Yave Olonganga Avungudi Ekambi Diandi
“O Yave ovananga ngangu; muna nu’andi mutukanga zayi ye mbakula.”—NGANA 2:6.
1, 2. Ekuma ampangi zamakala ana bavubwa bevavilanga kala ye kiyekwa muna nkutakani?
“YATOMA yangalala kikilu vava yatumbikwa kikuluntu,” ukavova Nick, ona una nkuluntu se mvu nsambwadi. Wakudikila vo: “Mbadikilanga e kiyekwa kiaki nze elau diampwena dia wokesa e salu kiame kwa Yave. Yamonanga vo mfuka ngina yau kwa yandi mu kuma kia mawonso kekumpanganga. Yakala mpe yo luzolo lwa sadisa ampangi muna nkutakani, nze una akuluntu akaka bansadisila.” Kansi, kana una vo wayangalala, wonga mpe kakala wau. Nick wavova vo: “Wau vo kiayilungisila mvu 30 ko vava yatumbikwa kikuluntu, yabanzanga vo kina ye umbakuzi ye ngangu zafwana ko mu sadisa e nkutakani una ufwene.”
2 Awana kesolanga o Yave mu lunga-lunga ekambi diandi bavwidi kuma yayingi mu kala ye kiese. Paulu wa ntumwa wasungamesa akuluntu kuna Efeso, e kuma bafwete kadila ye kiese. Paulu wasadila mvovo mia Yesu vava kavova vo: ‘Edi diviokele e kiese, dia vana, ke mu tambula ko.’ (Mavangu 20:35) O kala selo kia salu yovo nkuluntu divananga elau kwa mpangi zamakala ana bavubwa dia kuyivana una ufwene muna salu kia Yave ye nkutakani. Kasikil’owu, aselo ya salu besalanga kumosi y’akuluntu. Selo yayi salu yayingi yamfunu besalanga, kana una vo idianga ntangwa yayingi. Zola Nzambi ye mpangi zau kufilanga ampangi zazi mu sala salu yayi yamfunu.—Maku 12:30, 31.
3. Ekuma akaka bekadilanga yo wonga wa kala ye kiyekwa muna nkutakani?
3 Adieyi tuvova kele vo mpangi ona wavubwa omonanga vo kafwana ko mu kala selo kia salu yovo nkuluntu? Nze Nick, nanga olenda banza vo kena ye ngangu zafwana ko, mu kala nkuluntu ambote. Nga u mosi mun’ampangi ana beyindulanga mpila yayi? E ngindu zazi ke zambi kwandi ko kadi, o Yave ofundisa avungudi muna mpila bekadilanga y’ekambi. Yesu wavova vo: “Konso ona wavew’eyingi, yingi kevavilwa: ona mpe wasiwa kiyekwa kiayingi, yakaka diaka bekumvinga.”—Luka 12:48.
4. O Yave aweyi kesadisilanga awana kesolanga mu lunga-lunga mameme mandi?
4 Nga Yave ovavanga vo awana kesolanga mu kala selo ya salu yovo akuluntu banata ezitu diadi yau kaka? Ve. O Yave ovananga lusadisu lwafwana lukubasadisanga mu nata ezitu diadi una ufwene. Nze una twalongokele mun’elongi diviokele, o Yave okubavananga mwand’avelela una ukubasadisanga mu lunga-lunga mameme muna zola kwawonso. (Mavangu 20:28; Ngalatia 5:22, 23) Vana ntandu, o Yave okubavananga ngangu, zayi yo umbakuzi. (Ngana 2:6) Aweyi kevangilanga wo? Yambula twabadika mpila tatu zina Yave kelongelanga awana kesolanga kimana balunga-lunga mameme mandi.
Belongwanga kwa Avungudi Azikuka
5. Ekuma Petelo yo Yoane bakadila avungudi ambote?
5 Vava Petelo yo Yoane bakala vana ndose a mbanda-banda, afundisi babadikila antumwa nze “wantu balembi longwa.” Petelo yo Yoane bazaya tanga yo soneka, kansi ke balongokela Nkand’a Nzambi mu sikola zampwena z’Ayuda ko. Kana una vo i wau, Petelo yo Yoane kumosi y’alongoki akaka, alongi afwana bakala yo fila ayingi ana babawanga mu kituka se akwikidi. Aweyi o wantu awaya balembi longwa bakitukila s’alongi afwana? Vava bawa Petelo yo Yoane, afundisi ‘babatona vo yo Yesu bakedinge yandi.’ (Mavangu 4:1-4, 13) Kieleka, mwand’avelela batambula. (Mavangu 1:8) Kansi, kana nkutu afundisi ana ke babakulanga mambu ma mwanda ko, bazaya wo vo Yesu walonga Petelo yo Yoane. Ekolo kakala yau ova ntoto, Yesu kalonga kaka antumwa ko una bafwete vavila awana bena nze mameme, kansi wabalonga mpe una bafwete kubalunga-lunga vava bekwiza muna nkutakani.—Matai 11:29; 20:24-28; 1 Petelo 5:4.
6. Yesu ye Paulu nkia mbandu basisa ya longa akaka?
6 O Yesu vava kafuluka, wakwamanana longa awana kasola mu kala se avungudi. (Lusengomono 1:1; 2:1–3:22) Kasikil’owu, wasola Paulu yo kunlonga. (Mavangu 22:6-10) Paulu wayangalela mana kalongwa yo longa mo kw’akuluntu akaka. (Mavangu 20:17-35) Kasikil’owu, wasadila ntangwa ye ngolo zandi mu longa Timoteo kakala “nsadi wakondw’e nsoni” muna salu kia Nzambi. (2 Timoteo 2:15) Paulu yo Timoteo bakituka se akundi ambote. Entete, Paulu wasoneka mu kuma kia Timoteo vo: ‘Nze mwana yo s’andi, i kasadìdi yame muna lunungununu lua nsangu zambote.’ (Filipi 2:22) Paulu kavavanga kitula Timoteo yovo muntu akaka nlongoki andi ko. Kansi, wakasakesanga minkwikizi y’akw’andi mu ‘kuntanginina, waun’oyandi katangininanga Kristu.’—1 Korinto 11:1.
7, 8. (a) Nkia nona kisonganga e nluta miambote ditwasanga vava akuluntu betangininanga e mbandu a Yesu ye Paulu? (b) Akuluntu nkia ntangwa bafwete yantika longa ana balenda solwa se selo ya salu yovo akuluntu?
7 Muna tanginina Yesu yo Paulu, avungudi azikuka bekuyivananga mu longa ampangi zamakala ana bavubwa. Ediadi nluta miambote ditwasanga. Badika e nona kia Chad. Mu nzo yavambana mu nsambila kasansukila. Kansi, ke kolo ko watumbikwa kikuluntu. Wavova vo: “Akuluntu ayingi azikuka bansadisa mu ulolo wa mvu, mu nungunuka muna mwanda. Wau vo, o s’ame mundembi kwikila, akuluntu awaya bansonga kikilu o zola yo kituka se mase mame ma mwanda. Bavaulanga e ntangwa mu kundonga muna salu kia umbangi, i bosi, nkuluntu mosi wandonganga una mfwete lungisila e kiyekwa yavewa muna nkutakani.”
8 Nze una usonganga nona kia Chad, akuluntu akwa umbakuzi beyantikanga longa ampangi mu kuyifwanisa se selo ya salu yovo akuluntu. Ekuma dinina diamfunu? E kuma kadi o Nkand’a Nzambi ukanikinanga vo aselo ya salu ye akuluntu bayantika songa e fu ya nkal’ambote una ke baveno e kiyekwa kiaki ko. Bafwete ‘teka fimpwa kana vo bafwana.’—1 Timoteo 3:1-10.
9. Akuluntu azikuka nkia mbebe bena yau? Ekuma?
9 Wau divavanga vo ampangi ana bavubwa bateka fimpwa, diambote mpe bateka longwanga. Muna bong’e nona: Avo mwan’a sikola oyuvwilu kiuvu muna diambu din’o nlongi kanlonga ko, nga olenda van’e mvutu zasikila? Ve, kelenda ko. Muna kuma kiaki, o teka longa muntu mfunu kwina. Kansi, alongi ambote ke belonganga kaka wan’a sikola ko, mu van’e mvutu zasikila, kansi mu sadila mpe mana belongwanga. Diau adimosi, akuluntu ana besianga sungididi, besadisanga ampangi ana bavubwa mu yima e fu yivavwanga kwa ndiona ozolele kala selo kia salu yovo nkuluntu, muna teka kubalonga. Ke bevanganga wo ko kimana batumbwa kaka se selo ya salu yovo akuluntu, kansi mu kubasadisa mpe bakala bafwana mu lunga-lunga ekambi una ufwene. (2 Timoteo 2:2) Kieleka, ampangi ana bavubwa mpe bafwete sianga ngolo mu lungisa mana mevavwanga mu kala selo kia salu yovo nkuluntu. (Tito 1:5-9) Kana una vo i wau, akuluntu azikuka balenda kubasadisa banungunuka mu nzaki muna longanga yo zola kwawonso awana besianga ngolo za tambula kiyekwa muna nkutakani.
10, 11. Akuluntu aweyi balenda longela akaka muna tambula kiyekwa kiampwena?
10 Akuluntu azikuka aweyi balenda longela akaka mu kala ye kiyekwa muna nkutakani? Entete, akuluntu bafwete zolanga ampangi muna nkutakani. Bafwete salanga yau entwadi muna salu kia umbangi yo kubasadisa mu wokesa e ngangu za ‘toma sasilang’e diambu dia ludi.’ (2 Timoteo 2:15) Akuluntu azikuka besonganga kwa mpangi e kiese kalenda vwa o muntu muna sadila akaka ye nluta bebakanga muna siang’etima muna mambu ma mwanda. Belonganga mpe una o mpangi kalenda kadila se ‘mbandu y’ekambi.’—1 Petelo 5:3, 5.
11 Vava mpangi kekitukanga se selo kia salu, akuluntu bekwamanananga kunlonga. Bruce, una se nkuluntu se mvu 50, wavova vo: “Nzolanga fonga vamosi ye selo kiampa yo fimpa yandi tuludiku kevananga o ntaudi akwikizi yo lulungalalu. Tutanganga mpe konso luludiku mu kuma kia kiyekwa kavewa. Nzolanga sala yandi kumosi yavana ketoma bakula e kiyekwa kiandi.” Ekolo selo kia salu kenungunukanga, olenda mpe longwa muna salu kia kingula ampangi. Bruce wakudikila vo: “Vava nkwenda kingulanga ampangi kumosi yo selo kia salu, ikunsadisanga mu sola sono ya Nkand’a Nzambi ina tusadila mu kasakesa yo kumika mpangi yovo esi nzo ana tukingula. Muna kituka nkuluntu ambote, o selo kafwete longwa una kafwete sadila e sono ya Nkand’a Nzambi mu kasakesa ntima mia wantu.”—Ayibere 4:12; 5:14.
12. Akuluntu azikuka aweyi balenda longela akuluntu ampa?
12 Akuluntu ampa mpe bebak’e nluta miayingi vava belongwanga mambu makaka. Nick, ona tuyikidi kala, wavova vo: “Mana yalongwa kwa akuluntu wole ambuta, mansadisa kikilu. Ampangi awaya bazayanga una e mambu makaka mafwete singikilwa. Bakalanga yo luzindalalu lwa winikina vava yavovanga yo badika e ngindu yasonganga, kana nkutu vo ke batondele zo ko. Mayingi yalongoka muna mona o lembama yo luzitu basonganga muna mpila bakadilanga y’ampangi muna nkutakani. Akuluntu awaya bansonga o mfunu wa sadila e sono ya Nkand’a Nzambi una ufwene muna singika mambu yovo kasakesa akaka.”
Belongwanga kwa Nkand’a Nzambi
13. (a) O mpangi nki kevwanga o mfunu mu kala mvungudi ambote? (b) Ekuma Yesu kavovela vo: “elongi diame ke diame ko”?
13 Kieleka, o Nkand’a Nzambi uvwidi nsiku, nkanikinu ye mbandu zina o nkuluntu kevwanga o mfunu muna kala ‘watoma kubama muna salu yawonso yambote.’ (2 Timoteo 3:16, 17) O mpangi olenda kala yo zayi wa sikola zampwena katanga, kansi zayi wa Nkand’a Nzambi ye mpila kesadila wo ukunsadisa mu kituka mvungudi ambote. Badika e mbandu a Yesu. Kana una vo wakala yo zayi wayingi, yo umbakuzi yo kala mvungudi wasunda e ngangu za wantu awonso bakala ova ntoto; Yesu kabundanga vuvu mu ngangu za yandi kibeni ko vava kalonganga mameme ma Yave. Wavova vo: “Elongi diame ke diame ko, dia ndiona wantuma kaka.” Ekuma o Yesu kavanina o nkembo kwa S’andi ezulu? Wasasila vo: “On’okuvovela, ozolele o kukembesa.”—Yoane 7:16, 18.
14. Aweyi avungudi bevengelanga e fu kia vava nkembo wa yau kibeni?
14 Avungudi akwa kwikizi bevenganga e fu kia vava nkembo wa yau kibeni. Ke besadilanga ngangu za yau kibeni ko muna longa yovo kasakesa akaka, kansi besadilanga e Diambu dia Nzambi. Bebakulanga vo e kiyekwa kia nkuluntu i sadisa mameme mu kala yo “nyindu a Yesu,” ke nyindu mia akuluntu ko. (1 Korinto 2:14-16) Kasikil’owu, adieyi tuvova kele vo nkuluntu ona osadisanga yakala yo nkaz’andi mu sunda e mpasi za longo, ubasongele ngindu za yandi kibeni, ke mu nkanikinu mia Nkand’a Nzambi ko yovo nkanda mivaikisanga “ntaudi akwikizi yo lulungalalu”? (Matai 24:45) Elongi diandi dilenda filwa kwa fu ya kisi nsi yovo kwa zayi wandi wandwelo. Dialudi vo eyaka fu ya kisi nsi ke yambi kwandi ko, ye mpe o nkuluntu olenda zaya mayingi muna zingu. Kansi, mameme mebakanga nluta miambote vava avungudi bekubakasakesanga mu vava wá nding’a Yesu ye mvovo mia Yave vana fulu kia wá ngindu za wantu yovo nsiku mia kisi nsi.—Nkunga 12:6; Ngana 3:5, 6.
Belongwanga kwa “Ntaudi Akwikizi yo Lulungalalu”
15. Nkia salu kavana o Yesu kwa “ntaudi akwikizi yo lulungalalu”? Aweyi belendelanga sala e salu kiaki una ufwene?
15 Avungudi nze Petelo, Yoane yo Paulu bakala muna buka kina o Yesu kayikila vo “ntaudi akwikizi yo lulungalalu.” O ntaudi akwikizi yo lulungalalu i buka kia mpangi za Yesu bakuswa muna mwanda, bena ova ntoto ye vuvu kia yala yo Kristu kun’ezulu. (Lusengomono 5:9, 10) Mu lumbu yansuka ya tandu kiaki, e ntalu ya mpangi za Yesu mu kuluka kaka ina. Kansi, e salu bakanikinwa kwa Yesu kia samun’e nsangu zambote za Kintinu, ekolo mbaninu ke yalweke ko, mu wokela kaka kina ke mu tandu yakaka ko. Kana una vo i wau, o ntaudi akwikizi yo lulungalalu mulungisa kena e salu kiaki una ufwene. Ekuma? E kuma kadi olonganga mpangi za buka kia “mameme makaka” mu kubasadisa muna salu kia longa yo samun’e nsangu zambote. (Yoane 10:16; Matai 24:14; 25:40) Owau, e ndonga yisalanga e salu kiaki, mu buka kia mameme makaka bena.
16. O ntaudi akwikizi yo lulungalalu aweyi kelongelanga akengi?
16 O ntaudi akwikizi yo lulungalalu aweyi kelongelanga e mpangi zazi? Muna tandu kiantete, akunzi a ntaudi akwikizi yo lulungalalu bavewa o nswa wa longa yo sola akengi muna nkutakani. I bosi, awaya mpe balonganga ampangi muna nkutakani. (1 Korinto 4:17) Diau adimosi mpe divangamanga o unu. E Buka kia Selo Yambuta, kina vo i buka kia akuluntu akuswa ana besunzulanga ntaudi akwikizi yo lulungalalu, kifilanga ampangi mu longa yo sola selo ya salu ye akuluntu muna nkutakani zawonso omu nza yawonso. Vana ntandu, e Buka kia Selo Yambuta kikubikanga sikola mu longa afidi a Mavula, akengi a zunga, akuluntu ye selo ya salu una bafwete lunga-lunga mameme una ufwene. Tuludiku twakaka tuvewanga muna nkanda, muna malongi mevaikiswanga mun’Eyingidilu yo muna nkanda miakaka, nze nkanda Organizados Para Fazer a Vontade de Jeová.a
17. (a) O Yesu aweyi kebundilanga e vuvu muna ntaudi akwikizi yo lulungalalu? (b) Avungudi a mwanda aweyi balenda songela vo vuvu besianga muna ntaudi akwikizi yo lulungalalu?
17 Yesu obundanga ntaudi akwikizi e vuvu, i kuma kansila e kiyekwa kia “salanganu yandi yawonso,” i sia vo, vwa kwandi kwawonso kwa mwanda ova ntoto. (Matai 24:47) Akengi mpe besonganga vuvu kiau muna ntaudi akwikizi muna sadilanga luludiku bevewanga kwa Buka kia Selo Yambuta. Elo, vava avungudi belonganga akaka yo yambula vo yau mpe balongwa kwa Diambu dia Nzambi, yo sadila mana belongwanga kwa ntaudi akwikizi yo lulungalalu, besiamisanga kintwadi vana vena ekambi. Tuvutwidi matondo kwa Yave muna longanga akengi ana belunga-lunganga konso mpangi muna nkutakani y’Akristu.
[Mvovo Vana Yand’a lukaya]
a Wavaikiswa kwa Mbangi za Yave.
Nkia Mvutu Ovana?
• Avungudi a mwanda aweyi belongelanga akaka?
• Ekuma akuluntu ke bafwete longela ngindu za yau kibeni ko?
• Avungudi aweyi ye ekuma besilanga e vuvu muna ntaudi akwikizi yo lulungalalu?
[Mvovo mia Fwaniswa mina muna lukaya lwa 25]
Akuluntu Akristu belonganga aleke muna nkutakani
[Mvovo mia Fwaniswa mina muna lukaya lwa 26]
“O ntaudi akwikizi yo lulungalalu” ovananga malongi mayingi kwa akuluntu