‘WAKATULWA KIMANA KALEMBI MONA LUFWA’

E zingu kia Kanoke aweyi kiafokokela? O lufwa lwandi lwa mpimpita lutila nkutu zingu kiandi. Muna nkand’a Etuku tutanganga vo: ‘Kanoke wakwamanana kangala yo Nzambi aludi. I bosi kàkala diaka ko, kadi o Nzambi wambonga.’ (Etuku 5:24) Aweyi o Nzambi kabongela Kanoke? Paulu wa ntumwa wayiza sasila vo: “Muna lukwikilu, Kanoke i kakatulwilwa kimana kalembi mona lufwa, kasolokele ko e kuma kadi Nzambi wankatula; kadi una kakatwilu ko, watambula kimbangi vo Nzambi kayangidika.” (Ayibere 11:5) Ayeyi i nsas’a mvovo mia Paulu “kakatulwilwa kimana kalembi mona lufwa”? Muna nsekola zankaka za Nkand’a Nzambi mwasonama vo Nzambi wabonga Kanoke yo kunata kuna zulu. Ke dilendi vangama ko. Nkand’a Nzambi uvovanga vo Yesu Kristu i muntu antete wafutumunwa yo kwenda kuna zulu.—Yoane 3:13.

Ozevo, aweyi Kanoke “kakatulwilwa” kimana kalembi “mona lufwa”? Kuna ngemba zawonso Yave wakatula o moyo wa Kanoke ye wafwa. Kansi, Kanoke wateka tambula “kimbangi vo Nzambi kayangidika.” Aweyi diavangamena? Vitila kafwa, Kanoke wasongwa mona-meso kwa Nzambi, nanga wasongwa una ukala e paradiso ova ntoto. Kuna mfoko a mona-meso kiaki kiasonga e dienga dia Yave, Kanoke wafwa. Vava Paulu wa ntumwa kasoneka mu kuma kia Kanoke ye selo yankaka ya kwikizi akala ye akento, Paulu wavova vo: “Yau awonso muna lukwikilu bafwila.” (Ayibere 11:13) Nanga mbeni za Kanoke bavava e vimbu diandi, kansi ke “diamoneka ko,” kadi Yave wavidisa dio kimana o nkangu balembi dio sakanena yovo sadila dio muna nungununa e nsambila ya luvunu.b

Wau tuzeye e ngindu za Nkand’a Nzambi, yambula twateza yindula una wafokokela e zingu kia Kanoke. Yindula e diambu edi, kansi sungamena vo ke wau kikilu ko diavangamena. Kanoke otikunanga, e nitu andi iyoyele. Mbeni zandi zinlende kuna nima, bafungidi makasi mu kuma kia nsangu zandi za lufwasu. Kanoke omwene fulu kia swamina yo vundila, kansi ozeye wo vo ke vuluka ko vana moko ma mbeni zandi. Kanoke omwene lufwa lwandi muna meso. Wau kevundanga, osambidi kwa Nzambi andi. O ntim’andi uvuvamene. Nzambi oyantikidi kunsonga e mona-meso.

Se yindula o mambu kesongwanga, Kanoke omwene nza yaswaswana ye ina kazaya. Nza yambote-mbote nga mpatu a Edene, kansi ke muna akerubi ko beyingilanga yo kimana wantu balembi mo kota. Omwene mo wantu ayingi, akala ye akento, bena yo vimpi wambote yo nkuma. Bezinganga mu luvuvamu. Ke muna lumengo ko yo lubangamu luna Kanoke kenwananga lwau. Kanoke omwene lutaninu lwa Yave, zola kwandi ye dienga diandi. Okwikidi vo e fulu kiaki i kiau kalakukilanga o moyo; i kiau kazolele zingila. Wau kamwene luvuvamu lwa ntima, Kanoke okangidi meso mandi, olele wosola kia tulu, kasikamene diaka ko.

Yamu unu kiaki Kanoke waleka tulu twa lufwa, kansi dia kiese mu zaya vo Kanoke una muna nyindu a Yave wa Nzambi. Yesu wasia nsilu vo vena ye lumbu kina awonso bena muna nyindu a Nzambi bewá nding’a Kristu yo vaika muna ziami, betemona meso mau yo mona e nz’ampa yambote yo luvuvamu.—Yoane 5:28, 29.