Bafwete Yima Mbongo Yo Kala Akundi A Yesu

Yesu mu kasakesa kena alongoki andi yo mokena yau wauna akundi bemokenenanga. E ola kwandá se ina, nanga mu dingi-dingi. Yesu ubatelele kingana, oku vo:

“Mono i nsing’a vinyu aludi, o Se diame i mvati.” (Yoane 15:1) E kingana kiandi kiafwanana ye dina diavovua mu tandu yavioka mu kuma kia nkangu a Isaele, ona wayikilwanga vo nsing’a vinyu a Yave. (Yeremiya 2:21; Osea 10:1, 2) Kansi owau, Yave se kebembola e zula kia Isaele. (Matai 23:37, 38) I dianu o Yesu kekubazayisilanga mambu mampa. Yandi i nsing’a vinyu una o Se diandi kevatanga tuka kankusila muna mwand’avelele muna mvu wa 29 wa tandu kieto. Yesu osongele vo nsing’a vinyu mayingi usunzulanga, ke yandi kaka ko. Ovovele vo:

“[O Se diame] konso tayi kina omu mono kilembi yima bundu zenga kezenga kio, konso kina kiyima bundu vangila kevangila kio kimana kiatoma yima. . . . Nze una tayi ke ilendi yima bundu ko avo ke ina mu nsing’a vinyu ko, oyeno mpe ke nulendi yima bundu ko avo ke nuna yame ntwadi ko. Mono i nsing’a vinyu; oyeno nu tayi.”—Yoane 15:2-5.

Yesu wakanikina alongoki andi akwikizi vo, vava ke kwenda okubatwikila nsadisi, i sia vo mwand’avelela. Vava kiavioka lumbu 51, alongoki yo wantu ankaka ana batambula o mwanda wau, bakituka se tayi ya vinyu. E “tayi” yawonso iyikakiana yo Yesu. Ekuma?

Yesu osasidi vo: “Konso ona okala yame ntwadi, omono mpe ikala yandi e ntwadi, oyima bundu yayingi; kadi avo ke nuna omu mono ko ke nulendi vanga diambu ko.” E “tayi” yayi i alongoki akwikizi a Yesu, beyima mbongo ayingi muna tanginina fu ya Yesu, muna samuna nsangu zambote mu kuma kia Kintunu kia Nzambi yo kitula wantu ayingi se alongoki. Adieyi tuvova kele vo muntu kakwamanene kala ntwadi yo Yesu ko yo lembi yima mbongo? Yesu ovovele vo: “Konso ona olembi kala yame e ntwadi, vetwa kevetwa.” Ovovele diaka vo: “Avo nukala yame e ntwadi ye diambu diame mpe diakala omo yeno, konso dina nulomba divangama kwa yeno.”—Yoane 15:5-7.

Yesu ovutukidi e diambu dina kavova nkumbu miole: Lemvokela nkanikinu miandi. (Yoane 14:15, 21) Ovovele e mpila yamfunu ina alongoki balenda songela vo bevanganga wo. Ovovele vo: “Avo nulunda nkanikinu miame, nusikila muna zola kwame, wauna omono ilundilanga nkanikinu mia Se diame yo sikila muna zola kwandi.” Kansi, mayingi mevavuanga, ke zola kaka Yave wa Nzambi ko yo Mwan’andi. Yesu ovovele vo: “I nkanikinu ame wau, nuzolaziananga wauna inuzolele. Ke vena muntu ko wina ye nzola isundidi yayi, i sia vo muntu kayekola moyo andi muna wete dia akundi andi. Oyeno nu akundi ame avo nuvangidi oma inukanikini.”—Yoane 15:10-14.

Ke kolo ko, Yesu osonga o zola kwandi muna vana moyo andi muna wete dia wantu awonso besonganga e kwikizi muna yandi. E mbandu andi yafwana sadisa alongoki andi mu songa nzol’a mvevo kwa muntu yo nkwandi. E nzola yayi ikubaswaswanesa, kadi Yesu wavovele vo: “Muna wau i bezayila o wantu awonso vo nu alongoki ame—avo nzolani nuna yau.”—Yoane 13:35.

Antumwa bazeye wo vo Yesu okubayikilanga vo “akundi.” Yesu osasidi e kuma kevangilanga wo, ovovele vo: “Inuyikidi se akundi, kadi inuvovese mawonso yawa kwa Se diame.” Ngwizani ambote kikilu bena yau, akundi akieleka a Yesu, bazeye nkutu mana o Se diandi kamvovesa. Kansi muna yangalela e kikundi kiau yo Yesu, ‘bafwete kwamanana yima bundu.’ Tala dina Yesu kavovele avo bavangidi wo: “konso mana nulomba kwa Se muna nkumbu ame, [okunuvana] mo.”—Yoane 15:15, 16.

O zola vana vena “tayi” yayi, i sia vo alongoki, kukubasadisa muna zizidila e mpasi zikubabwila. Yesu ubalukisi vo, e nza ikubamenga, kansi ubafiaulwisi oku vo: “Avo nza ikunumenga, nuzaya wo vo mono yateka menga. Kele vo nukala nwa nza, e nza yadi zola eyandi. Wau vo ke nwa nza ko, . . . muna diadi e nza ikunumenga.”—Yoane 15:18, 19.

Yesu otomene kubasasila ekuma e nza ikubamengena, ovovele vo: “Bekunuvanga mambu mama mawonso muna diambu dia nkumbu ame, kadi Ndiona wantuma ke banzeye ko.” E masivi ma Yesu metumbanga awana bekumenganga, ovovele vo: “Kala vo kiavanga ko vana bena o mavangu mana ke masidi vanga muntu ko, ke badi nata sumu ko; kansi owau bambwene, bambengene kumosi yo Se diame.” O lumengo lwalu lulungisi o ungunza wasakulwa.—Yoane 15:21, 24, 25; Nkunga 35:19; 69:4.

Yesu osidi diaka nsilu kwa alongoki andi vo okubatwikila nsadisi, i sia vo mwand’avelela. O nkuma wau uvewanga kwa awosonso belandanga Yesu. Mwanda wau ukubasadisanga mu yima bundu yo “sila umbangi.”—Yoane 15:27.