Ngangu Zisadisanga mu Kala ye Nzo Yakiese

Akala, Nuzolanga Akazi Eno

“O yakala kafwete zolanga nkaz’andi wauna kezolelanga e nitu a yandi kibeni. Yakala ona ozolanga nkaz’andi, zola kekukizolanga, kavena muntu ko omenganga e nitu andi, kansi odikilanga yo lunga-lunga yo.”—EFESO 5:28, 29.

O yakala i ntu muna nzo. (Efeso 5:23) Kansi o yakala diambote, ke nkwa ntim’a mbadi ko. Ozitisanga nkaz’andi yo kunlunga-lunga muna nitu ye muna ngindu. Ovanganga mpe ngolo muna kunyangidika, ke vavanga ko vo mambu mavangilwa kaka muna mpila ina kazolele. (Filipi 2:4) Otoma mokenanga yandi yo toma kunwinikina. Ke kumfungilanga “makasi ma ndudi” ko, ngatu kumwesa e mpasi muna nitu yovo muna ngindu.—Kolosai 3:19.

Akento, Nuzitisanga Akala Eno

“Nkento kafwete toma zitisanga yakala diandi.”—EFESO 5:33.

Vava nkento kezitisanga yakala diandi yo yikama e nzengo zandi, osiamisanga o luvuvamu muna nzo. Avo yakala ovangidi diambu diambi, o nkento ke kumvezanga ko, kansi okwamanananga songa ntim’anleka yo luzitu. (1 Petelo 3:4) Avo diambu kazolele zayisa kwa nkaz’andi, osolanga e ntangwa yambote yo vovela kuna luzitu.—Kimpovi 3:7.

Kala ye Kwikizi Kuna kwa Nkaz’aku

‘O yakala . . . otatidila nkaz’andi, bekituka se nitu mosi.’—TUKU 2:24.

Vava yakala yo nkento bekazalanga, bekitukanga se esi nzo mosi yo kala ye ngwizani ambote. Muna diadi, muna siamisa o longo lwau, o yakala yo nkento bafwete vanganga e ngolo mu mokenanga yo songaziana e ngemba. Bafwete kalanga mpe ye kwikizi kwa muntu yo nkwandi muna lembi tá e zumba. O kondwa kwikizi muna longo, vangu diansoki. Difilanga akazi mu lembi bundaziana e vuvu yo vambula esi nzo.—Ayibere 13:4.

Mase ye Angudi, Nulonganga Wan’eno

“Longa mwana muna nzila ina kafwete kwendela; kana nkutu vava kenuna ke vengomoka mo ko.”—NGANA 22:6.

O Nzambi wavana e mbebe kwa Se yo Ngudi ya longanga wan’au. Ediadi divavanga vo babalonga una bafwete kadilanga yo kubasonga mbandu ambote. (Nsiku 6:6, 7) Avo mwana ovangidi diambu diambi, o se yovo ngudi a ngangu ke kumbaminanga ko. Kafwete kalanga “ye nzaki za wá, kansi kakadinge ye nzaki za vova ko, kafunginge mpe makasi mu nzaki ko.” (Yakobo 1:19) Avo o se yovo ngudi ozolele tumba o mwana, kafwete wo vangila kuna zola, ke ku makasi ko.

Wana, Nulemvokelanga Mase ye Ngudi Zeno

“E wana, nulemvokelanga mase meno ye ngudi zeno . . . ‘Zitisa se diaku yo ngudi aku.’”—EFESO 6:1, 2.

Wana bafwete lemvokelanga mase ye ngudi zau yo kubazitisanga. Vava wana bezitisanga mase ye ngudi zau, betwasanga kiese yo siamisa luvuvamu muna nzo. O wana bena vo se ambuta, muna songa vo bezitisanga mase ye ngudi zau, bafwete kubalunga-lunganga. Ediadi divavanga vo bavangululanga e nzo zau yovo kubavana lusadisu lwa nzimbu.—1 Timoteo 5:3, 4.