Ndonga Imwene Yesu Vitila Lumbu Kia Pentikosti

Kunima lufuluku lwandi, Yesu ovangidi e nkubika kimana kawanana ye ntumwa zandi 11 vana mongo, kuna Ngalili. Tezo kia 500 za alongoki ankaka bele ko. Ankaka muna yau lukatikisu bena lwau. (Matai 28:17; 1 Korinto 15:6) Kansi, dina o Yesu kavovele, dibasadisi mu bakula vo una kikilu o moyo.

Yesu osasidi vo Nzambi umvene e wisa kuna zulu y’ova ntoto. Ovovele vo: “Nwenda, nwakitula wantu a zula yawonso se alongoki, nwabavubila muna nkumbu a Se yo Mwana yo mwand’avelela, nubalonga balunda mambu mawonso inukanikini.” (Matai 28:18-20) Dia ludi, Yesu una kikilu o moyo, ozolele vo e nsangu zambote zasamunwa.

Alongoki awonso a Yesu, akala, akento yovo wan’akete, salu kimosi batambwidi, kia kitula wantu se alongoki. Atantu balenda ningamesa e salu kiaki, kansi Yesu ubakasakese vo: “E wisa kiawonso kia zulu ye nza kiveno kwa mono.” E diadi nkia nsasa dina kwa alongoki? Ubavovese vo: “Tala, ngina yeno e lumbu yawonso yakuna nsuk’a tandu.” Yesu kavovele ko vo, awonso besamuna e nsangu zambote masivi bevanga. Kansi, betambula lusadisu lwa mwand’avelela.

Kunima lufuluku lwandi, Yesu omonekene kwa alongoki andi “mu lumbu 40.” Konso ntangwa kamonekanga wavuatanga nitu za kinsuni za mpila mu mpila yo songa “sinsu yayingi muna songa e ziku vo una moyo,” yo kubalonga “oma ma Kintinu kia Nzambi.”—Mavangu 1:3; 1 Korinto 15:7.

Ekolo antumwa bakinu muna Ngalili, Yesu ubavovese bavutuka kuna Yerusaleme. Vava kamonanene yau muna mbanza, Yesu ubakanikini vo: “Ke nuvaiki mu Yerusaleme ko, kansi nuvingila kaka dina o Se kasila o nsilu, dina nuawá kwa mono; kadi Yoane wavubila muna maza, kansi oyeno ke vevioka lumbu yayingi ko nuvubilwa muna mwand’avelela.”—Mavangu 1:4, 5.

Kuna kwalanda, Yesu owananene diaka ye ntumwa zandi. “Wele yau yakuna Betania,” ina kuna este ya Mongo a Olive. (Luka 24:50) Kana una vo Yesu mambu mayingi kabazayisi mu kuma kia ngiend’andi kuna zulu, antumwa bakinu kwikila vo e Kintinu kiandi ova ntoto kiyadila.—Luka 22:16, 18, 30; Yoane 14:2, 3.

Antumwa bayuvuidi Yesu vo: “E Mfumu, nga mu ntangwa yayi ovutula kintinu kwa Isaele?” Yesu ovutwidi vo: “Ke dieno ko dia zaya e ntangwa ye nsungi ina o Se kasia muna wisa kiandi.” I bosi, muna songa o mfunu wa salu kina bafwete sala, Yesu ubavovese vo: “Oyeno, nutambula nkuma vava o mwand’avelela ukwiza omu yeno, nukala mbangi zame muna Yerusaleme, muna Yuda yawonso ye Samaria yakuna nsuk’a nza.”—Mavangu 1:6-8.

Antumwa kumosi bena yo Yesu vana Mongo a Olive, vana vau bamwene Yesu oyantikidi tomboka kuna zulu. Ke kolo ko, e tuti dimfukidi, antumwa ke balendele diaka mona Yesu ko. Vava Yesu kafuluka, nitu za kinsuni kavuatanga. Kansi muna kolo kiaki, Yesu osisidi e nitu a kinsuni kavuete vava kamokene ye ntumwa zandi, owau otombokele kuna zulu se vangwa kia mwanda. (1 Korinto 15:44, 50; 1 Petelo 3:18) Ekolo ntumwa zandi zakwikizi basengwele meso kuna zulu, “wantu wole bavuete mvuatu miampembe” batelamene vana bena. I mbasi zole, zivuete nitu za kinsuni. Ziyuvuidi antumwa vo: “E Mingalili, ekuma nutelamene yo tala kuna zulu? Yesu ndiona otambwilu kuna zulu, wauna numwenene katombokele kuna zulu i una mpe kekwizila.”—Mavangu 1:10, 11.

Ke vasikilu mpungi ko vava Yesu katombokele kuna zulu, ntumwa zandi zakwikizi yau kaka bamwene diambu diadi. I “una mpe kekwizila,” ke vesikwa mpungi ko, alongoki andi akwikizi yau kaka bebakula e ngiz’andi muna Kintinu.

Antumwa bavutukidi kuna Yerusaleme. Muna lumbu kialanda, bakutakene ye alongoki ankaka, kumosi mpe yo “Maria wa ngudi a Yesu ye aleke andi.” (Mavangu 1:14) E buka kiaki kikwamanene muna sambu. Dimosi muna mambu basambidilanga i sola nlongoki mosi kavinga vana fulu kia Yuda wa musi Kereote, kimana o lutangu lwa antumwa lwavutuka 12. (Matai 19:28) Bazolele sola nlongoki ona wamona e salu kia Yesu yo lufuluku lwandi. Batele nkas’a mienze mu zaya o luzolo lwa Nzambi. Eyayi i ntangw’a nsuka e nkas’a mienze ivovelwanga muna Nkand’a Nzambi. (Nkunga 109:8; Ngana 16:33) Matia, nanga wakala mosi muna alongoki 70 ana Yesu katuma benda sila umbangi. Bansolele, “otangilu kumosi ye antumwa 11.”—Mavangu 1:26.

Vava kiavioka lumbu kumi tuka Yesu katombokela kuna zulu, o Nkinzi wa Ayuda wa Pentikosti ya mvu wa 33 wa tandu kieto uyantikidi. Tezo kia 120 ma alongoki bakutakene muna suku dia ntandu muna Yerusaleme. Vana vau, bawidi o mazu nga zú dia tembwa kiangolo, dizele muna nzo yawonso. Bamwene tubini tukedi nze tiya, tutensama vana ntandu a konso muntu muna yau. Alongoki awonso bayantikidi vova ndinga zaswaswana. Eyayi i ngiz’a mwand’avelela una Yesu kasil’o nsilu! —Yoane 14:26.