Mwan’a Muntu Osengomonwa

Yesu wakinu kaka muna Samaria yovo muna Ngalili. Afarisi banyuvuidi e ngiz’a Kintinu, kadi babenze vo nkinzi miampwena mivangama. Kansi, Yesu ubavovese vo: “E Kintinu kia Nzambi vava kikwiza ke kimoneka ko; ngatu wantu bavova vo, ‘Tal’oku!’ yovo ‘Kuna!’ Kadi, e Kintinu kia Nzambi ova kati kweno i kina.”—Luka 17:20, 21.

Akaka bayinduidi vo nanga Yesu edi kavovele vo, e Kintinu mu yala kina muna ntima mia selo ya Nzambi. Ediadi ka dilendi vangama ko, kadi e Kintinu ke kina muna ntima mia Afarisi ko, bemokenanga yo Yesu. Kansi, kina vana kati kwau kadi o Yesu, una vo i Ntinu wasolwa muna Kintinu kia Nzambi, una vamosi yo yau.—Matai 21:5.

Afarisi bele kwau. I bosi, Yesu ovovele diambu diankaka kwa alongoki andi mu kuma kia ngiz’a Kintinu. Ovovele vo: “E lumbu ikwiza, ina nukala ye tima dia mona lumbu kimosi muna lumbu ya Mwan’a muntu, kansi ke numona kio ko.” (Luka 17:22) Muna mvovo miami, Yesu osongele vo Mwan’a muntu oyadikwa e Kintinu kuna sentu. Wau kina vo e ntangwa ke yafwene ko, akaka muna alongoki andi bevava zaya e diambu diadi, kansi ke balendi dio zaya ko yavana kifwana e ntangwa ina o Nzambi kasikidisa e ngiz’a Mwan’a muntu.

Yesu ovovele diaka vo: “Wantu bekunuvovesa vo, ‘Tala kuna!’ yovo ‘Tal’oku!’ Ke nuvaiki ko, ke nubalandi ko. Kadi nze una nsemo utemenanga kuna sambu dimosi dia zulu yo mwesesa yakuna sambu diankaka dia zulu, i una ukal’o Mwan’a muntu muna lumbu kiandi.” (Luka 17:23, 24) Aweyi alongoki a Yesu bekuyitanina mu lembi landa masia zaluvunu? Yesu ovovele vo e ngiz’a Masia wakieleka ikala nze ntemo umonekanga kuna vala. Disongele vo, vava keyadikwa e Kintinu wantu awonso bezaya wo.

I bosi, Yesu otezanese e fu ya wantu muna ngiz’a Kintinu ye mambu mavangama kuna nz’ankulu. Ovovele vo: “Wauna wakala muna lumbu ya Noa, i una mpe ukala muna lumbu ya Mwan’a muntu . . . Diau adimosi mpe muna lumbu ya Loti: badianga, banuanga, basumbanga, batekanga, bakunanga, batunganga. Kansi muna lumbu kiavaika Loti muna Sodomo, kianoka tiya yo nlengo watuka kuna zulu, wafwasa yau awonso. I wau mpe ukala muna lumbu kisengomok’o Mwan’a muntu.”—Luka 17:26-30.

Yesu kavovele ko vo o wantu muna lumbu ya Noa ye Loti bavondwa mu kuma kia dia, nua, sumba, teka, kuna mbongo yo tunga nzo. Noa, Loti ye esi nzo zau, mambu mama bavanganga. Kansi o nkangu wakivana mu mambu mama lembi sia e sungididi muna luzolo lwa Nzambi yo vilakana e kolo kiambi bazingilanga. Dianu vo, Yesu olukisi alongoki andi batoma sia e sungididi muna vanga luzolo lwa Nzambi una ufwene. Ubasongele dina bafwete vanga muna vuluzwa vava o Nzambi ketwasa lufwasu kuna sentu.

Alongoki ke bafwete yambula ko vo e lekwa ya nza, “lekwa basisa,” yabafwisa e diya. Yesu ubavovese vo: “Muna lumbu kiakina, ona owanuka vana nludi a nzo, kakulumuki ko mu kwenda bonga salanganu yandi ina muna nzo, diau dimosi mpe, ona owanuka kuna mpatu, kavutukila ko ina kasisidi ku nima. Nusungamena nkaz’a Loti.” (Luka 17:31, 32) Tuzeye wo vo wakituka se lunzi dia mungwa.

Yesu osasidi diaka una ukadila o mambu vava o Mwan’a muntu keyala se Ntinu. Ovovese alongoki andi vo: “Muna fuku wauna, wantu wole bekala vana mfulu mosi; mosi obongwa, wankaka obembolwa.” (Luka 17:34) Disongele vo, akaka bevuluzwa, akaka bebembolwa, i sia vo, bevidisa mioyo miau.

Alongoki banyuvuidi vo: “Akweyi, e Mfumu?” Yesu ubavutwidi vo: “Konso kuna kwina e fwila, i kwau kuna kulungalakena mbemba.” (Luka 17:37) Kieleka, akaka bekala nze ngo-zulu. I alongoki ana belanda Kristu wakieleka, Mwan’a muntu. Muna kolo kiakina, Yesu ovana alongoki andi e ludi kivananga moyo kwa awana bena yo lukwikilu.