Adieyi Tulenda Longoka mu Kuma kia Kimpumbulu Kimosi?

E kimpumbulu tuvovela i ndioyo omokenanga yo Yesu mu fwanisa kiaki. O kimpumbulu ndioyo mu kuyibanza kena mu kuma kia mavangu mandi ma nsoki. Walomba kwa Yesu vo: “Ungindula vav’oluaka muna kintinu kiaku.” Nze una omwene muna fwaniswa kiaki, Yesu una mokena yo kimpumbulu kiaki. Nga ozeye adieyi Yesu kena kumvovesa?​—a Yesu una kumvana nsilu vo: ‘Kieleka o unu isamunwini vo, okala yame muna Paradiso.’

Aweyi obenze ikala e Paradiso?—Muna baka e mvutu za kieleka, yambula twabadika e Paradiso ina kavanga Nzambi mu kuma kia yakala yo nkento antete, Adami yo Eva. Akweyi yakala e Paradiso yayina? Ku zulu yovo va ntoto?—

Olungidi kwaku, va ntoto yakala. Ozevo, o kimpumbulu ndioyu ozinga ova ntoto vava ukituka se “Paradiso.” Aweyi ikadila e paradiso?—Yambula twafimpa diambu diadi.

Vava Yave wa Nzambi kavanga Adami yo Eva wa yakala yo nkento antete, o Nkand’a Nzambi ukutuzayisanga vo Yave wabasia muna paradiso ova ntoto. Yayikilwanga vo “mpatu a Edene.” Nga olenda yindula una yakala e “mpatu a Edene”?—Elo, fulu kiambote-mbote kiakala muna zingila, ka kilendi tezaneswa nkutu ye konso fulu ko o unu.

Adieyi obenze? Nga Yesu okala ova ntoto yo kimpumbulu ona wakendalalanga mu kuma kia masumu mandi?—Ve. O Yesu okala kun’ezulu se Ntinu yo yala o ntoto ukituka se Paradiso. Ozevo, Yesu okala yo kimpumbulu vava kekumfula muna mafwa yo lunga-lunga nsatu zandi ova ntoto muna Paradiso. Ekuma Yesu ke yambulwila vo kimpumbulu kazingila mu Paradiso ova ntoto?—Yambula twafimpa e diambu diadi.

Dialudi vo kimpumbulu ndioyo mambu mayingi mambi kavanga. Kansi, ndonga bazinga kala ova ntoto, ayingi muna yau mpe bavanga mambu mambi kadi ke bazaya Yave ko ye nkanikinu miandi.

O wantu awaya kumosi yo kimpumbulu ona wamokena yo Yesu vana nti ampasi, befulwa kimana bazingila mu Paradiso ova ntoto. Belongwa kimana bazaya luzolo lwa Nzambi. I bosi, bekala y’elau diasonga kana vo Yave bezolanga yovo ve.

Aweyi bevangila wo?—Muna vanga mana Nzambi kevavanga kwa yau. Ekwe kiese tukala kiau kia zingila muna Paradiso kumosi yo wantu bezolanga Yave ye akaka!