LONGI DIA 37
E Bibila Adieyi Kivovanga mu Kuma kia Salu ye Nzimbu?
Nga watokana kala mu kuma kia kondwa salu yovo nzimbu? Dilenda kala diampasi mu vua nzimbu mu lungisa nsatu zeto yo sambila Yave una ufwene. Kansi, Bibila kikutuvananga malongi mambote malenda kutusadisa.
1. E Bibila adieyi kivovanga mu kuma kia salu?
Nzambi ozolele vo twakala ye kiese muna salu yeto. Bibila kivovanga vo: ‘Ke vena diambu disundidi wete ko kwa muntu avo ke . . . mona e kiese ko muna salu kiandi kiangolo.’ (Kimpovi 2:24) Yave osalanga kwayingi. Avo tutanginini Yave muna salanga ye fululu kiawonso, tukunyangidika ye tukala ye kiese.
E salu mfunu kina. Kansi, ke tufwete yambulanga ko vo e salu kiasunda o mfunu lutila sambila Yave. (Yoane 6:27) Yave osianga e nsilu vo avo tusidi luzolo lwandi va fulu kiantete, okutuvana ina tuvuidi o mfunu muna zinga.
2. Adieyi Bibila kivovanga mu kuma kia nzimbu?
Bibila kivovanga vo: “Nzimbu zitaninanga.” (Kimpovi 7:12) Kansi, kivovanga mpe vo e nzimbu ke zau kaka ko zitwasanga e kiese. Ekiaki i kuma Bibila kikutuvoveselanga vo twalembi zola e nzimbu, kansi ‘twayangalelanga ina tuna yau.’ (Tanga Ayibere 13:5.) Avo tuyangalele ina tuna yau, tuvenga ntokani za yindula vo ina tuna yau ike. Tuvenga mpe fu kia kuyikotesa mu mfuka kondwa kuma. (Ngana 22:7) Kuna diak’e sambu, tuvenga vonza kia kuyisia mu nsaka za jogatina yovo vava ndekwa zambi mu vuama mu nzaki.
3. Aweyi tulenda sadila nzimbu mu sadisa akaka?
Yave wa Nzambi una ye fu kia kaya, oyeto tukuntanginina avo ‘tukedi avani a mvevo yo kayila akaka.’ (1 Timoteo 6:18) Tulenda wo vanga muna yikamanga e nkutakani yo sadisa awana bavuidi lusadisu o mfunu, musungula mpangi zeto. Edi disundidi o mfunu kwa Yave i luzolo lukutufilanga mu vana, ke kina tuvananga ko. Avo tukayidi akaka ye nsi a ntima wawonso, tukala ye kiese yo yangidika Yave.—Tanga Mavangu 20:35.
ZAYA DIAKA MANKAKA
Tala o mfunu wa kala ye ngindu zasikila mu kuma kia salu yo yangalelanga ina tuna yau.
4. Zitisanga Yave muna mpila osadilanga salu kiaku
E kikundi kieto yo Yave kilenda kutufila mu kala yo nyindu asikila mu kuma kia salu. Tala e VIDEO, i bosi, vana e mvutu za yuvu ilende.
Nze una omwene muna video, nkia diambu disivikisi muna mpila o Jason kakadilanga kuna salu?
Adieyi kavanga mu sia e salu vana fulu kifwanukini?
Tanga Kolosai 3:23, 24, i bosi, vana e mvutu za kiuvu eki:
E mpila tubadikilanga e salu, ekuma inina o mfunu?
E salu mfunu kina. Kansi, ke tufwete yambulanga ko vo e salu kiasunda o mfunu lutila sambila Yave
5. O yangalela ina tuna yau kiese ditwasanga
Wantu ayingi bevavanga kala ye nzimbu zayingi. Kansi, e Bibila kikutulukisanga muna diambu diadi. Tanga 1 Timoteo 6:6-8, i bosi, vana e mvutu za kiuvu eki:
Adieyi Bibila kikutuvovesanga twavanga?
Kana nkutu vo ke tuna ye mavua mayingi ko, tulenda kala ye kiese. Tala e VIDEO, i bosi, vana e mvutu za kiuvu kilende.
Kanele vo esi nzo awaya ke bakala ye nzimbu zayingi ko, nki kiabasadisa mu kala ye kiese?
Adieyi tuvova avo nzimbu zayingi tuna zau, kansi tukwamanananga kaka zo vava? Yesu wata kingana kisonganga vo e fu kiaki kia vonza kikilu. Tanga Luka 12:15-21, i bosi, vana e mvutu za kiuvu eki:
Nkia diambu olongokele muna kingana kia Yesu?—Tala e tini kia 15.
Tanga yo tezanesa Ngana 10:22 ye 1 Timoteo 6:10. I bosi, vana e mvutu za yuvu eyi:
Nkia diambu obenze disundidi o mfunu, kala nkundi a Yave yovo kala ye nzimbu zayingi? Ekuma ovovele wo?
E fu kiavava kala ye nzimbu zayingi, nkia vonza kilenda twasa?
6. Yave olungisa e nsatu zeto
O tokana kwayingi mu kuma kia salu ye nzimbu, dilenda tonta e vuvu kieto muna Yave. Tala e VIDEO ilende muna zaya dina tulenda vanga vava tukalanga ye ntokani zasaka mu kuma kia kondwa salu yovo nzimbu. I bosi, vana e mvutu za yuvu ilende.
Nze una omwene muna video, o mpangi nkia mambu mampasi kanuananga mau?
Nkia diambu kavanga mu zizidila e mambu momo mampasi?
Tanga Matai 6:25-34, i bosi, vana e mvutu za kiuvu eki:
Yave nkia nsilu kesianga kwa awana besianga salu kiandi va fulu kiantete muna zingu kiau?
AVO MUNTU UVOVESE VO: “Mfwete sala kwayingi mu lunga-lunga esi nzo ame. Muna kuma kiaki, kilendi kwenda mu tukutakanu ko tumingu twawonso.”
Nkia sono kikukwikidisanga vo o sia e nsambil’a Yave va fulu kiantete i nzengo zisundidi o mfunu?
MAMBU MASINA MA LONGI DIADI
E salu ye nzimbu mfunu zina, kansi e lekwa yayi ke ifwete vunzanesa salu kieto ko tusadilanga Yave.
Nkia Mambu Olongokele?
Nkia diambu dilenda kusadisa mu kala yo nyindu asikila mu kuma kia salu?
O yangalela ina una yau, nkia nluta dilenda kutwasila?
Aweyi olenda songela vo obundanga e vuvu muna nsilu a Yave walungisa e nsatu za nkangu andi?
TALA MPE OMA MALENDE
Nga Bibila kivovanga vo o kala ye nzimbu diambu diambi?
“Nga e Nzimbu i Tuku dia Mambu Mawonso Mambi?” (Longi dina muna jw.org)
Tala una tulenda sadila e nzimbu zeto mu yangidika Nzambi.
“Adieyi Bibila Kivovanga mu Kuma kia Fu kia Kaya?” (Longi dina muna jw.org)
Nga e jogatina nsaka kwandi kaka?
Tala diambu diafila muntu mosi mu yambula e jogatina yo wivi.
“Eu era Apaixonado por Corridas de Cavalo” (Eyingidilu dia 1 dia Novemba, 2011)