Tulunga-lunga E Kwikizi Kieto

‘Oyeno nu mbangi zame, u kavovele o Yave.’​—⁠YESAYA 43:⁠10.

1. Nkia mpila wantu ketuntanga o Yave?

AVO una mun’Eseka dia Kintinu, tala awana bazungidi. Nani omonanga? Aleke besianga e sungididi kia vwa zayi wa Nkand’a Nzambi. (Nkunga 148:​12, 13) Omona mpe mase besianga ngolo za yangidika Nzambi kana una vo mu nza ifwasanga e zingu kia nzo bezingilanga. Nanga omona mpe anunu, besianga ngolo za zingila e ngwizani yo kuyiyekola kwau kwa Yave, kana una vo benwananga ye mpasi za mayela yovo za kinunu. (Ngana 16:​31) Yau awonso bezolanga kikilu Yave. Yandi mpe oyangalelanga kala ye ngwizani ambote yo yau. Tala una kavova Mwan’a Nzambi: ‘Ke vena ona olenda kwiz’oku ngina ko, ovo o Se, ona wantuma, kekuntunta ko.’ ​—⁠Yoane 6:​37, 44, 65.

2, 3. Ekuma dilenda kadila diampasi mu lunga-lunga e kwikizi kieto?

² Nga ke tuyangalalanga ko kala muna buka kia wantu ana betondwanga yo sambulwa kwa Yave? Kansi, ke diambu diakete ko muna lunga-lunga e kwikizi kieto mu lumbu yayi yambaninu. (2 Timoteo 3:⁠1) Dilenda kala diampasi, musungula kw’aleke ana besansukilanga muna nzo z’Akristu. Wá una kavova etoko dimosi: “Kana una vo yayendanga muna tukutakanu twa Akristu, o ntim’ame kwandá wakalanga. Kieleka, kiakalanga ye luzolo lwa sadila Yave ko.”

³ Akaka, kana una vo bena y’etima dia sadila Yave, kansi bevukumunwanga kw’akundi a salu yovo a sikola, muna mambu ma nza yovo mavangu m’esumu. O lutonto lwa mpila yayi malembe malembe lulenda kutuyoyesa muna mwanda. Kasikil’owu, ndonga mu nza o unu bebadikilanga nsiku mia fu yambote mina mu Nkand’a Nzambi vo miaviokela e ntangwa, yovo mianzenza mu nza ya tandu kiaki. (1 Petelo 4:⁠4) Akaka bebanzanga vo ke dina mfunu ko dia sambila Nzambi una kevavanga. (Yoane 4:​24) Muna nkanda kasoneka kw’ampangi kuna Efeso, Paulu wavova vo e nza yayi kwa “mwanda” yovo fu yambi iyalwanga. (Efeso 2:⁠2) O mwanda wau ufilanga wantu mu tanginina e ngindu ye fu ya wantu ke bazeye Yave ko.

4. O Yesu aweyi kasongela o mfunu wa lunga-lunga e kwikizi kieto?

⁴ Kansi, wau vo tu selo yayiyekola ya Yave, tuzeye wo vo diavonza kwa konso muntu mu yeto​—⁠nleke yovo mbuta​—⁠dia vidisa e kwikizi kieto. Muna kala ye lukwikilu lwasikila tufwete lemvokela nsiku mia Yave yo vanga mana kevavanga. I wau dina, kadi mu fwaniswa kia Nzambi twavangilwa. (Etuku 1:26; Mika 6:⁠8) Nkand’a Nzambi utezanisanga e kwikizi kieto ye mvwatu. Yesu walukisa vo: “Tala, nkwiza nze mwivi. Nkwa nsambu, ndion’oyingilanga, yo lund’e mvwatu miandi, unkwa kangal’e nkonga, bamona nsoni zandi.”a (Lusengomono 16:​15) Ozevo, katuzolele vula e mvwatu mieto ko, i sia vo yivisa e fu yeto ya Kikristu yo kuyisia fwani-fwani ye nza ya Satana. Avo diadi ditubwididi, tuvidisa e “mvwatu” miami. Diankenda kikilu ye nsoni dikala.

5, 6. Ekuma dinina mfunu dia sikila muna mwanda?

⁵ Kwikizi kiasikila diambu kivanganga muna zingu kia muntu. Mu nkia mpila? Avo nsambidi a Yave kena ye lukwikilu lwasikila ko, olenda vukumunwa mu vanga oma mambi, yo kituka se nkwa lukatikisu. Nkand’a Nzambi nkumbu miayingi ulukisanga mu kuma kia lukatikisu. Yakobo wa nlongoki wavova vo: “Ndion’okatikisanga wina nz’evuku dia kalunga divevomonwanga kwa tembwa yo tembeleswa. O muntu ndiona kabanzi ko vo ma ketambula kwa Mfumu; nkwa nyindu miole kwandi, nkinda-nkinda muna ngyenda zandi zawonso.” ​—⁠Yakobo 1:​6-8; Efeso 4:14; Ayibere 13:⁠9.

⁶ Aweyi tulenda lunga-lunga e kwikizi kieto? Nki kilenda kutusadisa mu tatidil’elau diampwena tuvwidi diakala se asambidi a Nzambi wa Mpungu-ngolo? Badika e nona yilende.

Sikidisa e Kwikizi Kiaku

7. Ekuma dinina mfunu dia lomba kwa Yave katufimpa?

⁷ Kwamanan’o sikidisa e ngwizani aku yo Yave. Evwa diantalu kavwidi o Nkristu i kala ye ngwizani ambote yo Nzambi. (Nkunga 25:14; Ngana 3:​32) Avo tuyantikidi katikisa e kwikizi kieto, i ntangwa yoyo tufwete fimpa mu zaya e mpila ina e ngwizani eto yo Nzambi. Ikuma Ntozi a nkunga kalombela kwa Nzambi vo: ‘Umfimpa, e Yave, untonta; tonta nsi ame ambundu, yo ntima.’ (Nkunga 26:⁠2) Ekuma o lufimpu lwalu lwinina o mfunu? Ekuma kadi katulendi kuyifimpa ko yeto kibeni yo zaya mawonso mena muna ntima mieto. Yave kaka olenda zaya wuntu weto waswekama i sia vo makani ye ngindu zeto. ​—⁠Yeremiya 17:​9, 10.

8. (a) O fimpwa kwa Yave nkia nluta kutwasanga? (b) Aweyi wasadisilwa muna nungunuka mu mwanda?

⁸ Vava tulombanga vo Yave katufimpa, edi tulombanga vo katutonta. Olenda yambula vo lutonto lwatulwakila yo senzeka makani ye ngindu zeto. (Ayibere 4:​12, 13; Yakobo 1:​22-​25) Tufwete yangalelanga e ntonta zozo kadi zikutuvananga elau dia songa e kwikizi kieto kwa Yave. Zilenda songa vo ‘twazikuka, yo fwana, yo lembi kondwa ma.’ (Yakobo 1:​2-4) O lutonto lusadisa mu nungunuka muna mwanda. ​—⁠Efeso 4:​22-24.

9. Ekuma tufwete kuyizayil’e ziku vo malongi ma Nkand’a Nzambi maludi? Sasila dio.

⁹ Longoka wazay’e ziku vo Nkand’a Nzambi waludi. E kwikizi kieto kilenda yoya avo ke kisikidi ko muna ludi kia Nkand’a Nzambi. (Filipi 1:​9, 10) Konso Nkristu, nleke yovo mbuta kafwete kuyizayil’e ziku vo mana kekwikilanga i ludi kina muna Nkand’a Nzambi. Paulu wavova kwa minkwikizi akw’andi vo: “Nutonta mambu mawonso; nutatidil’owu wambote.” (1 Tesalonika 5:​21, 22) Aleke bena vo mase mau Akristu, bafwete wo zaya vo o lukwikilu lwa mase mau kalulendi kubakitula Akristu akieleka ko. O Davidi wavovesa mwan’andi Solomo vo: “Zaya Nzambi w’ese diaku, unsadila yo ntim’asikila.” (1 Tusansu 28:⁠9) O zaya kwankatu vo o s’andi Yave kakwikilanga ke diafwana ko kwa nleke Solomo. Yandi kibeni kafwete zaya Yave, i una mpe kavanga. Walomba kwa Nzambi vo: “Owau umpana ngangu yo zayi, yavaika yo kota vana vena nkangu wau.” ​—⁠2 Tusansu 1:⁠10.

10. Ekuma ke dinina diambi ko dia yuvula e yuvu yaziku?

¹⁰ Lukwikilu lwasikila mu zayi lutukanga. Paulu wavova vo: “O lukwikilu lutukanga muna wa.” (Roma 10:​17) Adieyi kazol’o vova mu mvovo miami? Edi kazola vova vo, avo tukuyidikila muna diambu dia Nzambi, tusiamisa lukwikilu ye vuvu kieto muna Yave ye nsilu miandi ye muna nkubik’andi. Tutoma yangalalanga vava Nkand’a Nzambi uvananga e mvutu za yuvu yeto. Vana ntandu, Paulu okutuvovesanga muna Roma 12:2 vo: “Nwatont’owu win’o luzolo lua Nzambi luambote, luayangalalu, luakunkuka.” Aweyi tulenda wo vangila? Muna vwa ‘zayi waludi.’ (Tito 1:⁠1) Mwand’a Yave ulenda kutusadisa mu bakula kana nkutu mambu mampasi. (1 Korinto 2:​11, 12) Avo vena ye diambu dina tulembi bakula, tufwete lomba lusadisu kwa Yave muna sambu. (Nkunga 119:​10, 11, 27) Yave ozolele vo twabakula e Diambu diandi, twakwikila yo lemvokela dio. Oyangalelanga e yuvu ya ziku ina tuyuvulanga.

Kwamanana Yangidika Nzambi

11. (a) Nkia luzolo lulenda kutubwisa muna ntambu? (b) Aweyi tulenda vwila e nkuma mu sunda e ntonta z’akundi a salu yovo a sikola?

¹¹ Vavanga yangidika Nzambi, ke muntu ko. Ke diambi kwandi ko dia vava zolwa kwa wantu. Konso muntu ozolang’o kala ye akundi yo vava vo kazolwa. Twakala aleke yovo ambuta, ntonta za akundi a salu yovo a sikola zilenda kutufila mu vava kubatanginina yovo kubayangidika. Kansi, ke ntangwa zawonso ko akundi bevavanga ewete dieto. Ezak’e ntangwa bevavanga vo twakala yau entwadi muna vanga edi diambi. (Ngana 1:​11-​19) Vava Nkristu kebwanga muna ntonta z’akundi a salu yovo a sikola, kekalanga ye ngolo za kuyisunzula ko vo yandi Nkristu. (Nkunga 26:⁠4) Paulu wa ntumwa walukisa vo: “Ke nwiyisi’e fwani-fwani ye tandu kiaki ko.” (Roma 12:⁠2) Yave okutuvananga o nkuma una tuvwidi o mfunu mu nwana ye konso ntonta zilenda kutubwila. ​—⁠Ayibere 13:⁠6.

12. Nkia mvovo mia Nkand’a Nzambi ye nona kilenda kutusadisa mu sikila ye kwikizi?

¹² Vava akaka bevavang’o fwasa kimwanda kieto, tufwete sungamenanga vo kwikizi kieto kwa Yave i diambu disundidi o mfunu, ke mu ngindu za wantu ko. E mvovo mina muna Luvaiku 23:2 miamfunu kikilu: “Kulandi ndonga ko muna vanga bi.” Vava ndonga y’Aneyisaele bakatikisa nkum’a Yave wa lungisa e nsilu miandi, Kalebe kalanda ngindu zau ko. Wakala ye lusikidisu vo e nsilu mia Nzambi milungana kikilu, muna kuma kiaki wasambulwa kwayingi. (Ntalu 13:30; Yosua 14:​6-​11) Nga ovava venga e ngindu za wantu muna lunga-lunga e ngwizani aku yo Nzambi?

13. Ekuma dinina diangangu mu yambula akaka bazaya vo tu Akristu?

¹³ Yambula akaka bazaya vo u Nkristu. Kingana kia sia vo ukitanina muna vuluka, kialudi kikilu ekolo tulunga-lunganga e kwikizi kieto. Muna lumbu ya Ezera, vava Aneyisaele basiwanga kitantu muna vanga luzolo lwa Yave, bavova vo: “Oyeto tu ntaudi za Nzambi ezulu ye nza.” (Ezera 5:​11) Avo tuyambwidi vo e mvovo ye mavangu m’atantu matuyala, tubakama kwa wonga. Ovava yangidika awonso dilenda yoyesa e kwikizi kieto. Ozevo, kumweni muntu wonga ko. Yambula akaka bazayanga vo ngeye u Mbangi a Yave. Kuna luzitu lwawonso, ubazayisa e ngindu ye lukwikilu lwaku. Yambula akaka bazaya vo ngeye nsiku mia Yave mia fu yambote okwamanana lemvokela, kukulula kwikizi kiaku ko. Songa vo nsiku mia nkal’ambote mia Nzambi oyangalelanga. (Nkunga 64:​10) Sikila muna kwikizi dikukumika, dikutanina, yo fila akaka mu vav’o zaya oma ma Yave ye nkangu andi.

14. O luvezo ye kitantu nga kifwete kutuyoyesa? Sasila dio.

¹⁴ Akaka balenda kuveza yo kusia kitantu. (Yuda 18) Avo akaka bavezele kwikizi kiaku, kukendaladi ko. (Yezekele 3:​7, 8) Kana nkutu nkia luzolo una lwau, kulendi kwikidisa wantu ke bena ye luzolo lwa wá ko. Sungamena Faro. Ke vena vuku ko yovo masivi ngatu nkutu lufwa lwa mwan’andi antete lwalenda kunkwikidisa vo Mose Yave wantuma. Ozevo, kuyambula ko vo wonga wa muntu wasimba. Bunda Yave e vuvu yo kwikila muna yandi kulenda kutusadisa mu sunda o wonga. ​—⁠Ngana 3:​5, 6; 29:25.

Land’e Mbandu Yavioka yo Kubamena Kusentu

15, 16. (a) Nki i vwa dieto dia mwanda? (b) Nkia nluta tulenda baka muna zaya evwa dieto dia mwanda?

¹⁵ Yangalelanga evwa diaku dia mwanda. O ntemo a diambu dia Nzambi ulenda sadisa Akristu mu zaya mfunu evwa diau dia mwanda. Evwa dia mwanda i ludi kia Diambu dia Yave, ye vuvu kia moyo a mvu ya mvu, y’elau dia sunzula Nzambi muna salu kia umbangi. Nga olenda solola e fulu kiaku vana vena Mbangi zandi, ana bavewa elau dia samuna nsangu za Kintinu, eki kivuluza e mioyo mia wantu? Sungamena vo ke muntu ko, kansi yandi kibeni Yave ovovanga vo: “Oyeno nu mbangi zame.” ​—⁠Yesaya 43:10.

¹⁶ Ukiyuvula: ‘Nkia mfunu dina evwa diadi dia mwanda kwa mono? Nga nzolele dio kieleka yo sia luzolo lwa Nzambi va fulu kiantete muna zingu kiame? Nga lukwikilu lwame lwasikila kieleka mu zizidila konso lutonto lulenda yoyesa e kwikizi kiame?’ Evwa dieto dia mwanda dilenda kutuvana mpe luvuvamu lwa mwanda luna vo mu nkubik’a Yave kaka tulenda lo vwila. (Nkunga 91:​1, 2) Avo tufimpidi mambu mampwena mebwanga muna nkubik’a Yave ya tandu kiaki tulenda kala ye ziku vo ke vena muntu ko yovo lekwa kilenda sukisa nkangu a Yave ova nza. ​—⁠Yesaya 54:17; Yeremiya 1:⁠19.

17. Nkia mambu makaka mevavwanga ke mu kala y’evwa diankatu dia mwanda ko?

¹⁷ Kieleka, evwa diankatu dia mwanda ke difwene ko. Konso muntu mu yeto kafwete kala ye ngwizani ambote yo Nzambi. Vava Paulu kasala kwayingi muna siamisa lukwikilu lw’Akristu kuna Filipi, wabasonekena vo: ‘Azolw’ame, wauna nulemvokelang’aka, ke vana ngina kaka ko, kansi wau ngina kwakaka, nusakisanga wo, owu wa sala mu diambu dia mpuluzw’eno, yo wonga y’ezakamu.’ (Filipi 2:​12) Katubunding’e vuvu kia luvuluzu kwa muntu akaka ko.

18. E salu kia Kikristu aweyi kilenda siamisina e kwikizi kieto?

¹⁸ Uyivan’emvimba muna salu kia Kikristu. “Mavangu meto mesonganga mpe vo tu Akristu.” Akristu o unu bavewa e salu kia samuna nsangu zambote za Kintinu kia Nzambi eki kiasikidiswa. Paulu wavova vo: “Wau vo i ntumw’azula, nkembèle uselo wame.” (Roma 11:​13) E salu kia samuna nsangu zambote kisiamisanga e kwikizi kieto yo kutuswaswanesa ye nza. Kuyivana muna salu yakaka ya Kikristu, nze i lungana muna tukutakanu twa Akristu, kangala muna salu kia tunga maseka ma kintinu, sadisa awana bevavanga lusadisu ye makaka mpe malenda siamisa e kwikizi kieto. ​—⁠Ngalatia 6:​9, 10; Ayibere 10:​23, 24.

O Zayakana vo u Nkristu Nsambu Zayingi Ditwasanga

19, 20. (a) Wau vo u Nkristu, nkia nluta dikutwasilanga? (b) Nki kilenda siamisa e kwikizi kieto?

¹⁹ Badika nluta miayingi tuvwanga wau vo tu Akristu. Tuvwidi elau dia zayakana kwa Yave. Malaki wa ngunza wavova vo: “Ana bavuminanga Yave bavovazianini: o Yave owunikini, kawa, vasonekenw’o nkand’a luyindwilu vana kena w’awana bavuminanga Yave, bebadikanga nkumbu andi.” (Malaki 3:​16) Tulenda kala s’akundi a Nzambi. (Yakobo 2:​23) Tuna ye ntona ye makani mambote ye vuvu kia moyo a mvu ya mvu kuna sentu. ​—⁠Nkunga 37:⁠9.

²⁰ Sungamena wo vo e zingu kiaku kiamfunu kuna kwa Yave. Kana una vo akaka balenda kubanzila ngindu zambi, Nzambi kekubadikilanga nze una beyindulanga ko akaka mu kuma kiaku. Nzambi okutuzolanga yo kutuvwa o mfunu. Tu selo yandi. (Matai 10:​29-​31) O zola kweto muna Nzambi kulenda siamisa e kwikizi kieto yo landa nzila yasikila. ‘O muntu, ovo ozolele Nzambi, i yandi yun’ozayakana kwa yandi.’​—⁠1 Korinto 8:⁠3.

[Mvovo Vana Yand’a lukaya]

Nga Osungamenanga?

• Ekuma dinina mfunu vo Akristu balunga-lunga e kwikizi kiau?

• Aweyi tulenda sikidisila e kwikizi kieto?

• Nki kilenda kutusadisa mu baka nzengo zasikila vava tutontwanga?

• E kwikizi kiasikila aweyi kilenda kumikina e vuvu kieto kia kusentu?

[Foto ina muna lukaya lwa 21]

Kuyivana muna salu kia Kikristu kulenda siamisa e kwikizi kieto