‘Nukwamanana Kundanda’
1 Wantu ayingi bevavanga nkembo a yau kibeni, kansi ke bekalanga ye kiese ko. Nswaswani yo yau, o Yesu wakanikina e fu kia vana kuna mvevo eki kitwasanga e kiese. (Mav. 20:35) Wavova vo: ‘Konso muntu, ovo ozolele o kwiz’andandi, mbula kayivanina nkalu, . . . yo kwamanana kundanda.’ (Maku 8:34) Mayingi mevavwanga muna vanga wo, ke yambula kaka nkembo ko. Disongele vo e lumbu yawonso ke tuvavinge kiyangidika ko, kansi tuvavanga yangidika Yave.—Roma 14:8; 15:3.
2 Badika nona kia ntumwa Paulu. Muna kuma kia ‘nsita za zayi wa Kristu Yesu,’ wayambula zolela ya yandi kibeni, yo kivana emvimba mu nungununa salu kia Kintinu. (Fili. 3:7, 8) Paulu wavova vo: ‘Muna kiese kiayingi i yavanina ye kukivana’ muna sadila akaka. (2 Kor. 12:15) Konso muntu kafwete kiyuvula: ‘Aweyi isadilanga ntangw’ame ye ngolo ye ngangu ye mavwa mame? Nga zolela yame kaka itokanenanga yovo Yave ivavanga yangidika?’
3 Sadila Konso Elau mu Kayila Akaka: Konso mvu, nkangu a Nzambi usalanga ola zayingi muna samuna nsangu za Kintinu zivuluza wantu. Muna konso nkutakani, ambuta y’aleke besalanga salu ya mpila mu mpila yitwasanga nluta kw’akaka. Vena mpe ye salu yayingi isalwanga muna tukutakanu twampwena ye kia tunga yovo tungulula maseka mesadilwanga mu nungununa nsambila ya ludi. Yindula mpe lusadisu lwampwena bevananga ampangi bena mu Comissão de Ligação Hospitalar ye Buka kia Akuluntu kia Kingula Mbevo. E mpila bekuyivaninanga kuna mvevo ampangi awaya, nluta miayingi itwasanga muna kintwadi kieto kia Kikristu.—Nku. 110:3.
4 Muna ntangwa sumbula yovo mpasi zakaka, tukalanga y’elau dia sadisa wantu mu mpila zayingi. Nanga tulenda bakula vo mpangi eto wa Nkristu lusadisu yovo lukasakeso kavwidi o mfunu. (Nga. 17:17) Vava tukuyivananga mu sadila akaka yo nungununa salu kia Kintinu, mbandu a Yesu tulandanga. (Fili. 2:5-8) Yambula twavanganga wo ntangwa zawonso.