Sund’o bi Muna Wete

13, 14. (a) Ekuma ke tusivikilanga ko vava tubangikwanga? (b) Aweyi tulenda sambulwila awana bekutubangikanga?

¹³ Tanga Roma 12:​14, 21. Avo tuna ye vuvu vo Yave olungisa ekani diandi, tusadila e ngolo zeto muna salu katuvana kia samuna ‘nsangu zambote za kintinu muna nza yawonso.’ (Mat. 24:​14) Tuzeye wo vo e salu kiaki kia Kikristu atantu eto kifungisanga makasi, nze una Yesu katulukisa: ‘Nusaulwa kwa zula yawonso muna nkumbu ame.’ (Mat. 24:⁠9) Muna kuma kiaki, ke tusivikanga ko ngatu kendalala vava tubangikwanga. Petelo wa ntumwa wasoneka vo: “Azolwa, ke nubanzi ko vo dianzenza, edi dia ntont’a tiya izidi kunutonta, ovo diambu dianzenza dinubwididi: kansi kadi, muna tezo kia nkala nukal’e ntwadi muna mpasi za Kristu.”​—⁠1 Pet. 4:​12, 13.

15. Ayeyi i mpila yambote tulenda sundila o bi muna wete?

¹⁵ O Nkristu akieleka kafwete lemvokela e mvovo miansuka mia nkand’a Roma kapu kia 12: “Kusundwa kwa bi ko, sunda kak’o bi muna wete.” Nkadi Ampemba wa Satana yandi i tuku dia mambu mawonso mambi. (Yoa. 8:44; 1 Yoa. 5:​19) Muna mona-meso kiasongwa Yoane wa ntumwa, Yesu wasonga vo mpangi zandi akuswa “bansundìdi [Satana] muna menga ma Mwan’ememe, yo muna diambu dia umbangi wau.” (Lus. 12:​11) Ediadi disonganga vo e mpila yambote ya sundila Satana ye mambu mambi ma nza yayi, i vanga edi diambote muna salu kieto kia samun’e nsangu zambote za Kintinu.