LUNDILU DIA NKANDA MU INTERNETE - dia Mbangi za Yave
Torre de Vigia
LUNDILU DIA NKANDA MU INTERNETE
Kikongo
  • BIBILA
  • NKANDA
  • TUKUTAKANU
  • w05 1/9 luk. lwa 8-12
  • Nga Omwesa O Nkembo A nzambi?

E kunku kiaki ke kina ye video ko

Utuloloka, vilwa uvangamene muna nsogelo video.

  • Nga Omwesa O Nkembo A nzambi?
  • Eyingidilu—2005
  • Ntu mia Mambu Miakete
  • Malongi Mena Mfwanani
  • Una Akristu Bemwesanga o Nkembo a Nzambi
  • E Salu kia Nkangu a Yave ke Kilendi Simwa Ko
  • Luzindalalu kwa Yave Lutukanga
  • Salu Kisinga Sungamenwa
  • Nga Omwesanga Nkembo a Yave?
    Eyingidilu—2012
  • Akristu Bemwesanga Nkembo A Yave
    Eyingidilu—2005
  • Kuyambula Konso Diambu ko Diakakidila mu Tambula Nkembo
    Eyingidilu—2013
  • Lukutakanu lwa Mvivu Lutukasakese mu Kembelela Nzambi!
    Salu Kieto Kia Kintinu—2003
Tala Diaka
Eyingidilu—2005
w05 1/9 luk. lwa 8-12

Nga Omwesa O Nkembo A nzambi?

‘Tumwesa nkembo a Yave nze pelo.’​—⁠2 KORINTO 3:⁠18.

1. O Mose nki kamona? Adieyi diabwa?

EMONA-MESO kiakina ki’esivi ke kisidi mona muntu ko. Mose yandi mosi kakala vana Mongo a Sinai vava Nzambi kansonga dina kalomba. Wasongwa o nkembo a Yave una ke wamonwa kwa muntu ko. O Mose kamona Yave ko, kadi ke vena muntu ko olenda mona Nzambi yo zinga diaka. O mbasi wasia koko kwandi vana ndose a Mose nze fukwa, kalembi mona Yave yavana kavioka. I bosi, o Yave wayambula vo Mose kamona e mona-meso kia nkembo andi. Yave wasadila mpe mbasi mu vovana yo Mose. O Nkand’a Nzambi usonganga dina diabwa, oku vo: “O Mose vava kakulumukini muna mongo a Sinai . . . o nkand’andi a lose ukezimini wau kavovanga yandi.”​—⁠Luvaiku 33:18–34:​7, 29.

2. O Paulu wa ntumwa adieyi kasoneka mu kuma kia nkembo una bemwesanga Akristu?

2 Yindula vo vana mongo wauna wina yo Mose. Kiese kikilu wadi kala kiau mu mona o nkembo a Nzambi wa Mpungu-ngolo yo wa e nding’andi. Elau diampwena wadi kala diau dia kangala kumosi yo Mose wa nkambami ekangu dia nsiku vana Mongo a Sinai. Nga ozeye wo vo Akristu a kieleka mpe bemwesanga o nkembo a Nzambi ulutidi una o Mose kamwesa? E ziku kia diambu diadi kina muna nkanda wasonekwa kwa Paulu wa Ntumwa. Wasoneka vo Akristu akuswa ‘bemwesanga o nkembo a Yave nze pelo.’ (2 Korinto 3:​7, 8, 18) Akristu ana bena ye vuvu kia zingila ova ntoto yakwele mvu bemwesesanga mpe o nkembo a Nzambi.

Una Akristu Bemwesanga o Nkembo a Nzambi

3. Aweyi tulutidi zayila Yave vioka e mpila yina Mose kanzayila?

3 Aweyi tulenda mwesa o nkembo a Nzambi? Ke tumonanga Yave ko ngatu wa nding’andi nze Mose. Kansi, tulutidi zaya Yave vioka mpila yina Mose kanzayila. Tezo kia mvu 1.500 miavioka tuka lufwa lwa Mose yamu mvu una o Yesu kakuswa mu kituka se Masia. Muna kuma kiaki, Mose kazayanga ko una ulunganena o Nsiku muna Yesu, ona wafwa mu kula o wantu muna tumbu ki’esumu yo lufwa. (Roma 5:​20, 21; Ngalatia 3:​19) Vana ntandu, o Mose kakala yo umbakuzi wafwana ko w’ekani dia Yave mu kuma kia Kintinu kia Masia ye Paradiso kitwasa ova ntoto. Kansi oyeto tumonanga o nkembo a Yave, ke mu meso meto ma nitu ko, kansi muna lukwikilu lutukanga muna malongi ma Nkand’a Nzambi. Tuwanga mpe e nding’a Yave, ke mu lusadisu lwa mbasi ko, kansi muna Nkand’a Nzambi, musungula muna nsangu zambote ziyikanga malongi ma Yesu ye salu kasala ova ntoto.

4. (a) Akristu akuswa aweyi bemwesanga o nkembo a Nzambi? (b) Awana bena ye vuvu kia zinga ova ntoto aweyi balenda mwesa o nkembo a Nzambi?

4 Kana una vo e ndose za Akristu ke zivayikisanga nsemo ko muna mwesa nkembo a Nzambi, e ndose zau zikezimanga vava bezayisanga e nkal’a Yave ye makani mandi kw’akaka. Muna kuma kia lumbu yeto, o Yesaya wa ngunza wasoneka vo nkangu a Nzambi ‘besamuna nkembo a Yave muna zula.’ (Yesaya 66:​19) Vana ntandu, muna 2 Korinto 4:​1, 2 tutanganga vo: “Wau tuna yo uselo wau . . . , tuvwidi mo keng’ak’o mambu maswekama ma nsoni, ke tukangalanga ya umpuki ko, ngatu lûmb’o mambu ma Nzambi; kansi muna lusengomono lua ludi tukusongelanga kwa ntona zawonso za wantu, vana ndose a Nzambi.” Muna sono kiaki, o Paulu Akristu akuswa kayika ana bena yo “uselo w’ekangu diampa.” (2 Korinto 3:⁠6) Kansi, e salu kiau kia umbangi kituntanga ulolo wa wantu ana bena ye vuvu kia zingila ova ntoto yakwele mvu. E salu kia buka yau yole kivavanga vo bamwesa o nkembo a Yave ke mu mana belonganga kaka ko, kansi ye muna mavangu mau. Tuvwidi elau ye mbebe ya mwesa o nkembo a Nzambi wa Mpungu-ngolo.

5. E nsambu za mwanda tubakanga nkia ziku zisonganga?

5 Nze una Yesu kavova, o unu e nsangu zambote za Kintinu kia Nzambi zisamunwanga muna nza yawonso. (Matai 24:​14) Wantu a zula yawonso, ye makanda, ye nsi ye ndinga betambulwilanga e nsangu zambote yo soba e zingu yau mun’owu wa luzolo lwa Nzambi. (Roma 12:2; Lusengomono 7:⁠9) Nze Akristu a tandu kiantete, ke beyambulanga vova mana bamona yo wa ko. (Mavangu 4:​20) O unu, vioka mazunda sambanu ma mazunda ma wantu bemwesanga o nkembo a Nzambi, ke mu tandu yakaka ko muna lusansu lwa wantu. Nga u mosi muna yau? E nsambu za mwanda bebakanga e selo ya Nzambi, zisonganga e ziku kia lusadisu lwa Yave. E ziku kiampwena kisonganga vo mwand’a Yave una yeto, i ulolo wa mbeni zikutusianga e kitantu. O wau, yambula twazaya ekuma tuvwididi o mfunu wa mwand’a Yave.

E Salu kia Nkangu a Yave ke Kilendi Simwa Ko

6. Ekuma lukwikilu yo unkabu winina o mfunu muna kuyisia kuna sambu dia Yave?

6 Yindula vo obokelo kuna mbazi a nkanu mu sila kimpumbulu umbangi. Ozeye wo vo kimpumbulu kiaki ovwidi akundi ayingi akw’etunda. Osinga vanga mawonso kalenda mu kusima walembi senzeka o bi wandi. Muna senzeka o bi wandi, divava vo wakala yo unkabu ye vuvu kia sia vo e mfumu za luyalu balenda kutanina. Ediadi divangamanga mpe kwa yeto. Vava tusilanga Yave ye makani mandi umbangi, tusenzekanga Nkadi Ampemba wa Satana vo nkwa nsoki yo luvunu, ona obendomonanga o wantu a nza yawonso. (Yoane 8:44; Lusengomono 12:⁠9) Lukwikilu yo unkabu uvavwanga muna kala kuna sambu dia Yave yo sia Nkadi Ampemba e kitantu.

7. O Satana nkia wisa kena kiau? Adieyi kevavanga o vanga?

7 Kieleka, Yave i Mpungu-ngolo. O nkum’andi usundidi owu wa Satana. Tulenda kala ye vuvu vo Yave kavwidi kaka nkuma wakututanina ko, kansi ozolanga wo vanga vava tukunsadilanga ye kwikizi kiawonso. (2 Tusansu 16:⁠9) Satana i nyadi a nkwiya ye nza yayi yavambana yo Nzambi. (Matai 12:​24, 26; Yoane 14:​30) Wau vo watubwa ova ntoto ye una ye “makasi mayingi,” Satana osianga selo ya Yave e kitantu yo sadila e nza yina kuna nsi a wisa kiandi mu vava sima awonso besamunanga e nsangu zambote. (Lusengomono 12:​7-9, 12, 17) Nkia mpila kevangilanga wo? Mu mpila tatu.

8, 9. O Satana aweyi kesadilanga o zola mu mpila yambi? Ekuma tufwete solelanga awana tuvanga yau kikundi?

8 E mpil’antete in’o Satana kevavilanga kutuvukumuna, i mambu ma zingu. Muna lumbu yayi yambaninu, o wantu bakitukidi se azodi a nzimbu, akwa kuzola ye azodi a nkembo ke mu Nzambi ko. (2 Timoteo 3:​1-4) Muna kuma kia tokanena mambu ma zingu kia lumbu ke lumbu, wantu ayingi ke ‘besianga sungididi’ ko muna nsangu zambote tusamunanga. Ke bezolanga longoka ludi kia Nkand’a Nzambi ko. (Matai 24:​37-​39) E fu kiaki kialembi yangalela mambu ma mwanda kilenda kutusambukila. Avo tuyivene mvimba muna mambu ma mavwa yo mawete ma zingu, o zola kweto muna Nzambi kulenda vola.​—⁠Matai 24:12.

9 Muna kuma kiaki, Akristu bafwete solanga awana bevanga yau kikundi. Ntinu Solomo wasoneka vo: “On’okangala y’akwa ngangu, okal’e ngangu: O makangu ma mazowa, mpasi kemona.” (Ngana 13:​20) Yambula ‘twakangalanga’ y’awana bemwesanga o nkembo a Nzambi. O vanga wo i diambu dia kiese kikilu. Vava tukalanga ye mpangi zeto z’Akristu muna tukutakanu tweto ye mu ntangwa zakaka, tukasakeswanga kwa zola kwau, lukwikilu, kiese yo zayi wau. Kikundi kiaki kikumikanga ekani dieto dia zindalala muna salu kia umbangi.

10. O Satana aweyi kevezelanga awana bemwesanga o nkembo a Nzambi?

10 Luvezo i mpila yazole o Satana kevavilanga sima Akristu awonso balembi mwesa o nkembo a Nzambi. Ediadi ke di’esivi ko kwa yeto. Vava kakala ova ntoto, o Yesu wavezwa, wasevwa, wabangikwa yo vumwa mete vana lose. (Maku 5:40; Luka 16:14; 18:​32) Akristu a tandu kiantete mpe basevwanga. (Mavangu 2:13; 17:​32) Ediadi mpe divangamanga kwa selo ya Yave o unu. Nze una wavova Petelo wa ntumwa, e selo ya Yave bebadikilwa nze ngunza za luvunu. Petelo wasoneka vo: “Muna lumbu yambaninu mukwiz’akwa nsokela ye nsokela, ana belandang’omau maketo, yo vova vo, o nsilu a ngiz’andi aweyi? Kadi, . . . lekwa yawonso ina una, tuka kuna lubantiku lu’esemo.” (2 Petelo 3:​3, 4) E selo ya Nzambi bevezwanga nze wantu ke bevovanga ludi ko. E nsiku mia Nkand’a Nzambi mibadikilwanga vo miankulu. Kuna kw’akaka, e nsangu tusamunanga za uzowa. (1 Korinto 1:​18, 19) Nze Akristu tulenda vezwa kuna sikola, kuna salu ye ntangwa zakaka kwa yitu yeto. Kansi, tukwamanananga songa o nkembo a Nzambi muna salu kieto kia umbangi, kadi nze Yesu, tuzeye wo vo e Diambu dia Nzambi i ludi.​—⁠Yoane 17:⁠17.

11. O Satana aweyi kesadilanga lubangamu mu vava kakila e salu kia Akristu?

11 E mpila yatatu in’o Nkadi Ampemba kevavilang’o sima e salu kia umbangi kia selo ya Yave i kubasia kitantu yovo kubabangika. Yesu wavova kw’alongoki andi vo: “Bekunuyekola muna mpasi, yo kunuvonda: nwasaulwa kwa zula yawonso muna nkumbu ame.” (Matai 24:⁠9) Kieleka, wau vo tu Mbangi za Yave, tubangikwanga muna nsi zayingi. Tutomene zaya dina kavova o Yave vo vekala ye kitantu vana vena selo ya Nzambi ye selo ya Nkadi Ampemba wa Satana. (Etuku 3:​15) Tuzeye wo mpe vo muna zizidilanga e mpasi, tusianga umbangi wa kimfumu kia Yave kia nz’amvimba. O zaya wo dilenda kutukumika mu zizidila e mpasi. Ke vena lubangamu ko lulenda kakila e salu kieto avo tukedi y’etima dia mwesa o nkembo a Nzambi.

12. Ekuma tufwete yangalela vava tuzizidilanga e kitantu kia Satana?

12 Nga ozizidilanga e ntonta za nza ye kwikizi kiawonso kana una vo osiwanga kitantu yo vezwa? Avo i wau, ovwidi kuma kia yangalala. Yesu wavova kw’alongoki andi vo: “Nu akwa nsambu, ovo wantu bekunutumba, yo kunubangika, yo kunuyikila bi wawonso kuna luvunu, muna kuma kiame. Nukemba, nwayangalala kikilu: kadi nsendo eno unene kun’ezulu: kadi i mbangika babangika ngunza zina zanuvita.” (Matai 5:​11, 12) O luzindalalu lwaku lusonganga vo mwand’avelela a Yave una yaku, ukukumikanga muna mwesa o nkembo andi.​—⁠2 Korinto 12:⁠9.

Luzindalalu kwa Yave Lutukanga

13. Nkia kuma tuzindalelanga muna salu kieto kia Kikristu?

13 Zola Yave yo yangalela mwesa nkembo andi i kuma tuzizidilanga muna salu kia umbangi. O wantu bevavanga tanginina awana bezolanga yovo zitisa. O Yave wafwana tangininwa kadi osundidi wantu awonso. Muna kuma kia zola kwandi, wafila Mwan’andi ova ntoto mu sila ludi o umbangi yo vuluza alembami. (Yoane 3:16; 18:​37) Nze Nzambi, tuzolele vo wantu awonso baviluka o ntima yo vuluzwa. Ekiaki i kuma tukubasilanga umbangi. (2 Petelo 3:⁠9) O luzolo lwalu kumosi y’ekani dieto dia tanginina Nzambi, lukutufilanga mu kwamanana mwesa o nkembo andi muna salu kieto kia umbangi.

14. O Yave aweyi kekutukumikinanga mu zindalala muna salu kieto?

14 Kansi kadi, e ngolo za luzindalalu lweto muna salu kia Kikristu, kwa Yave zitukanga. Okutukumikanga yo kutukasakesa muna mwand’andi, nkubik’andi ye Diambu diandi dina vo i Nkand’a Nzambi. Yave ‘ovananga luzindalalu’ kw’awana bezolanga mwesa nkembo andi. Ovananga mvutu za sambu yeto yo kutuvana e ngangu mu zizidila mpasi. (Roma 15:5; Yakobo 1:⁠5) Vana ntandu, Yave ke yambulanga ko vo tuabwilwa e mpasi zina ke tulendi zizidila ko. Avo tubunda e vuvu muna Yave, oteta nzila kimana twakwamanana mwesa o nkembo andi.​—⁠1 Korinto 10:⁠13.

15. Nki kikutusadisanga mu zindalala muna salu kia umbangi?

15 O luzindalalu muna salu kieto kia umbangi lusonganga vo mwand’a Nzambi una yeto. Muna bong’e nona: Yindula vo muntu utumini wakayanga e mbolo mu nzo ye nzo, lembi lomba nzimbu. Uzayisi vo wasala e salu kiaki muna nzimbu za ngeye kibeni ye ntangwa in’ozolele. I bosi, omwene vo wantu akete kaka beyangalelanga e mbolo zaku, akaka nkutu basidi kitantu muna ngolo zina ovanganga za kubakayila e mbolo. Adieyi obenze, nga okwamanana sala salu kiaki ngonde zawonso ye mvu ke mvu? Ve. Kansi, se mvu miayingi, ongeye osadilanga e ntangwa ye nzimbu zaku muna samun’e nsangu zambote. Ekuma? Ekuma kadi Yave ozolanga ye muna mwand’andi, osambulanga e ngolo zaku yo kusadisa mu zindalala muna salu kiaki.

Salu Kisinga Sungamenwa

16. O luzindalalu muna salu kia umbangi nki lutwasa kwa yeto y’awana bekutuwanga?

16 O uselo w’ekangu diampa lukau lwa mfunu kikilu. (2 Korintu 4:⁠7) Diau adimosi, e salu kia Kikristu kisalwanga kwa mameme makaka mu nza yawonso, salu kia mfunu kikilu. Nze una Paulu kasonekena Timoteo, avo ozindalele muna salu kia umbangi, ‘okuyivuluza y’awana bekuwanga.’ (1 Timoteo 4:​16) Yindula una disonganga ediadi. E nsangu zambote osamunanga zivananga kw’akaka elau dia zinga yakwele mvu. Olenda vanga kikundi y’awana osadisanga muna mwanda. Yindula e kiese kia zinga yakwele mvu muna Paradiso, kumosi y’awana wasadisa mu longoka oma ma Nzambi! Kieleka, ke bevilakana ko e ngolo wavanga mu kubasadisa. Ekwe kiese okala kiau!

17. Ekuma e tandu kieto kisundidi o mfunu muna lusansu lwa wantu?

17 E tandu ozingilanga i tandu kisundidi o mfunu muna lusansu lwa wantu. Vesinga kala ye ntangwa, e nsangu zambote ke zisamunwa diaka ko kwa wantu a nza yavambana yo Nzambi. O Noa mu nza ya mpila yayi kazingila ye wamona yo vava yafwaswa. Ekwe kiese kamona mu zaya vo walungisa luzolo lwa Nzambi muna tunga e nzaza yina yamvuluza y’esi nzo andi! (Ayibere 11:⁠7) Ngeye mpe olenda mona kiese kiaki. Yindula e kiese okala kiau muna nz’ampa vava osungamena e salu osalanga mu lumbu yayi yambaninu yo zaya vo wavanga mawonso walenda mu nungununa e salu kia Kintinu.

18. Nkia vuvu yo lukasakeso kevananga o Yave kwa selo yandi?

18 Muna kuma kiaki, mbula twakwamanana mwesa o nkembo a Nzambi. Avo tuvangidi wo, ekiaki kikala se salu kina tusinga sungamena yakwele mvu. O Yave osungamenanga mpe e salu kieto. O Nkand’a Nzambi ukutuvovesanga vo: “Nzambi kakondelo nsongi ko, ovo ovilakanwa salu kieno, yo zola nusongèle nkumbu andi, wau nwasadil’aveledi, yo kubasadilanga wau. Tuzolele vo konso muntu vovo nwin’osong’e sungididi kiau akimosi yamuna lusikidisu lua vuvu, yakuna nsuka: ke nwakala miolo, nu atanginini ak’awana bena vo, muna lukwikilu yo luzindalalu i bevwidila e nsilu.”​—⁠Ayibere 6:​10-12.

Nga Olenda Sasila?

• Akristu aweyi besongelanga o nkembo a Nzambi?

• O Satana nkia ntambu kesadilanga mu vava sima e salu kisalanga selo ya Nzambi?

• Nkia ziku kisonganga vo mwand’a Nzambi una yeto?

[Mvovo mia Fwaniswa mina muna lukaya lwa 9]

E ndose a Mose yamwesa o nkembo

[Mvovo mia Fwaniswa mina muna lukaya lwa 10]

Tumwesanga nkembo a Nzambi muna salu kieto kia  umbangi

    Nkanda mia Kikongo (1986-2025)
    Vaika
    Kota
    • Kikongo
    • Twika
    • Adieyi ozolele?
    • Copyright © 2025 Watch Tower Bible and Tract Society of Pennsylvania
    • Termos de Uso
    • Nsiku wa Mbumba
    • Configurações de privacidade
    • JW.ORG
    • Kota
    Twika