Nsabi Muna Yangalela Ina Una Yau

Salanga ye Fululu

“Yambula kasalanga ye fululu kiawonso, kimana kasala e salu kiambote muna moko mandi, kakala ye kina kekayila ndiona okondelo.”—EFESO 4:28.

O Mvangi eto okutusakesanga twakala ye ngindu zasikila mu kuma kia salu. Ekuma? O nkwa fululu muna salu kiese kekalanga kiau, kadi olendanga kuyidikila y’esi nzo andi. Olenda kayila mpe ndiona okendelo. O mfumu andi a salu mpe otoma kunyangalela. Muna diadi, diampasi dikalanga mu katulwa mu salu. E Bibila kiyikilanga o nsendo kebakanga nkwa fululu vo “lukau lwa Nzambi.”—Kimpovi 3:13.

Kala Nkwa Ziku

“Tuna ye ntona zambote, tuzolele kala akwa ziku muna mambu mawonso.”—AYIBERE 13:18.

Avo tu akwa ziku, tukuyimwene e bula, tukala ye luvuvamu lwa ntima yo lekanga tulu twambote. Vana ntandu, akaka bekutubunda e vuvu yo kutuzitisa. Awana bena vo ke akwa ziku ko, yau kibeni bekakidilanga e nsambu zazi. E ntona zau zikubatumbanga yo zingila mu wonga wasia vo balenda tunguluka yo bakama.

Kala ye Ngindu Zasikila mu Kuma kia Nzimbu

“Yambula e zingu kieno kiakondwa zola muna nzimbu, nuyangalelanga ina nuna yau.”—AYIBERE 13:5.

Nzimbu tuvuanga o mfunu muna sumba madia ye lekwa yankaka. Kansi, dia vonza kikilu mu ‘zolanga e nzimbu.’ Dilenda fila muntu mu sadilanga kaka e ntangwa ye ngolo zandi zawonso muna baka nzimbu zayingi. O zola nzimbu kulenda fila muntu mu sia longo lwandi mu vonza, vidisa e ntangwa ina kafwete kalanga ye wan’andi yo sia nkutu vimpi wandi mu vonza. (1 Timoteo 6:9, 10) Edi disundidi o bi, o munzola a nzimbu olenda bwa mu ntonta za vanga diambu dialembi songa. O Solomo wa nkwa ngangu wavova vo: “O nkwa kwikizi nsambu zayingi ketambula, kansi, ndiona ovavanga vuama mu nzaki, ke kala kaka munkondwa-kuma ko.”—Ngana 28:20.

Sola Malongi Masundidi

“Tatidila ngangu za vimpi ye ndwenga.”—NGANA 3:21.

E ngangu za sikola zisadisanga muntu mu bundwa e vuvu muna kimbuta yo kituka se yovo ngudi ambote. Kansi, e ngangu za sikola kaka, ke zilendi twasa kiese kiakieleka ko ye zingu kiasikila. Muna diadi, muna kala wasikila muna mambu mawonso ma zingu, tufwete longwanga kwa Nzambi. E Bibila kivovanga mu kuma kia muntu olongwanga kwa Nzambi vo: “Mawonso kevanga mesikila.”—Nkunga 1:1-3.