Yesu I Nzila, I Ludi Yo Moyo

E kolo Yesu kena muna suku ye alongoki andi kuna mfoko a luyindulu, ubakasakese vo: “Ke nutelamwa mioyo ko. Nukwikila muna Nzambi; nukwikila mpe omu mono.”—Yoane 13:36; 14:1.

Yesu ovovese alongoki andi balembi kendalala mu kuma kia ngiend’andi. Ovovele vo: “Muna nzo a Se diame fulu yayingi ina mo. . . . Avo ngiele kunukubikil’e fulu, se yavutuka yanutambula, kimana konso kuna ikala, oyeno mpe nwakala ko.” Kansi alongoki ke babakwidi ko vo Yesu ngiend’andi kuna zulu kavovele. Muna kuma kiaki, Toma unyuvuidi vo: “E Mfumu, kuna okwenda ke tuzeye ko ko. Aweyi tulenda zayila e nzila?”—Yoane 14:2-5.

Yesu umvutuidi vo: “Mono i nzila ye ludi yo moyo.” Ndiona kaka otambulwilanga Yesu, olemvokelanga malongi mandi yo tanginina mpila zingu kiandi, yandi kaka olenda kota muna nzo a se diandi kuna zulu. Yesu ovovele vo: “Ke vena ona okwiza kwa Se ko avo ke mu mono ko.”—Yoane 14:6.

Filipo mu wá kena ye sungididi kiawonso, olombele vo: “E Mfumu, utusonga o Se, i diau kaka tuzolele.” Filipo ozolele vo Nzambi kansonga mona-meso nga kina o Mose, Eleya yo Yesaya bamona. Kansi antumwa bena ye diambu disundidi e mona-meso. Yesu umvovese vo: “E Filipo, kolo kiayingi se ngina yeno, kunzeye kaka ko e? Konso ona umbwene, omwene mpe o Se.” Yesu watoma fwanana yo Se diandi muna fu. Muna diadi, okala kumosi yo Yesu yo malongi mandi dina nze muntu wina yo Se. Dia ludi vo, o Se osundidi o Mwana, kadi o Yesu ovovele vo: Mana inuvovese, kivovele mo mu ngindu za mono kibeni ko.” (Yoane 14:8-10) Muna malongi mandi, antumwa babakwidi vo Yesu ovene o nkembo wawonso kwa Se diandi.

Antumwa za Yesu bamwene kala Yesu vava kavangidi nsinsu yanene yo wá malongi mandi vava kasamuini e nsangu zambote mu kuma kia Kintinu kia Nzambi. Owau Yesu ubavovese vo: “Konso ona okwikilanga omu mono, ovanga mpe mana ivanganga; ovanga nkutu mana masundidi o mama.” (Yoane 14:12) Yesu kavovele ko vo alongoki bevanga masivi masundidi mana kavanga. Kansi besila umbangi mu kolo kiayingi, besamuna mu zunga yayingi ye kwa wantu a mpila mu mpila.

Kansi o Yesu ke kubabembola ko vava kekwenda kwandi.Ubasikidisi vo: “Avo nulombele má muna nkumbu ame, ikunuvana kio.” Ubavovese diaka vo: “Se yalomba kwa Se kanuvana nsadisi ankaka kakala yeno yakwele mvu, o mwand’a ludi.” (Yoane 14:14, 16, 17) Yesu ubavovese vo betambula mwand’avelela, ukala se nsadisi. Ediadi diavangama muna lumbu kia Pentekosti.

Yesu ovovele vo: “Ke kolo ko e nza ke ikumbona diaka ko, kansi oyeno nukumbona, kadi ngina o moyo, oyeno mpe nukal’o moyo.” (Yoane 14:19) Kuna nim’a lufuluku lwandi, Yesu omoneka kwa alongoki andi ye nitu a kinsuni. Kuna sentu okubafula kimana kakala yau kuna zulu se vangwa ya mianda.

Owau Yesu olongele vo: “Konso ona una ye nkanikinu miame yo lunda mio, i yandi unzolele. Konso ona unzolele, o Se diame mpe okunzola, omono ikunzola, ikuyisengomona kwa yandi.” Yuda wa ntumwa oyikilwanga mpe vo Tadia, oyuvuidi Yesu vo: “E Mfumu, adieyi dibwidi ozolele kuyisengomona kwa yeto kansi ke kwa nza ko e?” Yesu umvutwidi vo: “Avo muntu unzolele, e diambu diame olunda dio, o Se diame okunzola, . . . Konso ona olembi kunzola, ke lunda mambu mame ko.” (Yoane 14:21-24) Nswaswani ye alongoki, o wantu a nza ke bazolele kwikila ko vo Yesu i nzila, i ludi yo moyo.

Vava o Yesu kekwenda kwandi, aweyi alongoki besungamena malongi mandi mawonso? Yesu osasidi vo: “O nsadisi, o mwand’avelela, una o Se ketuma muna nkumbu ame, ukunulonga mambu mawonso yo kunusungamesa mawonso inuvovese.” Alongoki bamwene o nkuma wa mwand’avelele. Ediadi dibafiaulwisi yo kubakasakesa. Yesu okudikidi vo: “Luvuvamu inusisìdi; inuvene luvuvamu lwame. . .  Ke nutelamwa moyo ko ngatu mona wonga.” (Yoane 14:26, 27) Alongoki bavuidi kuma kiasikila mu lembi kendalala, kadi betwadiswa yo lungwa-lungwa kwa Se dia Yesu.

Ke kolo ko, o lutaninu lwa Yave lumoneka. Yesu ovovele vo: “O nyadi a nza mu kwiza kena, kena ye wisa ko omu mono.” (Yoane 14:30) O Nkadi ampemba wakota muna Yuda yo kumvukumuna. Kansi wau vo Yesu walunga, kena yo lutovoko ko lulenda sadilwa kwa Satana muna kumvukumuna kayambula sadila Yave. Nkadi ampemba mpe kelenda simbinina Yesu muna ziami ko yakwele mvu. Ekuma? Yesu ovovele vo: “Wauna o Se kankanikina i wau mvanga.”—Yoane 14:31.