Yangalela Elau Diaku dia Salu
1. Ndonga mu nza, aweyi bebadikilanga salu kieto kia umbangi?
1 Ndonga mu nza yayi ya Satana bebadikilanga salu kieto kia umbangi nze ‘uzowa.’ (1 Kor. 1:18-21) Avo ka tuyikengele ko e ngindu zazi zabendomoka zilenda kutuyoyesa yo kulula vema kweto. (Nga. 24:10; Yes. 5:20) Ekuma tufwete yangalela elau dieto dia yikilwa vo Mbangi za Yave?—Yes. 43:10.
2. Ekuma e salu kia umbangi kilenda yikilwa vo salu ‘kia vauka’?
2 ‘Salu Kiavauka’: Paulu wa ntumwa wayikila salu kia umbangi vo ‘salu kia vauka.’ (Roma 15:15, 16) Ekuma tulenda vovela vo ‘salu kia umbangi kia vauka’? E salu kiaki kikutukitulanga se ‘akw’andi a salu’ a Yave wa “Mpungu-ngolo” yo zitisa nkumbu andi. (1 Kor. 3:9; 1 Pet. 1:15) Yave obadikilanga e salu kia samuna nsangu zambote nze ‘lukau lua lusanisinu.’ E salu kia umbangi i salu kisundidi mfunu muna nsambil’eto.—Ayib. 13:15.
3. Adieyi dikitulanga e salu kia samuna nsangu zambote s’elau diampwena?
3 Akete kaka bevewanga elau diadi diampwena dia samuna nsangu zambote. Ka lukatikisu ko, ambasi badi yangalala tambula elau dia salu kiaki yo sala kio una ufwene. (1 Pet. 1:12) Kansi, Yave wasola “yinzu yatuma,” i sia vo wantu alembi lunga mu sala e salu kiaki kiamfunu.—2 Kor. 4:7.
4. Aweyi tulenda songela vo tutoma yangalelanga e salu kia umbangi?
4 Kifwete Kalanga va Fulu Kiantete: Avo tuyangalelanga e salu kia umbangi, tubadikila kio nze lusalu lwantalu ye salu ‘kisundidi o mfunu’ muna zingu kieto. (Fili. 1:10) Muna kuma kiaki, tufwete vaulanga e ntangwa konso lumingu mu samuna nsangu zambote. E ntozi a nkunga ona ovavanga elau dia yimbidila muna buka yatunda, otoma kubamanga muna lenda yimbila una ufwene. Diau adimosi mpe, avo tuteka kubamanga muna kwenda mu salu kia umbangi yo vanga wawonso mu wokesa ndekwa za longa, ‘tutoma sans’e diambu dia ludi.’—2 Tim. 2:15; 4:2.
5. Nani oyangalelanga e salu kieto kia umbangi?
5 Kuyambula ko vo awana ke bezolanga tambulwila nsangu zambote ko bayoyesa. Sungamena vo ayingi mu zunga kieto betoma yangalelanga nkingula zeto. Kansi, ke tuvavanga tondwa kwa wantu ko. Edi disundidi o mfunu i zaya vo Yave oyangalelanga ngolo tuvanganga.—Yes. 52:7.