Mbaninu a nza nga Diambu Diakiese, Diankenda Yovo Dia Wonga?

Aweyi obadikilanga e lumbu kia 21 kia ngonde Desemba, 2012 kiyikwanga muna manaka ma Maya? Ndonga bevovanga vo i lumbu kina kifwaswa e nza. Nanga e lumbu kiaki kilenda kumwesa kiese, nkenda yovo wonga. Nga e kiaki i lumbu kikilu kifwaswa e nza yayi e?

Adieyi tuvova mu kuma kia ‘mbaninu a nza’ iyikwanga muna Nkand’a Nzambi? (Matai 24:3) Akaka bemonanga wonga kadi beyindulanga vo e nza yayi yokwa iyokwa. Kwa akaka, e lumbu kiaki kiakiese, kadi bevingilanga o mona dina divangama. Akaka bedimbulanga e vuvu kiau kadi, tuka kolo bevoveswanga vo e mbaninu ifinamene. Nga mambu mama mawonso maludi yovo maluvunu?

Nanga olenda sivika mu zaya dina kieleka kelonganga Nkand’a Nzambi mu kuma kia mbaninu a nza. Nkand’a Nzambi ke ukutuwondelelanga kaka ko mu vingila e lumbu kia mbaninu, kansi uyikanga mpe vo akaka bebadika vo e mbaninu mu zingila ina yo lembi zizidila. Tulombele vo wabadika e mvutu za Nkand’a Nzambi mu kuma kia yuvu yakaka iyuvulwanga mu kuma kia mbaninu a nza.

Nga e nza yokwa iyokwa?

MVUTU ZA NKAND’A NZAMBI: “[Nzambi] wakuba nkubilwa mia nza, ke yanikunwa yakwele mvu.”—NKUNGA 104:5.

E nza ke ifwaswa ko, kiakala mu tiya yovo mu lekwa yakaka. Nkand’a Nzambi ulonganga vo e nza i fulu kavana Nzambi kwa wantu kimana bazingila vo yakwele mvu. Muna Nkunga 37:29, tutanganga vo: “Asongi bevwa nza, besikila vo yakwele mvu.”—Nkunga 115:16; Yesaya 45:18.

Vava Nzambi kavanga ntoto, wamona vo ‘yawonso kavanga, yambote kikilu,’ i wau kemonanga yamu wau. (Etuku 1:31) Vana fulu kia kala y’ekani dia fwasa e nza, Nzambi osianga nsilu vo ‘ofwasa, awana befwasanga e nza’ ye otanina yo kimana yalembi fwaswa.—Lusengomono 11:18.

Nanga olenda yindula vo e nza yokwa iyokwa kadi muna 2 Petelo 3:7 tutanganga: “Vo i’zulu dina wau, yo ntoto, muna diambu diau adimosi, dialundilw’o tiya.” Nga sono kiaki ke kisonganga ko vo e nza yokwa iyokwa? Dialudi, ezak’e ntangwa Nkand’a Nzambi usadilanga mvovo “ezulu,” “ntoto” ye “tiya” muna tezanesa yovo sasila mambu makaka. Muna bong’e nona, muna Etuku 11:1 tutanganga vo: “E nza yawonso ndinga mosi ye mpova mosi yakala.” E mvovo “e nza” uyikwanga ovava, wantu usongele.

E mvovo ezulu, nza ye tiya miyikwanga muna 2 Petelo 3:7, lekwa yakaka misunzulanga. E tini kia 5 ye 6 ngwizani yina ye Kizalu muna lumbu ya Noa. Muna ntangwa yayina, e nz’ankulu yafwaswa, kansi o ntoto ke wavila ko. Ozevo, e Kizalu kia lumbu ya Noa, kiafwasa e “nza,” i sia vo wantu a mbi. Kiafwasa mpe “ezulu,” i sia vo, ana bayalanga akaka. (Etuku 6:11) Diau adimosi, e sono kia 2 Petelo 3:7, lufwasu lwakwele mvu lwa wantu ambi kiyikanga kumosi ye ayadi au nze yau bebomonwa muna tiya.

Adieyi dibwa kuna mbaninu a nza?

MVUTU ZA NKAND’A NZAMBI: “E nza mpe vempoka ivempoka, y’eketo diandi: vo i ndion’ovangang’o luzolo lua Nzambi, zing’aka kezinganga yakwele mvu.”—1 YOANE 2:17.

E “nza” ivempoka ke ntoto ko, kansi wantu ana ke bezingilanga ngwizani ye luzolo lwa Nzambi ko. Nze una dotolo ke pasulwilanga muntu una ye kimbevo kia cancêr muna katula mikolobi mia kimbevo kiaki kimana kavuluza moyo andi, Nzambi osinga katula yovo ‘fwasa’ wantu ambi kimana wantu ambote bazinga ye kiese ova ntoto. (Nkunga 37:9) Muna kuma kiaki, e ‘mbaninu a nza’ diambu diambote kikilu.

Muna sono yakaka ya Nkand’a Nzambi o mvovo ‘mbaninu a nza’ usekolwanga nze “mbaninu a tandu.” (Matai 24:3) Wau vo ntoto ye wantu bevuluka muna lufwasu lwa nza, nga diadi disonganga vo e nz’ampa yovo tandu kiampa kiyantika? Elo, kadi Nkand’a Nzambi uvovelanga “tandu kikwiza.”—Luka 18:30.

Yesu wayikila e kolo kiakina kikwiza vo “luwutuluku.” Muna ntangwa yayina, Yesu ovutula moyo alunga kwa wantu nze una kakana o Nzambi kuna lubantiku. (Matai 19:28) Tuzingila mu

Avo “luzolo lwa Nzambi” tuvanganga ke tukala ye wonga wa lumbu kia mbaninu a nza ko, kansi tulakukila kio e moyo.

ga mbaninu a nza ifinamene kikilu?

MVUTU ZA NKAND’A NZAMBI: “Ovo numwene mambu mama mavangamene, nuzaya wo vo e kintinu kia Nzambi kifinamene.”—LUKA 21:31.

Muna nkanda, The Last Days Are Here Again, o Nlongi Richard Kyle wasoneka vo “e nsobani za kinsalukisa ye mavwanga mu nza mefilanga wantu mu sakula mambu mu kuma kia mbaninu a nza,” musungula vava wantu ke belendanga sasila etuku dia nsobani ye mavwanga mama ko.

Kansi, angunza ana basakula mambu mu kuma kia mbaninu a nza, ke basasila mambu mambi mabwanga muna lumbu yau ko. Kansi, bavumunwinwa kwa Nzambi mu sakula mambu mesonganga vo tufinamene ku mbaninu a nza. Badika ungunza wakaka kimana wazaya kana vo ulungananga muna lumbu yeto.

Wau vo tumonanga “mambu mama mawonso,” nze una Yesu kavova, yambula twazaya vo mbaninu a nza yayi ifinamene. (Matai 24:33) Mbangi za Yave bekwikilanga e ziku kia mambu mama yo samuna oma ma lukwikilu lwau kwa akaka mu nsi 236.

Nga tusansu twaluvunu mu kuma kia mbaninu, tusonganga vo e mbaninu ke ikwiza ko?

MVUTU ZA NKAND’A NZAMBI: “Una se bevovanga vo: Ngemba yo luvuvamu, o lubukumuku luakinsunzumukina lubaluàkidi, nze nsongo mia nkento owuta; yau ke batini.”—1 TESALONIKA 5:3.

Nkand’a Nzambi utezanesanga lufwasu lwa nza yayi nze nsongo mia nkento owuta kadi mu kinsalukisa mikwizilanga yo lembi vengwa. Mambu mevangamanga vitila lumbu kia mbaninu metezaneswanga ye nkento wayimita, kadi konso mpasi za nsongo zikumfilanga mu tokanena e lumbu kewuta. O dotolo olenda sikidisa e lumbu kewuta, kansi kana nkutu vo e lumbu kiaki kizingidi, o nkento okalanga ye vuvu vo mwan’andi ke kolo ko osinga wutuka. Diau adimosi mpe, o tusansu twaluvunu mu kuma kia mbaninu, ke tulendi soba e ziku kia sinsu kia “lumbu yambaninu” ko.—2 Timoteo 3:1.

‘Avo ziku kia lumbu ya mbaninu mu moneka kina,’ nanga olenda kiyuvula: ‘Ekuma akaka bekatikisilanga e ziku kiaki?’ O Nkand’a Nzambi uvovanga vo ekolo mbaninu ifinamanga ndonga beveza e ziku kiaki. Vana fulu kia zaya nsobani za mambu mu lumbu yayi yambaninu, bevova kuna lutiangu vo: “Tuka muna lumbu kiawondoka mase o tulu, lekwa yawonso ina una, tuka kuna lubantiku lu’esemo.” (2 Petelo 3:3, 4) Mu mvovo miakaka, e sinsu kia lumbu ya mbaninu kimonekanga, kansi wantu bevezanga e ziku kiaki.—Matai 24:38, 39.

Elongi diadi sono yakete kaka diyikidi eyi isonganga vo mbaninu ifinamene.a Nga ozolele zaya mayingi mu kuma kia diambu diadi? Ekuma olembi mokenena ye Mbangi za Yave yo tambula elongi dia ngovo dia Nkand’a Nzambi? Olenda kwaku longokela kuna nzo aku, ku fulu kiakaka kiambote osola yovo muna telefone. Diambu dimosi kaka ofwete vanga, vaula e ntangwa muna longoka. Avo ovangidi wo, nsambu zayingi otambula.