Ke Mu Mavangu Kaka Ko Tuvuluzilwa, Kansi Mu Nsambu Za Yave
“Muna nsambu i nuvuluzilu muna lukwikilu; . . . ke wa mavangu ko, ke vakala on’okusana.”—EFESO 2:8, 9.
1. Akristu nkia mpila baswaswanena ye wantu muna mavangu mau, ekuma?
OUNU wantu bekitukanga akwa lulendo yo kuyisana mu kuma kia mavangu mau. Akristu nswaswani bena. Ke bekuyisananga ko mu kuma kia salu yau, kana nkutu eyi ya mwanda. Kana una vo beyangalelanga salu kisalwanga kwa nkangu a Yave mu nz’amvimba, ke besanisinanga salu kisalanga konso muntu ko. Bazeye wo vo edi disundidi o mfunu muna salu kia Yave ke dina kevanganga ko o muntu, kansi luzolo lwa ntima luna kesonganga o muntu muna salu kiaki. Konso ndiona ovewa elau dia vwa moyo a mvu ya mvu, ovwa wo ke mu kuma kia mavangu mandi ko, kansi mu kuma kia lukwikilu lwandi kwa Nzambi ye nsambu za Nzambi kaka.—Luka 17:10; Yoane 3:16.
2, 3. O Paulu mu nki kayisanina, ekuma?
2 Paulu wa ntumwa watoma zaya e ziku kia diambu diadi. Vava kadodokela Nzambi nkumbu ntatu kankatula “lusende muna nitu,” Yave wamvutula vo: “E nsambu zame zifwene kwa ngeye: kadi nkum’ame uzikukila muna lutovoko.” Paulu kuna lulembamu lwawonso watonda nzengo za Yave yo vova vo: “Kuna kiese kikilu, nluta sanina lusanu lua tutovoko twame, o nkum’a Kristu wangitalelela.” Lulembamu lwa Paulu i tufwete tanginina.—2 Korinto 12:7-9.
3 Kana una vo Paulu wasalanga kwayingi muna salu kia Nzambi, wazayanga wo vo kavangilanga wo mu ngangu za yandi kibeni ko. Wavova ye lulembamu lwawonso vo: “Oku kwa mono, wa nsakil’aveledi awonso, kwavewa nsambu zazi, za samunwin’azula e nsangu zambote za umvwama wa Kristu, owu ke usatakani.” (Efeso 3:8) Ke vena lusanu ko ngatu lulendo muna mvovo miandi. “O Nzambi osiang’akwa lulendo kitantu, vo i alembami, okubavanang’e nsambu.” (Yakobo 4:6; 1 Petelo 5:5) Nga tutangininanga mbandu ya Paulu mu kuyibadikila vo twa nsakila yovo tulutidi mpangi zeto z’Akristu o keva?
‘Badikanga vo Akaka Basundidi’
4. Ekuma ezak’e ntangwa dikadilanga diampasi mu badikila akaka vo batusundidi?
4 Paulu wa ntumwa wavovesa Akristu vo: “Ke nuvangila diambu mu nswangani ko, ngatu owu wa kumvalala, kansi muna lusakalalu lua ntima, konso muntu okubadika vo nkw’andi umviokele.” (Filipi 2:3) Dilenda kala diampasi mu vanga wo mu sungula avo tuna ye kiyekwa kiampwena. E fu kia nza mpe kia vava sunda akaka nanga kilenda kutuvukumuna. Dilenda kala vo twalongwa tuka kileke e fu kia vavang’o sunda akaka kana vana vena ampangi zeto muna nzo yovo akundi a sikola. Nanga twafilakeswanga mu vava etunda, kala ate a somba yovo nlongoki osundidi kuna sikola. Kieleka, tufwete sianga ngolo muna mawonso tuvanganga, kansi, Akristu bevanganga wo ke mu kuyisonga ko, kansi mu bak’e nluta muna salu besalanga yo twasa mpe ndandu kw’akaka. Ovav’o kala wantete muna mawonso dilenda kala diavonza. Mu nkia mpila?
5. Avo oyambwidi kuyifimpa, e fu kia vava sunda akaka mu nkia vonza kilenda fila muntu?
5 Avo oyambwidi kuyifimpa, e fu kia vava sunda akaka yovo vwa oma ma ngeye kibeni o mfunu kilenda kukitula se nkwa lulendo yo lembi zitisa akaka. Kilenda kufila mpe mu veza e ngangu ye malau ma salu ki’akaka. Muna Ngana 28:22 tutanganga vo: ‘O nkwa disu diambi [yovo nkwa kimpala] osutila vwama, kazeye wo ko vo usukami ukunluakila.’ Olenda nkutu kuyisia va fulu ke kimfwanukini ko. Muna veng’o tumbwa nanga oyidimina ye kumba akaka—fu kina kafwete venga o Nkristu. (Yakobo 3:14-16) Avo muntu olweke mu tezo kiaki olenda bwa mu vonza kia vava kala wantete muna mawonso.
6. O Nkand’a Nzambi aweyi ulukisilanga mu kuma kia fu kia vava sunda akaka?
6 Ikuma Nkand’a Nzambi ulukisanga Akristu vo: “Ke tukumvalala ko, ovo fiengenesaziana, ngatu vwavwana nsita za kimpala.” (Ngalatia 5:26) O Yoane wa ntumwa wavova mu kuma kia Akristu akaka babwa mu fu kiaki vo: ‘Yasoneka kuna kwa dibundu: kansi Dioterefe, on’ozolele kak’e kimbuta, kekututambula ko. Dianu vo, ovo ngizidi, nsusula mavangu mandi kevanganga, okutukumbang’e nkumb’ambi.’ Nkia mpila nkenda kwa Nkristu mu bwa muna fu kiaki.—3 Yoane 9, 10.
7. Nkia diambu kafwete venga o Nkristu muna fu kia vava sunda akaka kuna salu?
7 Dialudi vo, ke diansongi ko dia yindula vo o Nkristu olenda venga e mpila zawonso za vav’o sunda akaka. Kasikil’owu, e salu kiandi kuna kompani nanga kivavanga vo kasundanga akaka, kele vo nteki nanga kafwete vava sunda akaka mu leba asumbi yo sanisina kinkita kiandi. Kansi, kana nkutu mu mambu nze mama, o Nkristu kafwete sadila e salu kiandi kuna zitu, zola yo vwa akaka o mfunu. Kafwete venga mavangu ke ma Kikristu ko ye fu kia vava kala wantete muna mawonso. Ke yindula ko vo kala wantete muna mawonso i diambu disundidi o mfunu muna zingu. Wau vo Nkristu kafwete venga e fu kiaki mu mambu ma kinitu, aweyi tuvova mu mambu ma mwanda?
‘Kuyitezanisi ye Muntu Akaka Ko’
8, 9. (a) Ekuma akuluntu Akristu ke bekuyitezanisanga ye akaka ko? (b) E sono kia 1 Petelo 4:10 aweyi kifwete sadilwa kwa selo yawonso ya Nzambi?
8 E fu bafwete songa Akristu muna salu kiau kwa Nzambi i kina kiyikwanga muna mvovo emi: “Konso muntu, mbula katont’ekiandi salu, ozevo, o lusanu kekala luau, lua yandi kibeni kaka, ke lua muntu akaka ko.” (Ngalatia 6:4) Akuluntu kuna nkutakani wau bazeye wo vo ke besalanga mu sunda muntu yo nkw’andi ko, besalang’e ntwadi kuna ungudi nze to kimosi. Beyangalelanga e salu kesalanga konso mpangi muna wete dia nkutakani. Muna mpila yayi bevenganga e fu kiaki kiambi yo songa mbandu ambote ya ngwizani muna nkutakani.
9 Mu kuma kia nswaswani muna mvu, ngangu ye umbakuzi, vena ye akuluntu basundidi akaka. Ekiaki i kuma akuluntu muna nkubik’a Yave benena ye kiyekwa kia mpila mu mpila. Vana fulu kia kuyitezanisa ye akaka besungamenanga luludiku olu: “Konso muntu, muna una katambula lukau, nusadilanga lo vovo nwina, nze selo yambote ya nsambu za Nzambi za mpila mu mpila.” (1 Petelo 4:10) Kieleka, e sono kiaki ke ki’akuluntu kaka ko kansi kia selo yawonso ya Yave, kadi yau awonso batambula lukau lwa zayi wa ludi ye awonso bena y’elau dia sala salu kia umbangi.
10. E salu kieto kiavauka mu nkia mpila kaka kilenda tondelwa kwa Yave?
10 Salu kiavauka eki tusalanga kiyangidika Yave kele vo kisadilu kaka kuna zola, ke mu vava kuyisonga ko vana vena akaka. Ozevo, diamfunu twakala ye nyindu asikila muna salu kieto mu kuma kia nsambila aludi. Kana una vo ke vena muntu ko olenda zaya oma mena muna ntima nkw’andi, o Yave ‘omikang’o ntima.’ (Ngana 24:12; 1 Samuele 16:7) Muna kuma kiaki, tufwete kiyuvulanga, ‘Mu nkia kani nsadilanga salu kia Nzambi?’—Nkunga 24:3, 4; Matai 5:8.
Tukala ye Nyindu Asikila Muna Mavangu Meto ma Lukwikilu
11. Nkia yuvu tulenda badika mu kuma kia salu kieto kia umbangi?
11 Avo luzolo lwa sadila Nzambi i lusundidi o mfunu muna tondwa kwa Yave, yamu nkia tezo tufwete tokanenanga mavangu meto ma lukwikilu? Ekolo tusilanga umbangi y’ekani diasikila, nga diamfunu kikilu twasonekanga e salu tusalanga yovo lutangu lwa ola tusalanga? E yuvu yayi yamfunu, wau vo ke tuzolele songa ko vo ulolo wa salu kia mwanda yovo ola tusalanga i diambu disundidi o mfunu muna salu kieto kia Kikristu.
12, 13. (a) Ekuma tuzaisilanga e nsangu za salu kieto kia umbangi? (b) Nkia kuma tufwete yangalelang’o wá nsangu za salu kia umbangi kia nz’amvimba?
12 Tala una uvovanga nkanda Organizado Para Fazer a Vontade de Jeová: “Alongoki a Yesu Kristu kuna nz’ankulu basamunang’e nsangu za salu kia umbangi. (Maku 6:30) Nkand’a Mavangu uvovanga vo vakala tezo kia 120 ma wantu vava Yesu kapongola mwand’avelela kw’alongoki andi kina kia Pentikosti. Ke kolo ko o lutangu lw’alongoki lulungidi tezo kia 3.000 i bosi 5.000. . . . (Mavangu 1:15; 2:5-11, 41, 47; 4:4; 6:7) E nsangu za wokela kwa salu zakasakesa kikilu alongoki.” Muna kuma kiaki, Mbangi za Yave besianga ngolo za soneka nsangu za salu kisalwanga mu nz’amvimba muna ndungan’a mvovo mia Yesu vo: “E nsangu zazi zambote za kintinu zisamunwa muna nza yawonso, muna umbangi kwa zula yawonso; i bosi iluak’e mbaninu.” (Matai 24:14) E nsangu zazi zisonganga mpila kidiatilanga e salu kia Nzambi mu nza. Zisonganga e zunga kina yo mfunu w’asadi ayingi ye nkia mpila nkanda ye lutangu lwa nkanda mivavwanga muna nungununa salu kia umbangi.
13 Ikuma vo, samuna nsangu za salu kieto kia umbangi dikutusadisanga mu samuna nsangu zambote za Kintinu una ufwene. Nga ke tukasakeswanga ko vava tuwanga nsangu za salu besalanga ampangi zeto muna fulu yakaka ova nza? Nsangu za wokela kwa salu zikutuyangidikanga, zikutufilanga mu wokesa salu kieto yo kutuvana lusikidisu vo Yave mu sambula kena e salu kiaki. Nga ke diakiese ko mu zaya vo e nsangu za salu kia yeto kibeni zikoteswanga muna nsangu za nz’amvimba? E nsangu za salu kieto zandwelo muna tezanisa ye lutangu lwa nsangu za nza yawonso, kansi ke zivilakanwanga ko kwa Yave. (Maku 12:42, 43) Sungamena dio vo avo kutwese e zaku nsangu za salu ko, o lutangu ke lukala lwalunga ko.
14. Vana ntandu a samun’e nsangu zambote yo longa, nkia mambu diaka tuvanganga muna nsambil’eto ya Yave?
14 Dialudi vo mayingi kevanganga konso Mbangi a Yave muna lungisa e mbebe andi nze selo kia Yave wakiyekola ke mesonamanga ko muna nsangu zazi. Kasikil’owu, muna nsangu zazi ke mukoteswanga ko lutangu lw’elongi dia ngeye kibeni dia Nkand’a Nzambi, lungana ye mvutu ovananga muna tukutakanu twa Akristu, kiyekwa muna nkutakani, lusadisu luvewanga kwa ampangi za mwanda, nzimbu zikubwanga mu nungununa salu kia Kintinu muna nz’amvimba ye makaka mpe. Kana una vo o samuna nsangu zeto za umbangi zikutusadisanga mu kwamanana yo vema mu salu kia umbangi, tufwete kalanga ye nyindu asikila mu kuma kia salu kiaki. Ka tufwete yindulanga ko vo e salu tusalanga kina nze tike yovo pasaporte ya mwanda, kilenda kutufwanisa mu vwa moyo a mvu ya mvu.
“Akw’etima dia Mavangu Mambote”
15. Kana una vo mavangu mankatu ke malendi kutuvuluza ko, ekuma menena o mfunu?
15 Kana una vo mavangu mankatu ke malendi kutuvuluza ko, mfunu mena. Ekiaki i kuma Akristu beyikilwanga vo “akw’etima dia mavangu mambote.” (Tito 2:14; Ayibere 10:24) O Yakobo wa nsoneki akaka wa Nkand’a Nzambi wavova vo: “Konso un’e to kiakondwa mwanda, kiafwa, i un’o lukwikilu luakondwa mavangu, luafwa.”—Yakobo 2:26.
16. Nkia diambu disundidi mavangu o mfunu, kansi nkia diambu tufwete sungamena?
16 Kana una vo mavangu mambote mfunu mena, etima tusonganga mpe mu vanga mo i diambu disundidi o mfunu. Muna kuma kiaki, diambote twafimpanga ntangwa ke ntangwa etima dieto dia sadila Nzambi. Wau vo ke vena muntu ko olenda zaya ekani dia nkw’andi, ka tufwete fundisanga akaka ko. “Onge u nani ofundisanga selo kiangani?” u tuyuvulwanga, e mvutu i zazi: “Kuna kwa yandi mfumu i ketelamena, ovo bwa.” (Roma 14:4) Yave wa Mfumu a wantu awonso ye Yesu Kristu wa Mfundisi kasola okutufundisa ke mu mavangu meto kaka ko, kansi y’ekani tukunsadilanga, mpila tukunzolelanga yo kunsambila. Yave kaka yo Yesu Kristu balenda kutufundisa mu mpila yifwene kana vo twavanga mana tuvoveswanga mu vanga, muna mvovo mia Paulu wa ntumwa vo: “Sia ko e sungididi, o kusonga kwa Nzambi, wafwana, u nsadi wakondw’e nsoni otoma sansang’e diambu dia ludi.”—2 Timoteo 2:15; 2 Petelo 1:10; 3:14.
17. Ekolo tusianga ngolo mu vanga mana tulenda ekuma tufwete sungamenanga mvovo mina muna Yakobo 3:17?
17 Yave kevavanga mana katulendi vanga ko. Muna Yakobo 3:17, tutanganga vo: “Ngangu zina vo za ntandu,” za “unleka.” Nga ke diangangu ko muna tanginina unleka wa Yave mu mana tuvanganga? Ikuma vo, katuvavi mambu mana yeto kibeni y’ampangi zeto ke balendi vanga ko.
18. Avo tukala ye nyindu asikila mu kuma kia mavangu meto ma lukwikilu ye nsambu za Yave adieyi tuvanga?
18 Avo tukala ye nyindu asikila mu kuma kia mavangu meto ma lukwikilu ye nsambu za Yave, tukala ye kiese kina vo i sinsu kiswaswanisanga asadi a Yave. (Yesaya 65:13, 14) Tulenda yangalela e mpila kekutusambulwilanga o Yave ye mana kelendang’o vanga konso muntu. Tukwamanana muna “sambu yo ludodokelo yo matondo,” kimana Nzambi katusadisa muna mavangu meto ma lukwikilu. Ka lukatikisu ko, “o luvuvamu lua Nzambi, luna luviokele nyindu wawonso, luyingila ntima [mieto], yo makani [meto] muna Kristu Yesu.” (Filipi 4:4-7) Elo, tufiaulwisu yo kasakeswa mu zaya vo tuvuluzwa, ke mu mavangu kaka ko, kansi muna nsambu za Yave.
Nga Olenda Sasila Ekuma Akristu
• bafwete vengela sanisina mavangu mau?
• bafwete vengela e fu kia vava sunda akaka?
• bafwete samunwinanga nsangu za salu kiau kia umbangi?
• bafwete yambula fundisa akw’au Akristu?
[Mvovo mia Fwaniswa mina muna lukaya lwa 27]
Akuluntu beyangalelanga salu kesalanga konso mpangi muna wete dia nkutakani