LONGI DIA 42
Adieyi Bibila Kivovanga mu Diambu Ditadidi Kimpumpa ye Longo?
Mu nsi zankaka, wantu bekwikilanga vo muntu muna kala ye kiese kafwete sompa. Kansi, ke wantu awonso ko basompa bekalanga mu kiese. Ke mpumpa zawonso ko mpe bekalanga mu ntantu. Bibila kivovanga vo osompa yovo kimpumpa, lukau lwa Yave.
1. O kala mpumpa nkia nluta ditwasanga?
Bibila kivovanga vo: “Konso ona osompele, diambote kavangidi, kansi ona olembi sompa olutidi vanga diambote.” (Tanga 1 Korinto 7:32, 33, 38.) Mu nkia mpila o muntu una vo mpumpa ‘kalutidi vangila diambote’? Akristu bena vo ampumpa ke bena ye mbebe yadikila akazi ko. Zingu kiavevoka bekalanga kiau. Muna bong’e nona, akaka bekalanga ye lau diawokesa salu kiau kia umbangi, bekwendanga muna zunga yankaka mu samuna e nsangu zambote. Vana ntandu, bekalanga ye ntangwa yayingi muna siamisa kikundi kiau yo Yave.
2. O sonekesa longo kwa luyalu nkia nluta ditwasanga?
Nze una kimpumpa kitwasilanga e nluta, o kazala kuna mpe ye nluta miandi. Bibila kivovanga vo: “O wantu wole basundidi muntu mosi.” (Kimpovi 4:9) Ediadi dimonekanga kuna kwa akazi Akristu, ana belemvokelanga nkanikinu mia Bibila muna longo lwau. Akazi ana besonekesanga longo lwau kwa luyalu, besilananga nsilu wa songaziana zola yo zitisa muntu yo nkwandi. Ediadi dikubatwasilanga lutaninu lutila akazi ana bezinganga entwadi lembi kazala. Ediadi mpe dikalanga se dialutaninu kwa wan’au.
3. Aweyi Yave kemwenanga o longo?
Vava Yave kasikidisa longo lwantete, wavova vo: ‘O yakala osisa se diandi yo ngudi andi yo tatidila nkaz’andi.’ (Tuku 2:24) Yave ozolele vo yakala yo nkento bazolananga yo kala entwadi ekolo bena moyo. Ovananga nswa wa vonda longo avo mosi muna akazi otele zumba. Avo diambu diadi dibwidi, Yave ovananga nswa kwa ndiona kena ye foti ko mu baka nzengo za vonda yovo lembi vonda o longo.a (Matai 19:9) Yave ke tondanga ko vo Akristu bakazala ye akazi ayingi.—1 Timoteo 3:2.
ZAYA DIAKA MANKAKA
Tala una ampumpa ye awana bakazala balenda kadila ye kiese yo mwesa mpe Yave e kiese.
4. Toma sadila lukau lwa kimpumpa
Yesu wabadikilanga kimpumpa se lukau. (Matai 19:11, 12) Tanga Matai 4:23, i bosi, vana e mvutu za kiuvu eki:
Aweyi Yesu kasadila kimpumpa kiandi muna sadila Se diandi yo sadisa wantu ankaka?
Akristu balenda sadila kimpumpa kiau nze Yesu.
Tala e VIDEO, i bosi, vana e mvutu za kiuvu kilende.
Mu nkia mpila Akristu balenda sadila kimpumpa kiau?
Nga Ozeye?
Bibila ke kisikidisanga mvu ko mina muntu kafwete kazala. Kansi, kilukisanga vo muntu kafwete vingila yavana ‘kekola’ i sia vo, yavana kivioka e nsatu zasaka za vukana ezi zilenda fila muntu mu baka nzengo zambi.—1 Korinto 7:36.
5. Kala ye ngangu muna sola muntu okazala yandi
E nzengo za sola muntu okazala yandi, i zimosi muna nzengo zisundidi o mfunu o muntu kafwete baka muna zingu. Tanga Matai 19:4-6, 9, i bosi, vana e mvutu za kiuvu eki:
Ekuma Nkristu kafwete kadila ye nzaki za sompa ko?
E Bibila kilenda kusadisa mu zaya e fu ikitulanga o muntu se nkento yovo yakala diambote. E diambu disundidi o mfunu i sola o muntu ona ozolanga Yave.b Tanga 1 Korinto 7:39 ye 2 Korinto 6:14. I bosi, vana e mvutu za yuvu eyi:
Ekuma tufwete kazalela kaka ye akweto ana besadilanga Yave?
Aweyi Yave kemona avo tukazalele yo muntu ona ke kunzolanga ko?
Avo bulu yole yaswaswana isilu mu vangu kimosi kimana yasala entwadi, mpasi imona. Diau dimosi mpe, avo Nkristu okazale yo muntu kezolanga Yave ko, mpasi zayingi kemona
6. Badikilanga o longo nze una Yave kebadikilanga lo
Kuna nz’ankulu, akala ankaka bavondanga longo mu kuma kia mambu makondwa o mfunu. Tanga Malaki 2:13, 14, 16, i bosi, vana e mvutu za kiuvu eki:
Ekuma Yave kemengenanga e fu kia vonda longo kondwa kuma kiasikila kiyikwanga muna Bibila?
E vangu dia zumba yo vonda longo, mpasi zayingi dimwesanga kwa yakala yo nkento ona kena ye foti ko ye kwa wana
Tala e VIDEO, i bosi, vana e mvutu za kiuvu kilende.
Avo nkaz’aku ke sadilanga Yave ko, adieyi ofwete vanga mu kitula o longo lwaku se lwakiese?
7. Sadila e nkanikinu Yave kevananga mu kuma kia longo
Ngolo divavanga mu sadila nkanikinu Yave kevananga mu kuma kia longo.c Kansi, Yave osambulanga awana bevanganga e ngolo za sadila mio. Tala e VIDEO.
Tanga Ayibere 13:4, i bosi, vana e mvutu za yuvu eyi:
Nga obenze vo e nkanikinu mia Yave mu kuma kia longo miambote? Ekuma?
Muna nsi zayingi, o nsiku a luyalu uvovanga vo awana bazolele kazala yovo vonda longo basonekesa dio muna nkanda mia luyalu. Yave ozolele vo Akristu balemvokelanga nsiku wau. Tanga Tito 3:1, i bosi, vana e mvutu za kiuvu eki:
Avo wasompa, nga wasonekesa longo lwaku muna nkanda mia luyalu?
AVO MUNTU UYUVUIDI VO: “Ekuma muntu kafwete kazalela? Nga diambi wantu wole bezolananga bazinga entwadi lembi kazala?”
Nkia mvutu okumvana?
MAMBU MASINA MA LONGI DIADI
Okala mpumpa yovo kazala, i lukau lwatuka kwa Yave. Kiakala ampumpa yovo awana bakazala balenda kala ye kiese avo luzolo lwa Yave bevanganga.
Nkia Mambu Olongokele?
Aweyi muntu kalenda sadila kimpumpa kiandi mu mpila yambote?
Ekuma Bibila kivovelanga vo tufwete kazala kaka ye akweto ana besambilanga Yave?
Nkia kuma kiyikwanga muna Bibila kilenda fila akazi mu vonda longo?
TALA MPE OMA MALENDE
O kazala kaka muna “Mfumu,” aweyi disongele?
Tala video zole zankufi zilenda kusadisa mu baka e nzengo zambote mu diambu ditadidi banda kimakangu yo kazala.
Zaya e kuma mpangi mosi kavovela vo mana Yave kamvana masundidi o mfunu ke mu mana kabembola ko.
Nkia mambu muntu kafwete teka yindula vitila kabaka nzengo za vonda longo yovo vambana?
“Zitisanga ‘Kina Kiayikakeswa kwa Nzambi’” (Eyingidilu dia Desemba, 2018)
a Tala Mvovo Misasilu 4 muna zaya diaka mankaka mu kuma kia vambana avo ke vena diambu dia zumba ko.
b Muna fu yankaka ya kisi nsi, o mase yau besolelanga wan’au o muntu kekazala yandi. Avo i diau divangamanga muna fu yeno ya kisi nsi, mase ana bezolanga wan’au, ke bafwete talanga ntete mavua ko yovo kanda dina muntu kawutukila, kansi bafwete vavanga zaya kana vo muntu ndioyo Yave kezolanga.
c Avo nkento yovo yakala ozinganga yandi, kansi kwakazala yandi ko mun’owu wa nsiku mia luyalu, ngeye kibeni ofwete baka e nzengo kana vo ovambana yandi yovo okazala yandi.