Tempelo Iveleleso Diaka

Yesu ye alongoki andi lumbu tatu bena muna Betania, tuka bakatukila kuna Yeriko. Kina Kiamosi muna mene, kia 10 kia Nisani, bele kuna Yerusaleme. Muna nzila, Yesu omwene nzala. Dianu vo, vava kamwene nti a nsanda, wele wo tala. Nga bundu ina mo e?

E ngonde ya Malusu se ifokoka, vo i bundu ya nsanda mu ngonde a Yuni iwutanga. Kansi o nti a nsanda uzele yo makaya. Nanga, Yesu edi kabenze vo o nsanda uwutidi kala bundu yantete. Vava kalueke vana ndambu, omwene vo ke muna kwandi bundu ko. Wau vo nti a nsanda uzele yo makaya, diasazu mu yindula vo bundu ina mo. I bosi, Yesu ovovese nti a nsanda vo: “Omo ngeye ke mudiwa diaka bundu ko.” (Maku 11:14) Vana vau, o nti a nsanda uyantikidi yuma. E nsas’a diambu diadi mbazi kaka izayakana.

Yesu ye alongoki andi bele kwau, balueke muna Yerusaleme. Yesu wele muna Tempelo ina kavelelese mazono mu masika. O unu mayingi kavangidi muna tempelo, ovangidi dina kavanga se vioka mvu tatu kuna Nkinzi a Nduta ya mvu wa 30 wa tandu kieto. (Yoane 2:14-16) Owau Yesu ovaikisi “awana batekelenge yo sumba muna tempelo, okindwidi e meza ma mimbudi a nzimbu ye kunda ya awana batekelenge mayembe.” (Maku 11:15) Kavene nswa ko kwa wantu benatanga e lekwa kuna sambu diankaka dia mbaza baviokelanga vana yanzala kia tempelo.

Ekuma o Yesu kavaikisidi mimbudi a nzimbu ye minteki mia bulu muna tempelo? Yesu ovovele vo: “Nga ke diasonama ko vo, ‘E nzo ame iyikilwa vo nzo a sambu kwa zula yawonso’? Kansi oyeno nukitwidi yo se nzo a mivi.” (Maku 11:17) Yesu ubayikidi vo mivi, kadi ntalu ayingi belombanga kwa wantu bazolele sumba e bulu muna kela yimenga. Kuna kwa Yesu, oyau mivi.

Dianu vo, nganga zambuta, asoneki ye mbuta za nkangu, vava wawidi dina o Yesu kavangidi, bavavidi diaka kumvonda. Kansi, bawananene ye diambu diampasi. Ke bazeye ko dina bevanga muna vonda Yesu, kadi o nkangu mu kwiza wina kwa yandi yo wá malongi mandi.

Ke Ayuda kaka ko bezidi ku nkinzi a Nduta. Vezidi mpe minkwikila mia kiyuda, i sia vo, zula yankaka yakota muna nsambil’a kiyuda. Vana kati kwau, vena ye Mingerekia bezidi sambila Nzambi muna nkinzi wau. Bezidi kwa Filipi, nanga nkumbu andi ya Kingerekia ibatuntidi e sungididi. Bamvovese vo Yesu bazolele monana yandi. Filipi obenze vo nanga ke diambote ko bamonana yo Yesu, dianu vo omokene diambu diadi yo Andere. Yau awole banete diambu diadi kwa Yesu, nanga wakinu muna tempelo.

Yesu ozeye wo vo ke kolo ko fwa ke kwa, kansi eyayi ke ntangwa ko yavanga luzolo lwa wantu yovo vanga diambu difila o nkangu mu sivika. Dianu vo, muna vana e mvutu kwa ntumwa zole, Yesu ubatelele kingana, ovovele vo: “E ntangwa ifwene kimana o Mwan’a muntu kakembeswa. Kieleka, kieleka, inusamunwini vo, e mbwaz’a disa, avo ilembele bwa muna ntoto yo fwa, imosi kaka ikala; kansi avo ifwidi, mbongo yayingi iwuta.”—Yoane 12:23, 24.

Mbwaza imosi ya disa ilenda moneka vo ke ina kwandi mfunu ko. Kansi, avo ikuninu, i sia vo “ifwidi,” ilenda mena yo yima disa diazala ye mbwaza zayingi. Diau dimosi mpe, Yesu muna sikila ye kwikizi kwa Nzambi yamuna lufwa, wakituka se nzila mu vana moyo a mvu ya mvu kwa ndonga ikuyivananga emvimba mu vanga luzolo lwa Nzambi. Yesu wavova vo: “Konso ona ozolele o moyo andi fwasa kefwasa wo, konso ona omenga moyo andi omu nza yayi, lunda kelunda wo yamuna moyo a mvu ya mvu.”—Yoane 12:25.

Yesu ke yindulanga kaka wete dia yandi kibeni ko. Ovovele vo: “Avo muntu ozolele kunsadila, yambula kandanda, konso oku ngina, i kuna mpe kekala selo kiame. Avo muntu ozolele kunsadila, o Se diame okunzitisa.” (Yoane 12:26) Ekwe nsendo ambote! O wantu ana bezitiswanga kwa Nzambi beyala kumosi yo Kristu muna Kintinu.

Wau vo Yesu mu yindula kena e mpasi kemweswa ye mfwa kefwa, ovovele vo: “O moyo ame utelamene, aweyi mvova? E Tata, umpuluza omu ntangwa yayi.” Kansi o Yesu kazolele vunzanesa luzolo lwa Nzambi ko. Muna kuma kiaki, ovovele diaka vo: “Muna diambu diadi kaka i ndwakìdi omu ntangwa yayi.” (Yoane 12:27) Muna mvovo miami, Yesu otondele vo mawonso mana Nzambi kakana malungana, kumosi mpe yo lufwa lwandi se kimenga.