FINAMA NZAMBI
‘Nsendi W’awana Bekuntombanga’
Nga Yave ovwanga mfunu mu mana bevanganga asambidi andi muna kunsadila? Akaka bevovanga vo Nzambi ke kutuvwanga mfunu ko. Ediadi difilanga wantu mu kala ye ngindu zabendomoka mu kuma kia Nzambi. Kansi, o Nkand’a Nzambi una vo i Diambu dia Nzambi, ukiesesanga e diambu diadi. Ukutuzayisanga vo Yave oyangalelanga e ngolo bevanganga asambidi andi akwikizi. Badika mvovo mia Paulu wa ntumwa muna Ayibere 11:6.
Adieyi tufwete vanga muna yangidika Yave? Paulu wavova vo: “Ovo vakondelo lukwikilu, ke dilendakana ko, edi dia kunyangidika [Nzambi].” Paulu kavova ko vo diampasi mu yangidika Nzambi kondwa kwa lukwikilu. Kansi, wasonga vo kondwa kwa lukwikilu ke tulendi yangidika Nzambi ko. Ediadi disongele vo lukwikilu i diambu diamfunu muna yangidika Nzambi.
Nkia mpila lukwikilu luyangidikanga Yave? Muna songa lukwikilu muna Nzambi tufwete vanga mambu mole. Diantete, “tufwete kwikila vo Nzambi una.” Aweyi tulenda yangidikila Nzambi avo tukatikisanga vo Nzambi una? Kansi, ke lukwikilu kaka ko luvavwanga muna yangidika Nzambi, kadi nkuya mpe bekwikilanga vo Yave una. (Yakobo 2:19) O lukwikilu lweto lufwete kutufila mu zingila ngwizani yo luzolo lwa Nzambi.—Yakobo 2:20, 26.
Diazole, “tufwete kwikila vo” Nzambi i “nsendi.” Muntu una yo lukwikilu lwakieleka, una ye ziku vo e ngolo kevanganga muna yangidika Nzambi ke zankatu ko. (1 Korinto 15:58) Aweyi tulenda yangidikila Yave avo tukatikisanga vo una yo luzolo yo nkuma wa kutusenda? (Yakobo 1:17; 1 Petelo 5:7) Ndiona oyindulanga vo Nzambi ke kutuvwanga mfunu ko, nkw’eloko ye nkwa nkokoto, kazeye Nzambi aludi ko.
Aki nani kesendanga o Yave? Paulu wavova vo: “Awana bekumvavanga.” Nsekola imosi ya Nkand’a Nzambi isasilanga o mvovo wa Kingerekia “bekumvavanga” vo, finama Nzambi muna “kunsambila” ye ziku kiawonso. E nsekola yakaka isonganga vo o mvovo wau wa Kingerekia, salu kiangolo mpe uyikanga. Elo, Yave osendanga awana bekunsambilanga, kunzola yo kunsadila yo vema kwawonso.—Matai 22:37.
Aweyi tulenda yangidikila Yave avo tukatikisanga vo una yo luzolo yo nkuma wa kutusenda?
Aweyi Yave kesendelanga asambidi andi akwikizi? Yave osonganga zola kwa asambidi andi muna kubavana nsilu wavwa moyo a mvu ya mvu muna Paradiso ova ntoto. (Lusengomono 21:3, 4) Kana nkutu owau, awana bevavanga Yave ye ziku kiawonso besambulwanga. Muna lusadisu lwa mwand’avelela ye Diambu dia Nzambi, bevwanga e zingu kiakiese.—Nkunga 144:15; Matai 5:3.
Dialudi, Yave oyangalelanga e salu kia kwikizi besalanga asambidi andi. Ozaya mambu mama, nga ke mafwete kufila ko mu finama Nzambi? Avo i wau, ekuma olembi longokela mayingi mu zaya una lenda songela lukwikilu luna Yave kesendanga?