Ekuma e Mpasi ye Mambu Mambi Mevangamenanga?

Vava mambu mambi mevangamanga, nkumbu miayingi wantu beyuvulanga vo: “Ekuma diambu diadi divangamene?” Tuna ye kiese kadi Bibila kivananga e mvutu zakiá muna kiuvu kiaki.

1. Aweyi mambu mambi mayantikila ova nza?

Satana wa Nkadi ampemba wakolamena Nzambi. Satana wakala yo luzolo lwa yala akaka, muna kuma kiaki wavukumuna Adami yo Eva kimana banyikama muna ukolami wandi. Aweyi kavangila wo? Satana wavova luvunu kwa Eva. (Tuku 3:1-5) Wamfila mu yindula vo Yave lekwa kiambote kabaswekanga. Wazola songa vo wantu bekala ye kiese avo bakolamene Nzambi. Satana wavova luvunu lwantete vava kazayisa Eva vo kefwa ko. Ekiaki i kuma Bibila kiyikilanga Satana vo: ‘Nkwa luvunu ye se dia luvunu.’—Yoane 8:44.

2. Adami yo Eva nkia nzengo babaka?

Yave wavana lekwa yayingi yambote kwa Adami yo Eva. Wabavovesa vo badia kwau e bundu ya nti miawonso miakala muna mpatu ya Edene, umosi kaka kabasima vo ke badie ko. (Tuku 2:15-17) Kansi babaka e nzengo za dia e bundu kia nti una basimwa. Eva ‘wavela e bundu yo yantika kio dia.’ I bosi, Adami mpe ‘wayantika kio dia.’ (Tuku 3:6) Yau awole bakolamena Nzambi. Wau vo Adami yo Eva wantu alunga bakala, ke diakala diampasi ko kwa yau mu vanga edi diambote. Kansi, bakolamena Nzambi kuna lukanu. E nzengo zau zambi zatwasa mpasi zayingi.—Tuku 3:16-19.

3. E nzengo za Adami yo Eva nkia mfwilu zatutwasila?

Vava Adami yo Eva basumuka, bakituka se wantu alembi lunga yo sambukisa e sumu diau kwa wan’au awonso. Bibila kivovanga mu kuma kia Adami vo: “E sumu diakotela ova nza muna muntu mosi, o lufwa mpe muna sumu, i nsayana lwasayana o lufwa kwa wantu awonso.”—Roma 5:12.

Vena mpe ye kuma yankaka tumwenanga e mpasi. Ezak’e ntangwa, tulenda mona e mpasi mu kuma kia nzengo zeto zambi yovo mu kuma kia nzengo zambi za wantu ankaka. Kansi, ezak’e ntangwa, tulenda mona mpe mpasi avo tuwanukinu va fulu kiambi muna ola yambi.—Tanga Kimpovi 9:11.

ZAYA DIAKA MANKAKA

4. Nani una ye foti muna mpasi tumonanga?

Wantu ayingi bekwikilanga vo Nzambi oyalanga nza yawonso. Nga diadi dialudi? Tala e VIDEO.

VIDEO: Nani Kieleka Oyalanga e Nza Yayi? (1:24)

Tanga Yakobo 1:13 ye 1 Yoane 5:19, i bosi, vana e mvutu za kiuvu eki:

• Nga Nzambi foti kena yau mu kuma kia mambu mambi ye mpasi tumonanga?

5. Badika mfwilu mia luyalu lwa Satana

VIDEO: Ekuma Nzambi Keyambulwilanga e Mpasi?—Findambu Kaka (3:07)

Tanga Tuku 3:1-6, i bosi, vana e mvutu za yuvu eyi:

• Nkia luvunu Satana kavova?—Tala tini kia 4 ye 5.

• Aweyi Satana kasongela vo Yave lekwa kiambote kaswekanga kwa wantu?

• Aweyi Satana kasongela vo wantu ke bavuidi mfunu wa luyalu lwa Nzambi ko mu kala ye kiese?

Tanga Kimpovi 8:9, i bosi, vana e mvutu za kiuvu eki:

• Wau vo ke Yave ko oyalanga e nza yayi, ediadi nkia mfwilu ditwasanga?

1. Adami yo Eva wantu alunga bakala, bazingilanga muna paradiso. Kansi, bawila Satana yo kolamena Yave

2. O ukolami wau watwasa sumu, mpasi ye lufwa mu nza

3. Yave ofokola e mpasi, sumu yo lufwa. O wantu bekala diaka balunga yo zingila muna Paradiso

6. Yave otokanenanga e mpasi zeto

Nga Nzambi otokananga mu kuma kia mpasi zeto? Yambula twazaya dina Ntinu Davidi ye Petelo wa ntumwa basoneka. Tanga Nkunga 31:7 ye 1 Petelo 5:7, i bosi, vana e mvutu za kiuvu eki:

• Aweyi omwene wau olongokele vo Yave otokananga mu kuma kia mpasi zeto?

MAMBU MASINA MA LONGI DIADI

Satana wa Nkandi ampemba, Adami yo Eva yau bena ye foti muna mpasi zawonso tumonanga ova nza. Yave otokananga mu kuma kia mpasi tumonanga, ke kolo ko, ofokola e mpasi zawonso.

Nkia Mambu Olongokele?

• Nkia luvunu Satana wa Nkadi ampemba kavova kwa Eva?

• E nzengo za Adami yo Eva nkia mfwilu zatutwasila?

• Aweyi tuzayidi wo vo Yave otokananga mu kuma kia mpasi zeto?

TALA MPE OMA MALENDE

Nki i sumu? Tala e mvutu za Bibila.

“Nki i Sumu?” (Longi dina muna jw.org)

Zaya mambu mankaka mu kuma kia mpaka Satana wa Nkadi ampemba kavaikisa muna mpatu a Edene.

“Ekuma Nzambi Keyambulwilanga e Mpasi?” (Eyingidilu dia 1 dia Yanuali, 2014)

Zaya e mvutu za lufiaulwisu za kiuvu kimosi kiampasi.

“Ekuma Ayadi a Nazi Bavondela Ulolo wa Ayuda? Ekuma Nzambi Kasimina Diambu Diadi ko?” (Longi dina muna jw.org)

Tala dina muntu mosi kalongoka muna mpasi kamona.

Kina Diaka Mono Mosi ko (5:09)

Tusumukanga, tumonanga e mpasi yo fwa kadi Adami yo Eva bakolamena Nzambi.a Kansi, ke tulendi dimbula vuvu ko. Yave wafila mwan’andi Yesu Kristu mu kutuvuluza muna sumu yo lufwa. Bibila kilonganga vo vava Yesu kafwa, wafuta lukûlu. Lukûlu i ntalu ifutwanga muna kûla muntu. O moyo andi walunga i ntalu kafuta o Yesu. (Tanga Matai 20:28.) Vava Yesu kayambula e lau diandi dia zinga yakwele mvu ova ntoto, watuziulwila e nzila kimana twavua yawonso Adami yo Eva bavidisa. O lufwa lwa Yesu lusonganga mpe vo Yave otoma kutuzolanga. E longi diadi dikusadisa mu wokesa luyangalalu lwaku muna kimenga kia Yesu.

1. O lufwa lwa Yesu aweyi lulenda kutusadisila o unu?

Wau vo tu asumuki, tuvanganga mambu mayingi mekendelekanga Yave. Kana una vo i wau, masumu meto malenda lolokwa mu kuma kia lukûlu Yesu kavana. Kansi muna lolokwa, tufwete viluka kieleka o ntima, lomba ndoloki kwa Yave yo vanga mawonso muna lembi vutukila diaka masumu momo. Avo tuvangidi wo, tukala ye ngwizani ambote yo Yave. (1 Yoane 2:1) Bibila kivovanga vo: “Kristu wafwa nkumbu mosi kaka muna diambu dia masumu, nsongi a muntu muna diambu dia awana balembi songa, kimana kanusunzula kwa Nzambi.”—1 Petelo 3:18.

2. O lufwa lwa Yesu aweyi lulenda kututwasila nluta kuna sentu?

Yave wafila Yesu katambika moyo andi walunga, “konso ona osonga lukwikilu muna yandi ke fwaswa ko, moyo a mvu ya mvu kevua.” (Yoane 3:16) Mu kuma kia kimenga kina Yesu katambika, Yave ofokola mbi yawonso yatuka muna ukolami wa Adami. Ediadi disongele vo avo tusongele lukwikilu muna kimenga kia Yesu, tukala ye lau dia zinga yakwele mvu muna paradiso ova ntoto.—Yesaya 65:21-23.

ZAYA DIAKA MANKAKA

3. Lufwa lwa Yesu lwatukûla muna masumu ye lufwa

VIDEO: Ekuma Yesu Kafwila?—Ndambu 1 (2:01)

• Vava Adami kakolamena Nzambi, nkia lau kavidisa?

Tanga Roma 5:12, i bosi, vana e mvutu za kiuvu eki:

• E sumu dia Adami nkia mfwilu diatwasa muna zingu kiaku?

Tanga Yoane 3:16, i bosi, vana e mvutu za kiuvu eki:

• Ekuma Yave katumina Mwan’andi ova ntoto?

1. Adami muntu walunga kakala, kansi wakolamena Nzambi. Muna kuma kiaki, wantu awonso besumukanga yo fwa

2. Yesu muntu walunga kakala ye walemvokela Nzambi. Muna kuma kiaki, wantu awonso bena ye lau dia kituka se wantu alunga yo zinga yakwele mvu

4. Lufwa lwa Yesu lulenda twasa nluta kwa wantu awonso

VIDEO: Ekuma Yesu Kafwila?—Ndambu 2 (2:00)

• Aweyi lufwa lwa muntu mosi kaka lulenda twasila nluta kwa wantu ayingi?

Tanga 1 Timoteo 2:5, 6, i bosi, vana e mvutu za kiuvu eki:

• Adami muntu walunga kakala, kansi wau vo wasumuka, wantu awonso besumukanga yo fwa. Yesu mpe muntu walunga kakala. Aweyi kavanina “lukûlu lwafwana”?

5. Lukûlu i lukau lwa Yave kwa ngeye

Akundi a Yave bebadikilanga lukûlu vo lukau lwantalu. Muna zaya e ziku, tanga Ngalatia 2:20, i bosi, vana e mvutu za kiuvu eki:

• Aweyi Paulu wa ntumwa kasongela vo wabadikilanga lukûlu se lukau lwa Nzambi kwa yandi?

Vava Adami kasumuka, yandi ye mbongo andi bavewa e tumbu kia lufwa. Kansi, Yave watuma Mwan’andi kafwa kimana ongeye wakala ye lau dia zinga yakwele mvu.

Ekolo otanga e tini ilende, yindula una Yave kamona vava Mwan’andi kamweswanga e mpasi. Tanga Yoane 19:1-7, 16-18, i bosi, vana e mvutu za kiuvu eki:

• Aweyi omonanga mu kuma kia dina Yave yo Yesu bavanga muna wete diaku?

MAMBU MASINA MA LONGI DIADI

Mu kuma kia lufwa lwa Yesu, Yave ololokanga masumu meto yo kutuvana e lau dia zinga yakwele mvu.

Nkia Mambu Olongokele?

• Ekuma Yesu kafwila?

• Aweyi moyo walunga wa Yesu winina se lukûlu lwafwana?

• Aweyi lufwa lwa Yesu lulenda kutwasila nluta?

TALA MPE OMA MALENDE

Zaya e kuma moyo walunga wa Yesu uyikilwanga vo lukûlu.

“Aweyi Kimenga kia Yesu Kinina se ‘Lukûlu lwa Wantu Ayingi’?” (Longi dina muna jw.org)

Zaya dina tufwete vanga muna vuluzwa.

“Aweyi o Yesu Kekutuvuluzilanga?” (Longi dina muna jw.org)

Nga Yave ololokanga mpe masumu mampwena?

“Mvutu za Yuvu ya Nkand’a Nzambi” (Eyingidilu dia 1 dia Mayu, 2013)

Muntu mosi watokananga kwayingi mu kuma kia mambu kamona kuna vita. Tala una kasadisilwa vava kalongoka e diambu ditadidi kimenga kia Yesu.

“Eu não sou mais escravo da violência” (Longi dina muna jw.org)