LONGI DIA 59
Zizidila Lubangamu Kuna Unkabu
Akristu awonso bazeye wo vo vena ye lumbu besinga tontwa yovo bangikwa. Ekuma ke tufwete dio sivikila ko?
1. Aweyi tuzayidi wo vo tusinga bangikwa?
Bibila kivovanga vo: “Awonso ana bazolele vumina Nzambi muna zingu kiau, muna Kristu Yesu, bangikwa mpe bebangikwa.” (2 Timoteo 3:12) Yesu wabangikwa kadi kakivananga mu nza ya Satana ko. Oyeto mpe ke tukukivananga mu nza yayi ko. Muna kuma kiaki, ke tusivikanga ko vava tubangikwanga kwa ayadi a nza yayi ye kwa mfumu za mabundu maluvunu.—Yoane 15:18, 19.
2. Aweyi tulenda kubamena vitila twabangikwa?
Eyayi i ntangwa tufwete kumika vuvu kieto muna Yave. Vaulanga e ntangwa lumbu yawonso mu samba kwa Yave yo tanga Diambu diandi. Lungananga muna tukutakanu ntangwa zawonso. O vanga mambu mama, dikusadisa mu vua nkuma ovuidi mfunu mu zizidila lubangamu kuna unkabu, kana nkutu vo kwa yitu yaku lutukidi. Paulu wa ntumwa ona wabangikwa nkumbu miayingi, wasoneka vo: “Yave i nsadisi ame; kimona wonga ko.”—Ayibere 13:6.
O samuna e nsangu zambote ntangwa zawonso, dikutusadisa mu wokesa unkabu weto. E salu kia umbangi kikutusadisa mpe mu bunda e vuvu kwa Yave yo sunda wonga wa wantu. (Ngana 29:25) Avo osongele unkabu muna salu kia umbangi owau, okala wakubama mu kwamanana sila umbangi kana nkutu vo ayadi basimini e salu kieto.—1 Tesalonika 2:2.
3. O zizidila lubangamu, nkia nluta dikututwasilanga?
Dialudi vo, ke vena muntu ko ozolanga bangikwa, kansi vava tuzizidilanga lubangamu, lukwikilu lweto lukumamanga. Tufinamanga Yave, kadi tumonanga e mpila kekutusadisilanga avo ke tuna yo nkuma wafwana ko. (Tanga Yakobo 1:2-4.) Yave ke yangalalanga ko vava tukalanga muna mpasi, kansi oyangalalanga vava tuzindalalanga. Bibila kivovanga vo: “Avo numweswa e mpasi wau nuvanganga mawete yo zizidila zo, ediadi dia luyangalalu kwa Nzambi.” (1 Petelo 2:20) Avo tuzindalele yakuna mbaninu, Yave okutuvana nsendo a moyo a mvu ya mvu muna nz’ampa yakondwa lubangamu.—Matai 24:13.
ZAYA DIAKA MANKAKA
Tala e kuma olenda kadila ye ziku vo olenda sikila ye kwikizi muna Yave kana nkutu vava tubangikwanga. Tala mpe nsambu olenda vua avo ovangidi wo.
4. Olenda zizidila lubangamu lwa esi nzo
Yesu watoma wo zaya vo akaka muna yitu yeto ke beyangalala ko avo tubakidi nzengo za sadila Yave. Tanga Matai 10:34-36, i bosi, vana e mvutu za kiuvu eki:
Nkia diambu dilenda vangama avo muntu mosi muna nzo obakidi nzengo za sadila Yave?
Muna zaya nona kimosi, tala e VIDEO, i bosi, vana e mvutu za kiuvu kilende.
Adieyi ovanga vo yitu yovo nkundi aku ozolele kusima wayambula sadila Yave?
Tanga Nkunga 27:10 ye Maku 10:29, 30. Vava otanga konso sono, vana e mvutu za kiuvu eki:
Aweyi e nsilu miami milenda kusadisila mu zizidila avo obangikilu kwa yitu yovo kwa akundi aku?
5. Kwamanana sambila Yave kanele vo lubangamu
Unkabu divavanga mu sadila Yave vava akaka bevavanga kutusima. Tala e VIDEO, i bosi, vana e mvutu za kiuvu kilende.
E nona ya mpangi bena mu video yayi, aweyi ikumikini?
Tanga Mavangu 5:27-29 ye Ayibere 10:24, 25. Vava otanga konso sono, vana e mvutu za kiuvu eki:
Ekuma dinina o mfunu twakwamanana sambila Yave, kana nkutu vo e salu kieto kia umbangi ye tukutakanu tweto tusiminu?
6. Yave okusadisa kimana wazindalala
E Mbangi za Yave, ambuta ye aleke mu nza yawonso, bekwamanananga sadila Yave ye kwikizi kiawonso, kana nkutu vava bebangikwanga. Muna zaya dina dikubasadisanga, tala e VIDEO. I bosi, vana e mvutu za kiuvu kilende.
Nze una omwene muna video, nkia diambu diasadisa mpangi zazi mu zizidila lubangamu?
Tanga Roma 8:35, 37-39 ye Filipi 4:13. Vava otanga konso sono, vana e mvutu za kiuvu eki:
Aweyi e sono yayi ilenda kumikina e vuvu kiaku kia sia vo olenda zizidila lubangamu?
Tanga Matai 5:10-12, i bosi, vana e mvutu za kiuvu eki:
Ekuma olenda kadila ye kiese kana nkutu vava obangikwanga?
Asambidi ayingi a Yave bezizidilanga lubangamu. Ngeye mpe olenda zizidila lubangamu!
AVO MUNTU UVOVESE VO: “Kilendi zizidila lubangamu ko.”
Nkia sono kilenda kunsadisa mu kala ye unkabu kavuidi o mfunu?
MAMBU MASINA MA LONGI DIADI
Yave oyangalelanga e ngolo tuvanganga za kunsadila kana nkutu muna lubangamu. Muna lusadisu lwandi, tulenda zizidila lubangamu.
Nkia Mambu Olongokele?
Ekuma Akristu bafwete vingila vo babangikwa?
Adieyi ofwete vanga owau kimana wakala wakubama vava lubangamu lukwiza?
Nkia diambu dilenda kusadisa mu kala ye ziku vo olenda sadila Yave kanele vo lubangamu?
TALA MPE OMA MALENDE
Tala una Yave kasadisila mpangi mosi mu zindalala vava kasiwa muna boloko, wau kalembi tambulwila kota muna salu kia kisoladi.
Tala diambu diasadisa akazi mosi mu sadila Yave ye kwikizi kiawonso kana nkutu muna lubangamu.
Tala una olenda zizidila lubangamu ye unkabu wawonso.
“Kubama Owau Muna Zizidila Lubangamu” (Eyingidilu dia Yuli, 2019)
Tala e kuma ke tufwete sivikila ko avo yitu yeto batubangikidi. Tala mpe una olenda kadila yo luvuvamu yo kwamanana ye kwikizi muna Yave avo diambu diadi dibwididi.
E Ludi ke Kitwasanga “Luvuvamu ko, Kansi Nsosolo Kaka” (Eyingidilu dia Okutoba, 2017)