“Kintinu kia zulu kina nze mfumu a nzo, ona ovaikidi mu mene-mene, wele vavi asadi benda sadila muna mpatu andi a vinyu. Vava kawizanene ye asadi vo denali imosi kekubafuta muna lumbu, ubatumini muna mpatu andi a vinyu. Ovaikidi diaka muna tezo kia ola yetatu, omwene ankaka bakondelo e salu, batelamene vana zandu, ubavovese vo, ‘Oyeno mpe, nwenda sala muna mpatu a vinyu, ikunufuta konso kina kinufwene.’ Bele kuna mpatu. Ovaikidi diaka muna tezo kia ola yasambanu ye ina yevua, ovangidi diau dimosi. I bosi, muna tezo kia ola ya 11, ovaikidi, omwene ankaka batelamene, ubayuvuidi vo, ‘Ekuma nutelamene ovava mwini amvimba yeno ke nukadi ye salu?’ Bavutwidi vo, ‘Kadi ke vena muntu ko utubakidi mu salu.’ Ubavovese vo, ‘Oyeno mpe nwenda sala muna mpatu a vinyu.’”—Matai 20:1-7.

Anganga yo wantu ankaka beyindulanga vo Ayuda ana bevezuanga, ke basadilanga Nzambi una ufwene ko. Bena nze asadi basadidi ndambu a lumbu muna mpatu a vinyu ya Nzambi. Muna kingana kia Yesu, o wantu awaya i yau bayantika sala mu “tezo kia ola ya tatu” (9:00 mu mene) yovo kuna mfoko a lumbu, muna ola ya sambanu, ya nana ye ola ya kumi ye mosi (5:00 mu masika).

Akala ye akento belandanga Yesu, bebadikilwanga nze ‘wantu basibwa.’ (Yoane 7:49) Kadi oyau abaki a mbizi za maza ye avati a nsengo muna zingu kiau kiawonso. Kansi, kuna mfoko a mvu wa 29 wa tandu kieto, “mfumu a mpatu a vinyu” otumini Yesu kababokela beza sadila Nzambi yo kituka se alongoki a Kristu. O Yesu i yau kayikidi vo “basukinini,” ana bezidi sala mu mpatu a vinyu muna ola ya kumi ye mosi.