10. (a) Adieyi Nzambi kakanikina Aneyisaele muna ngonde ya Nisani ya mvu wa 1513? (b) Ekuma Mose kalemvokela dina Yave kankanikina?

¹⁰ Muna ngonde ya Nisani ya mvu wa 1513 Vitila Tandu Kieto, Yave watuma Mose yo Arone benda kanikina Aneyisaele vo babonga ememe yovo nkombo, bavonda yo, i bosi bakusa menga mandi vana tungwa ya mielo mia nzo zau. (Luv. 12:3-7) Adieyi Mose kavanga? Paulu wa ntumwa wasoneka mu kuma kiandi vo: ‘Muna lukwikilu i kadil’e nduta, ye nzaz’amenga, o mfwasi a wan’antete kalembi kubasimba.’ (Ayib. 11:28) Mose wazaya wo vo nsilu mia Yave milungana. Wakala yo lukwikilu vo wan’antete awonso muna Engipito vondwa bevondwa.

11. Ekuma Mose kalukisila akw’andi?

¹¹ Wan’a Mose nanga kuna Midiani bakala, kwandá kikilu yo “mfwasi.”a (Luv. 18:1-6) Kana una vo i wau, walemvoka yo lukisa akw’andi Aneyisaele wau vo wan’au mu vonza bakala. Mose wazolanga kikilu akw’andi. Muna vuluza mioyo miau, vana vau Mose ‘wabokelesa mbuta zawonso za Isaele, yo kubavovesa vo bavonda e kimenga kia nduta.’—Luv. 12:21.

12. Nkia nsangu katutuma o Yave tufwete samuna?

¹² Muna lusadisu lwa mbasi, nkangu a Yave usamunanga nsangu ezi zamfunu: “Nuvumina Nzambi, yo kumvan’o nkembo; kadi e ntangw’a mfundis’andi ilueke: nukunda Ndiona wavang’ezulu, yo ntoto, yo kalunga, ye nto za maza.” (Lus. 14:7) Eyayi i ntangwa tufwete samuna nsangu zazi. Tufwete lukisa mfinangani zeto bavaika muna Babele Anene kimana balembi ‘tambul’owu wa vuku yandi.’ (Lus. 18:4) E “mameme makaka” beyikamanga Akristu akuswa mu dodokela wantu kimana bavutulwisa ngwizani au yo Nzambi.—Yoa. 10:16; 2 Kor. 5:20.

13. Adieyi dilenda kusadisa mu wokesa etima diaku dia samuna nsangu zambote?

¹³ Tuna ye ziku vo eyayi i “ntangw’a mfudisa.” Tuna mpe ye ziku vo e salu kia samuna nsangu zambote yo kitula wantu s’alongoki kifwete salwa mu nzaki nze una Yave kavova. Muna mona-meso, Yoane wa ntumwa ‘wamona mbasi yà zitelamene muna konko yà ya nza, zisimbinini e tembwa yau ayà ya nza.’ (Lus. 7:1) Muna lukwikilu, nga omonanga vo ke kolo ko e mbasi zazi ziyambula tembwa ya mpasi zayingi mu fwasa nza yayi? Avo okubamonanga muna meso ma lukwikilu, osamuna e nsangu zambote ye zingu kiawonso.