Kaisa Auguseto wa ntinu a Roma, osikidisi vo wantu awonso bafwete kuyisonekesa. Muna kuma kiaki, Yosefe yo Maria bele kuna mbanz’a Beteleme, kuna sude ya Yerusaleme.

Wantu ayingi bena muna Beteleme mu kuyisonekesa. Yosefe yo Maria, wau balembele solola fulu kia leka mu kuma kia ndonga, balwakidi mu mpak’a mabuluku ye bulu yankaka. Yesu i mûna kawutukidi. Maria otomene kumvuika ye kunzinga vana nlele, i bosi untudidi vana dikilwa kia bulu.

Tulenda vova vo Nzambi osadidi Kaisa Auguseto mu vana o nsiku wa kuyisonekesa. Ekuma? E kuma kadi disadisi kimana Yesu kawutukila muna Beteleme, vata dia Davidi wa nkulu andi. Tuka kolo, e Sono yasakula vo Beteleme i mbanza iwutukila o Ntinu wasilwa o nsilu.—Mika 5:2.

O unu, wantu ayingi bekwikilanga vo Yesu kia 25 kia ngonde a Desemba kawutuka. Kansi, muna zunga kia Beteleme, e ngonde a Desemba, nsungi a mvula, kiozi ye wunge diayingi. Muna ngonde yayi, avungudi yo mameme ke balekanga mu nzanza ko. Ke diadi lendakana ko kwa Ntinu a Roma kalomba kwa nkangu wankolamenanga bavanga nkangalu wandá muna ngonde yayi yampasi mu kwenda kisonekesa. E ziku isonganga vo, Yesu mu lubantiku lwa ngonde a Okutoba kawutuka.