LONGI DIA 38
Vutulanga Matondo Muna Lukau lwa Moyo
Okala moyo dikutuvananga e lau dia vanga yo yangalela mambu mayingi mambote. Kana nkutu vava tuwanananga ye mambu mampasi, tulenda kala ye kiese. Aweyi tulenda songela kwa Yave vo tuvutulanga matondo muna lukau lwa moyo katuvana? Nkia kuma kisundidi kikutufilanga mu vanga wo?
1. Ekuma tufwete zitisilanga o moyo?
Tufwete zitisanga o moyo kadi i lukau lwa Yave wa Se dieto dia nzodi. Yandi i “nto a moyo,” i sia vo, yandi wavanga o moyo. (Nkunga 36:9) “Yandi kibeni wavana moyo ye fulumwinu kwa wantu awonso ye lekwa yawonso.” (Mavangu 17:25, 28) E sono kiaki kisonganga vo Yave okutuvananga yawonso tuvuidi o mfunu muna zinga. Kansi, ke diau kaka ko kevanganga. Yave okutuvananga lekwa yaswaswana mu yangalela e zingu.—Tanga Mavangu 14:17.
2. Aweyi tulenda songela kwa Yave vo tuvutulanga matondo muna lukau lwa moyo katuvana?
Yave okulunga-lunganga tuka muna lumbu kina wayantika vangama muna vumu kia ngudi aku. O Davidi wa selo kia Nzambi wavova vo: “Meso maku mambona vava yakala muna vumu.” (Nkunga 139:16) O moyo aku mfunu kikilu wina kwa Yave. (Tanga Matai 10:29-31.) Yave otoma kendalalanga vava muntu kevondanga nkwandi yovo kukivonda.a (Luvaiku 20:13) Olenda mpe kendalala avo ke tuyikebele ko yo sia moyo eto ye mioyo mia akaka mu vonza. Vava tulunga-lunganga mioyo mieto yo zitisa mioyo mia wantu ankaka, tusonganga vo tuvutulanga matondo muna lukau lwamfunu lwa moyo.
ZAYA DIAKA MANKAKA
Tala mpila zankaka olenda songela vo ovutulanga matondo muna lukau lwa moyo.
3. Lunga-lunganga mavimpi maku
E selo ya Yave basia nsilu wasadila zingu kiau kiawonso muna salu kiandi. Wau vo Akristu ‘batambika e nitu zau se kimenga . . . kiavauka kwa Nzambi,’ bafwete zo toma lunga-lunganga. Tanga Roma 12:1, 2, i bosi, vana e mvutu za yuvu eyi:
Nkia diambu difwete kufila mu lunga-lunga mavimpi maku?
Nkia mpila olenda wo vangila?
4. Toma keba walembi twasa vonza yovo lufwa
Bibila kikutuvovesanga vo twavenga mambu malenda kututwasila vonza. Tala e VIDEO ilende mu zaya maka mambu olenda vanga muna kuyilunga-lunga.
Tanga Ngana 22:3, i bosi, yika una ngeye kibeni ye akaka nulenda vengela e vonza . . .
muna nzo.
kuna salu.
muna ntangw’a nsaka.
vava onatanga e kalu yovo natwa muna kalu.
5. Zitisanga o moyo a mwana tuka muna vumu
Davidi wasasila vo moyo a mwana una muna vumu kia ngudi andi mfunu wina kwa Yave. Tanga Nkunga 139:13-17, i bosi, vana e mvutu za kiuvu eki:
Kuna kwa Yave, o moyo a muntu nkia ntangwa uyantikanga, vava kekalanga muna vumu kia ngudi andi yovo vava kewutukanga?
Kuna Isaele yankulu, Yave wasikidisa nsiku miataninanga o ngudi yo mwana wakalanga muna vumu kiandi. Tanga Luvaiku 21:22, 23, i bosi, vana e mvutu za yuvu eyi:
Yave aweyi kabadikilanga muntu avo ovondele mwana una muna vumu kia ngudi lembi wo kana?
Aweyi kemonanga avo muntu ovangidi wo kuna lukanu?b
Adieyi obenze muna mpila Nzambi kebadikilanga e vangu dia katula vumu?
Kana nkutu ngudi ona ozitisanga o moyo olenda mona vo kena ye diambu diankaka ko kalenda vanga avo ke katula e vumu ko. Tanga Yesaya 41:10, i bosi, vana e mvutu za yuvu eyi:
Avo nkento okomekeno kavanga diambu diadi, kwa nani kafwete lomba lusadisu? Ekuma?
AVO MUNTU UVOVESE VO: “Konso nkento wayimita una ye nswa wakatula vumu, kadi yandi una wayimita.”
Nkia ziku una kiau vo moyo wa ngudi ye moyo wa mwana muna vumu mfunu wina kwa Yave?
MAMBU MASINA MA LONGI DIADI
E Bibila kikutulonganga vo twasonganga zola, luzitu ye yangalela lukau lwa moyo Yave katuvana. Disongele vo moyo eto ye mioyo mia wantu ankaka.
Nkia Mambu Olongokele?
Ekuma moyo winina wamfunu kwa Yave?
Aweyi Yave kemonanga avo muntu ukivondele yovo ovondele nkwandi kuna lukanu?
Ekuma oyangalelanga lukau lwa moyo?
TALA MPE OMA MALENDE
Aweyi tulenda vutulwila matondo kwa Yave muna lukau lwa moyo?
Nga Nzambi olenda loloka nkento wakatula e vumu?
“Adieyi Bibila Kivovanga mu Kuma kia Katula Vumu?” (Longi dina muna jw.org)
O zaya una Nzambi kebadikilanga moyo dilenda kutusadisa mu sola e nsaka zina vo zambote.
“Esportes Radicais—Vale a Pena Correr o Risco?” (Sikama!, 8 Okutoba, 2000)
Adieyi tuvova avo muntu obakamene ngindu zakukivonda? Tala una Bibila kilenda kunsadisila.
a Yave otokananga mu kuma kia awana babudika e ntima. (Nkunga 34:18) Obakulanga e mpasi zilenda fila muntu mu kala ye ngindu za kukivonda ye ozolele kubasadisa. Muna zaya una Yave kesadisilanga awana bena ye ngindu za kukivonda, tanga e longi “Nzolele Fwa Kwame—Nga Bibila Kilenda Kunsadisa avo Mbakamene Ngindu za Kukivonda?” dina vana fintu a diambu “Tala mpe oma Malende” mu longi diadi.
b Ndiona wakatula kala e vumu, ke dina mfunu ko mu kuyitumba kwasaka, kadi Yave olenda kunloloka. Muna zaya diaka mayingi, tala e longi “Adieyi Bibila Kivovanga mu Diambu Ditadidi Katula Vumu?” dina vana fintu a diambu “Tala mpe oma Malende” mu longi diadi.