Nga Olenda Soba e Ndekwa Zaku za Sila Umbangi?
1. E nsobani zivangamanga ova nza, zivavanga vo twasoba nkia mambu?
1 Muna 1 Korinto 7:31 Nkand’a Nzambi utezanesanga e nza yo wantu bevanganga yimpa kuna tenda nkongolo. E nsobani zivangamanga ova nza, zivavanga vo konso ntangwa twasobanga e ndekwa zeto za sila umbangi, nkubika ye nsunzula zeto. Nga olenda soba e ndekwa zaku za sila umbangi?
2. Ekuma tufwete vangilanga ngolo mu diata kumosi ye nkubik’a Yave?
2 Ndekwa za Sila Umbangi: Nkumbu miayingi e nkutakani a Kikristu yisobanga e ndekwa. E nkumbu antete o Yesu katuma alongoki andi, wabavovesa vo ke banati madia ko yovo nzimbu muna nkutu zau. (Mat. 10:9, 10) Kansi kuna kwalanda, Yesu wasoba luludiku lwalu muna kubika alongoki andi mu kuma kia lubangamu lukubalwakila yo lunungunuku lwa salu kia umbangi muna zunga yakaka. (Luka 22:36) Muna mvu mialanda, e nkubik’a Yave yayantika sadila ndekwa zaswaswana za sila umbangi, nze kalu dia makina mawisa e ndinga, microfone mia Radio, fonógrafo ye cartões de testemunho, e sadilwa yayi betela yakala ye mana mavavwanga muna ntandu kiakina. Wau vo o unu wantu ayingi mu zunga ke bewanukanga mu nzo zau ko, tukasakeswanga vo twasilanga umbangi mu nzo ye nzo, muna fulu ya ndonga ye kuna kinsalukisa. Tukasakeswanga mpe mu sila umbangi muna nzo ye nzo muna nkokela mu kuma kia awana ke bewanukanga ku nzo ko muna mwini. Ekolo ekalu di’ezulu dia Yave didiatanga yo soba maka mambu, nga ovanganga e ngolo mu diata diau kumosi?—Yez. 1:20, 21.
3. O sobanga e moko aweyi dilenda kutusadisila mu lungisa e salu kieto kia umbangi una ufwene?
3 Nsunzula Zaku: Nkia mambu betoma tokanenanga o wantu mu zunga kiaku? Nzimbu? Zingu kia nzo? Vita? Diambote twazayanga mambu metokanesanga wantu mu zunga kieto, ediadi dikutusadisa mu sadila e nsunzula zina betela ye nsatu zau. (1 Kor. 9:20-23) Vava muntu kevovanga dina dikuntokanesanga, vana fulu kia vova kwayingi yo sadila kaka e nsunzula zina tukubikidi, diambote twasoba e moko yo wizanesa kio ye dina dikuntokanesanga.
4. Ekuma tufwete sobelanga e ndekwa zeto mu nzaki zawonso?
4 Ke kolo ko e yimpa yansuka ya nza yayi yifokoka, e mpasi zayingi ziyantika. “E kolo kikufamene.” (1 Kor. 7:29) Diamfunu kikilu twasobanga e ndekwa zeto za sila umbangi yo vanga wo mu nzaki zawonso kimana twalungisa e salu kieto mu kolo kiaki kiakete tusidi kiau.