Kristu Okitukidi Muna Mona-meso Kia Nkembo Andi

Ekolo Yesu kelonganga o nkangu muna zunga kia Kaisaria-Fililpi, kiavavuka kilometa 25 tuka kuna mongo a Keremone, ovovele diambu dia sivi kwa ntumwa zandi, oku vo: “Kieleka, inuvovese wo vo ankaka batelamene vava, ke beyeleka nkutu lufwa ko yavana bemona Mwan’a muntu okwiza muna Kintinu kiandi.”—Matai 16:28.

Alongoki bayuvuzianene kana ayeyi i nsas’a mvovo mia Yesu. Vava kiavioka lumingu lumosi, Yesu obongele alongoki andi atatu, Petelo, Yakobo yo Yoane, wele yau kuna mongo wandá. Nanga mu fuku bele, kadi yau ntatu balele kwau. Ekolo Yesu kesambanga, okitukidi vana bena. Atumwa bamwene e ndose a Yesu ikezimanga nze ntangwa, mvuatu miandi mivuidi kezima nze ntemo, mipembele.

I bosi, vamonekene wantu wole bena nze “Mose yo Eliya.” Bayantikidi mokena yo Yesu mu kuma kia ‘ngiend’andi ina kelunganisa kuna Yerusaleme.’ (Luka 9:30, 31) E ngienda yayi lufwa yo lufuluku lwa Yesu isonganga, luna kavovele ke kolo kiayingi ko. (Matai 16:21) E moko kiaki kivunisi e mvovo mia Petelo, kisongele mpe vo lufwa lwa nsoni luna Yesu kefwa ke lulendi kakidilwa ko.

Antumwa basikamene, basivikidi wau bewanga yo mona. E kiaki mona-meso, kansi o Petelo obenze vo mu vangama kikilu mena, okotele muna moko kiaki, ovovese Yesu vo: “E Rabi, diambote kwa yeto twakala vava. Yambula twatunga saba tatu, kimosi kiaku, kimosi kia Mose, kimosi kia Eliya.” (Maku 9:5) Nga Petelo ozolele tunga e saba kimana e mona-meso kiakwamanana?

O Petelo wau kevovanga, e tuti dia ntemo dibafukidi, e ndinga itukidi muna tuti, oku vo: “Ndioyu i Mwan’ame anzolwa, ona iyangalelanga. Nunwila.” Antumwa wau bawidi e nding’a Nzambi, babakamene kwa wonga, babukikidi e ndose zau, kansi Yesu ubavovese vo: “Nutelama. Ke numoni wonga ko.” (Matai 17:5-7) Antumwa vava batelamene, ke bamwene muntu ankaka ko, Yesu kwandi kaka. E mona-meso kifokokele. O kuma vava kukiele, bakulumukini kuna mongo, Yesu ubakanikini vo: “Ke nuzayisi e mona-meso kiaki kwa muntu ko yavana Mwan’a muntu kefuluka muna mafwa.”—Matai 17:9.

E mbonek’a Eliya muna mona-meso kiaki ibundumwini kiuvu. Antumwa bayuvuidi Yesu vo: “Ekuma asoneki bevovelanga vo Eliya kafwete teka kwiza?” Yesu ovutwidi vo: “Eliya wayiza kala, ke bansungamena ko.” (Matai 17:10-12) O Yesu Yoane wa Mvubi kavovele, ona wasala e salu kin’e betela ye kina Eliya kasala. Eliya yandi wakubikila Elesa e nzila, vo i Yoane yandi wakubikila Kristu e nzila.

E mona-meso kiaki kikumikini Yesu ye ntumwa zandi. I kîni kia nkembo a Kintinu kia Kristu. Owau, alongoki bamwene ndungan’a nsilu una Yesu kabasila vava kavova vo bemona “Mwan’a muntu okwiza muna Kintinu kiandi.” (Matai 16:28) Wau bakala kuna mongo, alongoki bakala se “mbangi za meso za nkembo andi anene.” Kana una vo Afarisi bazola vo Yesu kabasonga sinsu mu kubakwikidisa vo yandi i Ntinu ona Nzambi kasola, o Yesu kavanga wo ko. Kansi Petelo, Yakobo yo Yoane bakala ye lau dia mona e nkituk’andi, ina yalunganisa ungunza mu kuma kia Kintinu. Dianu o Petelo kayiza sonekena vo: “Tuna ye diambu diasakulwa ditomene sikila.”—2 Petelo 1:16-19.