ona wakasakesanga wantu yo kubavuvika. (Matai 11:​28) Wantu a mpila zawonso bayizanga kwa yandi mu vava lusadisu. (Maku 1:40; 5:​35, 36; 10:​13, 17, 46, 47) Kele vo wantu bezidi kuzayisa dina beyindulanga mu kuma kia Nkand’a Nzambi ye dina kelonganga, ofwete venga e fu kia kubayuvula mambu mayingi.

15, 16. Aweyi olenda fidila wantu mu mokena mu kuma kia nsambila?

¹⁵ Vana ntandu a sadila yuvu mu mpila yambote, olenda tomesa e moko muna yikanga diambu diakiese yo wunikina dina kevova o muntu. Kasikil’owu, Yesu wazayisa Nikodemo vo: “O muntu, ovo kalembi wutuluka, kalendi mona kintinu kia Nzambi ko.” (Yoane 3:⁠3) E mvovo miami miamfunu miafila Nikodemo mu yuvula yo wá Yesu kondwa lukatikisu. (Yoane 3:​4-​20) Muna mpila yayi, olenda fila wantu mu mokena.

¹⁶ O unu, muna nsi za África, za Europa Oriental ye América, diambu dilutidi toma vovwa dia mabundu mampa mevaikanga. Muna fulu yayi, olenda yantika e moko mu vova vo: “Dikuntokanesanga mu mona ulolo wa mabundu mevaikanga. Kansi, ngina ye vuvu vo ke kolo ko o wantu a zula yawonso kumosi bekala muna nsambila aludi. Nga oyangalala kele vo diadi divangamene?” Muna zayisa diambu diakiese mu kuma kia vuvu kiaku, olenda fila wantu mu vova dina beyindulanga. E yuvu yaleboka keyikalanga mpasi ko mu vanina yo e mvutu. (Matai 17:​25) O muntu omokenanga yandi, una kavene ko e mvutu, ofwete kubika sono kimosi yovo yiyole ina ovanina e mvutu. (Yesaya 11:9; Sefaniya 3:⁠9) Toma wunikina yo sia e sungididi muna mvutu za muntu, dilenda kusadisa mu zaya dina numokena muna nkingula yilanda.

Yesu Wawunikinanga Yingyana-ngyana

17. Nki kisonganga vo Yesu wavwanga yingyana-ngyana o mfunu?

¹⁷ O Yesu kavwanga kaka ambuta mfunu ko, kansi ye yingyana-ngyana mpe. Wazaya e nsaka za yingyana-ngyana ye mambu bavovanga. Ezak’e ntangwa, wabokelanga yingyana-ngyana beza kwa yandi. (Luka 7:​31, 32; 18:​15-​17) Ulolo wa yingyana-ngyana bawanga Yesu. Vava yingyana-ngyana bakembela Masia, Yesu wasia e sungididi yo tanga e sono kia ungunza una wazayisa diambu diadi. (Matai 14:21; 15:38; 21:​15, 16) O unu, yingyana-ngyana yayingi ikitukanga s’alongoki a Yesu. Aweyi olenda kubasadisila?

18, 19. Aweyi olenda sadisila mwan’aku muna mwanda?

¹⁸ Muna sadisa mwan’aku muna mwanda, ofwete kunwunikinanga. Ofwete zayanga dina keyindulanga, dina dilenda kala vo ke dina ngwizani ko ye ngindu za Yave. Konso dina kavovele o mwana, diamfunu wateka kunsanisina. I bosi, olenda sadila sono ya Nkand’a Nzambi muna sadisa mwan’aku kabakula una Yave kebadikilanga diambu.

¹⁹ E yuvu ilenda kusadisa mu bakula dina keyindulanga o mwana. Kansi, nze ambuta, o wana ke bezolanga yuvulwa yuvu yayingi ko. Vana fulu kia tokanesa mwan’aku ye yuvu yampasi, olenda kunsonga e diambu mu mvovo miankufi mia ngeye kibeni yovo mia diambu diakaka diamfunu. Olenda kunzayisa una oyindulanga yo kunsonga e kuma kia diambu numokenanga. I bosi yuvula vo: “Nga ngeye mpe i wau oyindulanga?” E mvutu za mwan’aku zilenda ziula nzila mu kala ye moko kia lukasakeso kia Nkand’a Nzambi.

Kwamanana Tanginina On’olutidi Kitula Wantu S’alongoki

20, 21. Aweyi olenda kadila nwé ambote muna salu kiaku kia kitula wantu s’alongoki?

²⁰ O toma wá mfunu kwina vava omokenanga yo mwan’aku yovo yo muntu akaka. Kieleka, ediadi zola disonganga. Vava muntu kevovanga, unwunikina kuna lulembamu yo songa vo mfunu okumvwanga yo kunzitisa. Muna kuma kiaki, o wunikina divavanga vo watamb’o matu vava o muntu kevovanga.

²¹ Wau vo wayivana muna salu kia Kikristu, kwamanana toma wunikina awana omokenanga yau. Kele vo osidi e sungididi muna dina bevovanga, nanga obakula nkia ludi kia Nkand’a Nzambi kilenda kubayangidika. I bosi sia e ngolo za kubasadisa muna sadilang’e mpila ina kalongelanga Yesu. Avo vangidi wo, ovwa nluta miambote mia tanginina On’olutidi Kitula Wantu S’alongoki.

Nkia Mvutu Ovana?

• O Yesu aweyi kafidilanga akaka bavova dina bayindulanga?

• Ekuma o Yesu kawunikinanga ana kalonganga?

• Aweyi olenda sadila e yuvu muna salu kiaku kia umbangi?

• Adieyi olenda vanga mu sadisa yingyana-ngyana muna mwanda?

[Mvovo mia Fwaniswa mina muna lukaya lwa 26]

Vava osianga umbangi, vavang’o wunikina