Mu nza yawonso, wantu ngindu zaswaswana bekalanga zau mu kuma kia malavu mankolwa. Wantu ankaka beyangalalanga nua malavu ezak’e ntangwa vava bekalanga vamosi ye akundi au. Vena ye wantu ankaka ke bezolanga nua malavu ko. Kansi ankaka benuanga malavu mayingi yamu tezo kia kolwa. Ozevo, adieyi Bibila kivovanga mu kuma kia malavu mankolwa?

1. Nga diambi mu nua malavu mankolwa?

Bibila ke kisimanga nua malavu mankolwa ko. Vava Bibila kiyikanga lekwa yambote Nzambi kekutuvananga, kivovanga vo e “vinyu iyangidikanga o ntim’a muntu.” (Nkunga 104:14, 15) Bibila kiyikanga akala ye akento akwikizi banuanga malavu mankolwa.—1 Timoteo 5:23.

2. Nkia malongi Bibila kivananga kwa awana benuanga malavu mankolwa?

Yave otumbanga e fu kia nua kwasaka yo kolwa. (Ngalatia 5:21) Bibila kivovanga vo: “Kukadi vana vena awana benuanga vinyu ayingi ko.” (Ngana 23:20) Muna kuma kiaki, avo tuzolele nua malavu, tufwete kalanga ye tezo kana nkutu yeto mosi twina. Tufwete venganga e fu kia nua yamu tezo kia lembi kala diaka ye ngindu zasikila, lembi keba e mvovo ye mavangu meto yovo sia mavimpi meto mu vonza. Avo ke tukalanga ye volo ko muna nua malavu mankolwa, diambote twayambula mo nua.

3. Aweyi tulenda zitisila nzengo za akaka muna diambu dia nua malavu mankolwa?

Konso muntu una ye nswa wa baka nzengo kana vo malavu mankolwa kenua yovo ve. Ke tufwete vezanga ko awana benuanga malavu mankolwa mu tezo, ngatu komekena awana ke bazolele mo nua ko. (Roma 14:10) Tulenda baka nzengo zalembi nua malavu mankolwa avo akaka tutesanga sakuba. (Tanga Roma 14:21.) Ke tufwete ‘vava kaka wete dia [yeto] kibeni ko, kansi wete dia akweto kaka.’—Tanga 1 Korinto 10:23, 24.

ZAYA DIAKA MANKAKA

4. Baka nzengo kana vo malavu mankolwa onua yovo ve

Aweyi Yesu kabadikilanga o nua malavu mankolwa? Tulenda baka e mvutu muna fimpa e sivi diantete kavanga. Tanga Yoane 2:1-11, i bosi, vana e mvutu za yuvu eyi:

• Muna sivi dina Yesu kavanga, adieyi tulenda longoka muna mpila kebadikilanga malavu mankolwa ye awana benuanga mo?

• Wau vo Yesu katumba fu kia nua malavu mankolwa ko, aweyi o Nkristu kafwete badikilanga awana benuanga mo?

Kanele vo Nkristu olenda nua malavu mankolwa, ediadi ke disongele ko vo kafwete nuanga ntangwa zawonso. Tanga Ngana 22:3, i bosi, badika mambu malende oma malenda kufila mu baka e nzengo zalembi nua malavu mankolwa:

• Avo kalu odiatisa yovo masini osadila.

• Avo wayimita wina.

• Avo dotolo usimini mo.

• Avo kukalanga ye volo ko muna tezo kia malavu onuanga.

• Avo mun’owu wa nsiku a luyalu kuna ye nswa ko wa nua malavu.

• Avo muntu una yandi wayambula nua malavu, wau vo kakalanga ye volo ko vava kanuanga mo.

Nga ofwete kaya malavu mankolwa muna nkinzi a lukazalu yovo muna nkinzi miankaka? Muna zaya dina dilenda kusadisa, tala e VIDEO.

VIDEO: Nga Mfwete Nua Malavu Mankolwa? (2:41)

Tanga Roma 13:13 ye 1 Korinto 10:31, 32. Vava otanga konso sono, vana e mvutu za kiuvu eki:

• Osadila nkanikinu wau, aweyi dilenda kusadisila mu baka e nzengo ziyangidika Yave?

5. Sikidisa e tezo kia malavu onua

Avo obakidi nzengo za nua malavu mankolwa, sungamena diambu diadi: Yave ke simanga nua malavu mankolwa ko, kansi osimanga e fu kia nua malavu mayingi. Ekuma? Tanga Osea 4:11, 18, i bosi, vana e mvutu za kiuvu eki:

• Nkia diambu dilenda vangama avo muntu onuini malavu mayingi?

Adieyi dilenda kutusadisa mu venga e fu kia nua malavu mayingi? Tufwete zayanga e tezo kieto. Tanga Ngana 11:2, i bosi, vana e mvutu za kiuvu eki:

• Ekuma dinina diambote mu sikidisa e tezo kia malavu ofwete nua?

6. Nkia mambu malenda sadisa muntu mu yambula nua malavu mayingi?

VIDEO: ‘Kiazolanga Diaka Mpil’a Zingu Kiame Ko’ (6:32)

• Vava Dmitry kanuanga malavu mankolwa, nkia mambu kavanganga?

• Nga wayambula nua malavu vana vau?

• Aweyi kalenda sundila e fu kia kolwa malavu?

Tanga 1 Korinto 6:10, 11, i bosi, vana e mvutu za yuvu eyi:

• Adieyi Bibila kivovanga mu kuma kia fu kia kolwa malavu?

• Nkia diambu disonganga vo nduvu a malavu olenda soba?

Tanga Matai 5:30, i bosi, vana e mvutu za kiuvu eki:

• Vava Yesu kayika e nona kia zenga koko, wasonga vo tufwete yambula vanga mambu mankaka kimana twayangidika Yave. Adieyi ofwete vanga avo fu kia kolwa malavu onuananga kiau?a

Tanga 1 Korinto 15:33, i bosi, vana e mvutu za kiuvu eki:

• Avo akundi aku malavu mayingi benuanga, nkia mfwilu dilenda kutwasila?

MAMBU MASINA MA LONGI DIADI

Yave watuvana malavu se lukau muna kutuyangidika, kansi osimanga e fu kia nua malavu mayingi yovo kolwa.

Nkia Mambu Olongokele?

• Adieyi Bibila kivovanga mu kuma kia malavu mankolwa?

• O nua malavu mayingi, nkia vonza dilenda twasa?

• Aweyi tulenda zitisila nzengo za akaka mu kuma kia malavu mankolwa?

TALA MPE OMA MALENDE

Aweyi aleke balenda bakila nzengo zambote mu diambu ditadidi malavu mankolwa?

Baka Nzengo Zambote mu Kuma kia Malavu Mankolwa (2:31)

Tala mambu olenda vanga mu sunda e fu kia nua malavu mayingi.

“Kala ye Nyindu Asikila mu Kuma kia Malavu ma Nkolwa” (Eyingidilu dia Yuli-Setemba, 2010)

Nga Akristu bafwete totakesa makopo yo lomba nsambu vava benuanga malavu?

“Perguntas dos Leitores” (Eyingidilu dia 15 dia Fevelelo, 2007)

Muna zaya una muntu mosi kayambulwila nua malavu mayingi, tala lusansu “Eu Era um ‘Barril sem Fundo’.”

“A Bíblia Muda a Vida das Pessoas” (Eyingidilu dia 1 dia Mayu, 2012)

Konso muntu una ye mpil’andi ya vuatila yo kuyikubika ina ketoma yangalelanga. Avo tulende e nkanikinu mia Bibila, ke tuvuatila kaka muna mpila tuzolanga ko, kansi muna mpila iyangidikanga Yave. Yambula twafimpa miankaka muna nkanikinu miami.

1. Nkia nkanikinu milenda kutusadisa mu baka nzengo zambote mu diambu ditadidi vuata yo kuyikubika?

Wau vo tu selo ya Yave, tufwete kalanga twavelela e ntangwa zawonso muna vuatanga “mvuatu miambote, kuna zitu yo lulungalalu.” Muna mpila yayi i tusongela vo ‘Nzambi tuvuminanga.’ (1 Timoteo 2:9, 10) Tala nkanikinu yá milenda kutusadisa: (1) Mvuatu mieto mifwete kala “miambote.” Nze una omonanga muna tukutakanu, konso muntu muna nkangu a Yave una ye mpil’andi ya vuatila keyangalelanga, kansi e mvuatu mieto ye mpila tukubikilanga e nsuki zeto, ivananga o zitu kwa Nzambi tusambilanga. (2) Vuatila “kuna zitu.” Ediadi disongele vo e mvuatu mieto ke mifwete songanga nitu ko yovo fila wantu mu yindula vo songa tukuyisonganga. (3) Tusonganga “lulungalalu” muna lembi landa konso mpila ya vuatila yo kuyikubika ivaikiswanga mu nza. (4) E mpw’eto ifwete songanga o ‘vumi wa Nzambi’ kimana akaka babakula vo Nzambi aludi tusambilanga.—1 Korinto 10:31.

2. Ekuma tufwete yindulwilanga mpangi zeto vava tusolanga e mvuatu tuvuata?

Dialudi vo tuna yo nswa wasola e mvuatu tuzolele vuata, kansi diambote twayindulanga dina akaka bevova mu kuma kia mpw’eto. Ke tuzolele kendeleka akaka ko. Kansi tuzolele vanga mawonso tulenda mu ‘yangidika akweto muna wete diau yo kubakasakesa.’—Tanga Roma 15:1, 2.

3. Aweyi e mpil’eto ya vuatila ilenda fidila akaka mu longoka mambu ma Yave?

Ntangwa zawonso tuzolanga vuatila mu mpila yambote, musungula vava tukwendanga muna tukutakanu ye muna salu kia umbangi. Ke tuzolele ko vo e mpw’eto yafila wantu balembi tambulwila e nsangu zambote tunatanga. Kansi, tuzolele vo e mpw’eto yafila akaka mu zola longoka mambu ma Nzambi ona tusadilanga yo “viengesa e longi dia Nzambi wa Mvuluzi eto.”—Tito 2:10.

ZAYA DIAKA MANKAKA

4. Vava tutoma kuyikubikanga tusonganga vo Yave tuzitisanga

Ekuma dinina o mfunu mu toma lunga-lunganga e mpw’eto? Tanga Nkunga 47:2, i bosi, vana e mvutu za yuvu eyi:

• Wau vo Yave tusunzulanga, ediadi aweyi difwete vanga muna mpil’eto ya vuatila?

• Adieyi obenze, nga diamfunu mu toma lunga-lunganga e mpw’eto vava tukwendanga muna tukutakanu ye muna salu kia umbangi? Ekuma?

5. Aweyi olenda bakila nzengo zambote mu diambu ditadidi vuata yo kuyikubika?

Tala e VIDEO.

VIDEO: “Nuvangila Mawonso Muna Nkembo a Nzambi” (10:18)

Kiakala vo e mvuatu mieto miantalu yovo ve, mifwete kalanga miavelela ye mifwete kala betela ye fulu kina twina. Tanga 1 Korinto 10:24; ye 1 Timoteo 2:9, 10. I bosi, yika ekuma tufwete venga vuatila mvuatu . . .

• mia mvindu yovo miavuangalakana.

• miakangama muna nitu yovo milenda fila wantu mu kala ye ngindu zambi mu kuma kieto.

Akristu ke bena kunsi a Nsiku a Mose ko, kansi ulenda kutulonga mayingi mu diambu ditadidi ngindu za Yave. Tanga Nsiku 22:5, i bosi, vana e mvutu za kiuvu eki:

• Ekuma tufwete vengela mpila ya vuatila ye kuyikubika ikitulanga akala nze akento ye akento nze akala?

Tanga 1 Korinto 10:32, 33 ye 1 Yoane 2:15, 16, i bosi, vana e mvutu za yuvu eyi:

• Ekuma tufwete kuyikebelanga kimana e mpw’eto yalembi kendeleka akaka vana belo kieto yovo muna nkutakani?

• Aweyi o wantu muna zunga kiaku bevuatilanga ye kuyikubikila?

• Nga obenze vo e mpila akaka bevuatilanga ke yambote ko kwa Akristu? Ekuma?

MAMBU MASINA MA LONGI DIADI

Vava tubakanga nzengo zambote mu diambu ditadidi vuata yo kuyikubika, tusonganga zitu kwa Yave ye kwa akaka.

Nkia Mambu Olongokele?

• Ekuma e mpil’eto ya vuatila yo kuyikubika inina o mfunu kwa Yave?

• Nkia miaka nkanikinu milenda kutusadisa mu baka nzengo zambote mu mpila yavuatila yo kuyikubika?

• Aweyi e mpw’eto ilenda vanina kimbangi kiambote yovo kimbangi kiambi muna nkumbu a Yave?

TALA MPE OMA MALENDE

Tala dina akaka balenda yindula mu kuma kiaku vava bemonanga e mpil’aku yavuatila.

“E Mvuatu Miame Adieyi Misonganga mu Kuma Kiame?” (Longi dina muna jw.org)

Tala e kuma dinina diangangu mu teka toma yindula vitila wazengesa e nsamba (tatuagem) muna nitu.

“Adieyi Bibila Kivovanga mu Diambu Ditadidi Zengesa Nsamba Muna Nitu?” (Longi dina muna jw.org)

Tala nkanikinu miankaka milenda kusadisa mu baka nzengo zambote muna mpil’aku yavuatila.

“E Mvuatu Miaku Nga Mivananga Nkembo kwa Nzambi?” (Eyingidilu dia Setemba, 2016)

Aweyi nkento mosi ona wazola yangidika Nzambi kasobela e ngindu zandi yo tambulwila e nzengo za akaka mu diambu ditadidi vuata yo kuyikubika?

“O Modo de me Vestir e Arrumar era Minha Pedra de Tropeço” (Sikama! 22 Desemba, 2003)